برطانیہ سے تعلق رکھنے والے نامور گلوکار (ریپر) ڈچ ویلی نے اسلامی تعلیمات سے متاثر ہوکر اسلام قبول کرلیا۔ ڈچ ویلی کے قبول اسلام کی ویڈیو سوشل میڈیا پر وائرل ہوئی جس میں وہ عالم دین کے ہاتھ قبول اسلام کر رہے ہیں اور دائرہ اسلام میں داخل ہونے کے لیے کلمہ شہادت پڑھ رہے ہیں۔
اس سلسلے میں ڈچ ویلی نے بھی سماجی رابطے کی سائٹ انسٹاگرام اسٹوری پر اپنی قبول اسلام کی ویڈیو شیئر کی ہے۔
اس سے قبل اطلاعات سامنے آئیں تھیں کہ گلوکار نے اسلامی تعلیمات سے متاثر ہوکر قرآن اور دیگر مقدس کتابوں کا باقاعدہ مطالعہ شروع کر دیا ہے تاہم ڈچ ویلی نے اس حوالے سے کوئی تصدیق یا تردید نہیں کی تھی۔
ان کی مذکورہ ویڈیو کو برطانوی سوشل میڈیا اسٹار گیکو نے بھی شیئر کیا اور انہوں نے لکھا کہ ڈچ ویلی دائرہ نے اسلام قبول کرلیا۔ بعد ازاں گیکو کی ویڈیو کو ڈچ ویلی نے بھی انسٹاگرام اسٹوری میں شیئر کیا۔ برطانوی گلوکار کے کلمہ شہات پڑھنے کی ویڈیو وائرل ہوگئی اور لوگوں نے ان کے لیے نیک خواہشات کا اظہار بھی کیا، تاہم ڈچ ویلی نے واضح طور پر اسلام قبول کرنے سے متعلق کوئی وضاحت نہیں کی۔ گلوکار نے فوری طور پر سوشل میڈیا اکاؤنٹس پر دائرہ اسلام میں داخل ہونے سے متعلق کوئی وضاحتی پوسٹ بھی جاری نہیں کی۔
بلاشبہ شہرت، دولت اور چمک دمک کسے متاثر نہیں کرتی لیکن جن لوگوں کو رب خداوند اپنی رحمت کے سائے میں لانا چاہتا ہے اور ہدایت دینا چاہتا ہے تو پھر یہ لوگ ان تمام دنیاوی چیزوں کو ترک کرکے خدا کی راہ پر چل پڑتے ہیں اور پورے معاشرے کیلئے مثال بن جاتے ہیں۔ اس کی مثال جنوبی کوریا کے مقبول ترین پاپ گلوکار اور یوٹیوبر داؤد کم بھی انہی خوش نصیبوں میں سے ایک ہیں جنہوں نے اسلامی تعلیمات سے متاثر ہوکر 2019 میں عیسائی مذہب سے کنارہ کشی اختیار کی اور اسلام قبول کرلیا۔
حال ہی میں داؤد کم نے عمرے کی سعادت حاصل کی اور اپنے انسٹاگرام پر مسجد الحرام سے اپنی تصاویر اور ویڈیو شیئر کرتے ہوئے اپنے مداحوں کو عمرے کی سعادت حاصل کرنے کی خوشخبری سنائی ہے۔
علاوہ ازیں ،گزشتہ دنوں بھارتی ریاست تامل ناڈو سے تعلق رکھنے والی معروف ہندو موٹیویشنل اسپیکر مسز سبری مالا اسلامی تعلیمات سے متاثر ہوکر مسلمان ہوئیں۔ انہوں نے اپنا اسلامی نام ‘فاطمہ سبری مالا’ رکھا ہے اور اسلام قبول کرنے کے بعد اُنہوں نے عمرے کی سعادت بھی حاصل کی ہے۔
0 Comments