مسلمانوں کی تیرھویں صدی کی فتوحات پر بنائے جانے والا ترکش ڈرامہ سریز ارتغرل غازی ان دنوں جہاں پاکستان میں اپنی مقبولیت کے جھنڈے گاڑ رہا ہے وہیں ڈرامہ دیکھنے والے لوگوں کی زندگیوں میں بھی اس کے واضح اثرات منتقل ہورہے ہیں۔
ایک جانب ڈرامہ ارتغرل غازی دیکھنے کے بعد اب عوام کو جہاں اپنی مسلمانوں کی تاریخ کا اندازہ ہوا، وہیں مسلمانوں کے عروج اور تاریخی فتوحات سے بھی لوگ بہت اچھی طرح ہمکنار ہوئے ہیں۔ یہی وجہ ہے کہ لوگوں کی جانب سے سلطنتِ عثمانیہ کی تاریخی روایات کو بھی کسی نہ کسی انداز میں اپنائے جانے کا عمل دیکھنے کو مل رہا ہے۔ جس کی سب سے بڑی مثال کراچی میں ہونے والی شادی کی ایک تقریب کی ہے جو اس وقت کافی وائرل ہے۔
پورے ملک میں ارتغرل غازی کی مقبولیت کا اندازہ ہمیں وقتاً فوقتاً مختلف انداز میں نظر آتا رہتا ہے لیکن کراچی میں ہونے والی شادی نے دیکھنے والوں کو سوشل میڈیا پر حیرت میں مبتلا کردیا۔ ارتغرل غازی کا تعلق ترکی کے “کائی” قبیلے سے تھا، جس میں شادی بیاں کا ایک مخصوص انداز دیکھایا گیا تھا، کراچی میں ہونے والی ایک شادی میں بلکل اس طرز کو اپنایا گیا ہے، جہاں دولہے فرحان کے دوست اور کزنز ہاتھوں میں تلوار اور شیلڈ لئے دلہن طہورا اور دولہے فرحان کے سامنے سائیڈوں میں لائن بنا کر کھڑے ہوتے ہیں اور پھر آمنے سامنے سے دلہن اور دولہے کے سامنے آتے ہیں اور تلوار بازی کرتے ہیں۔ جبکہ اس سین کو مزید منفرد اور دلچسپ بنانے کے لئے پیچھے ارتغرل غازی ڈرامے کے میوزک کو مستقل انداز میں چلائے رکھے گیا۔
ساتھ ساتھ دولہے کے دوستوں اور کزنز کی جانب سے ڈرامے کے انداز میں مختلف نعرے لگائے گئے جس میں کہا گیا کہ کیا فرحان اپنی بیوی کو خوش رکھ پائے گا، کیا فرحان نے کسی کا دل دکھایا۔ اس طرح کے مختلف نعرے مزاحیہ انداز میں لگائے جاتے رہے جبکہ دولہے اور دولہن کی گھر کی جانب انٹری کو اس سے بھی زیادہ خوبصورت انداز میں فلمایا گیا جس میں دولہے اور دولہن کو تلواروں کے سائے میں گھر کی جانب بھیجا گیا۔
یقیناً فرحان اور طہورا کی شادی پاکستان میں ہونے والی چند منفرد ترین شادیوں میں سے ایک ہے، جو یقیناً ایک لمبے عرصے تک یاد رکھی جائے گی اور شاید ان کی شادی کی انٹری کی دیکھا دیکھی اور بھی کئی لوگ اس طرز کو اپنائیں، ناصرف اپنائیں بلکہ اس میں اور بھی نیا اضافہ کریں۔
مزید جانئے: مشہور ترکش اداکارہ حلیمہ سلطان کو پشاور زلمی کا برانڈ ایمبسڈر بنانے پر غور
واضح رہے ارتغرل غازی ایک ترکش پروڈکشن ڈرامہ ہے، جس کو وزیراعظم پاکستان عمران خان کی خواہش پر رواں برس کے یکم سے روزانہ پاکستان ٹیلیوژن پر نشر کیا جارہا ہے۔ ساتھ ساتھ ہی لوگوں میں اس وقت ترکش اداکاروں کی مقبولیت میں بھی بے انتہا اضافہ دیکھنے میں آیا۔ اطلاعات ہیں کہ اس ڈرامے ارتغرل غازی میں ارتغرل غازی کا کردار ادا کرنے والے ترکش اداکار ایجن التین درزیتن کل پاکستان کا دورہ کررہے ہیں، جس پر لوگوں میں کافی جوش و خروش پائی جاتی ہے کیونکہ اس وقت سب کی خواہش ہے کہ وہ اپنے پسندیدہ فنکار سے ناصرف ملیں بلکہ ان کے ساتھ تصویریں بھی بنوا سکیں۔
0 Comments