رکن قومی اسمبلی اور معروف ٹیلی ویژن اینکر مرحوم ڈاکٹر عامر لیاقت حسین کی پہلی سابقہ اہلیہ ڈاکٹر بشریٰ اقبال نے اپنی بیٹی دعا عامر کی مرحوم والد کے ہمراہ یادگار ویڈیو شیئر کردی۔
گزشتہ دنوں ڈاکٹر عامر لیاقت حسین کی اچانک موت نے ان کے مداحوں کو گہرے رنج میں مبتلا کردیا تھا، ان کے اہل خانہ ان کی وفات پر تاحال صدمے سے دوچار ہیں۔ ان کی سالگرہ کے موقع پر ڈاکٹر بشریٰ اقبال نے اپنی بیٹی دعا عامر کی ان کے مرحوم والد ڈاکٹر عامر لیاقت کے ساتھ ایک یادگار ویڈیو سوشل میڈیا پر شیئر کی۔
مذکورہ ویڈیو میں کم عمری میں دعا عامر نے اپنے والد کے ہمراہ پروگرام میں شرکت کی تھی، اس ویڈیو میں ڈاکٹر عامر لیاقت کو اپنی بیٹی کا انٹرویو لیتے دیکھا جاسکتا ہے۔ بشریٰ اقبال نے ویڈیو کو یادگار لمحہ قرار دیتے ہوئے کیپشن میں ‘اَن مٹ نقوش’ بھی لکھا۔
اس ویڈیو کو مداحوں نے بے حد پسند کیا اور کمنٹس میں دعائیہ کلمات بھی درج کیے۔ چند صارفین کی جانب سے اس ویڈیو پر دکھ کا اظہار بھی کیا گیا، انہوں نے کہا کہ یہ لمحہ بچوں کے لیے انتہائی تکلیف دہ ہوتا ہے جب وہ والد کے انتقال کے بعد ایسی کوئی یادگار دیکھتے ہیں۔ بہت سے مداحوں نے اپنے جذبات کا اظہار کرتے ہوئے کہا کہ ڈاکٹر عامر لیاقت کے اچانک اس طرح رخصت ہوجانے سے ان کو دلی تکلیف پہنچی۔جبکہ کئی صارفین نے مرحوم کے لیے دعائے مغفرت کی اور انہیں خوبصورت انداز میں یاد رکھنے پر ڈاکٹر بشریٰ اقبال کو سراہا۔
خیال رہے کہ ایک سیاسی رہنما کے ساتھ ساتھ رمضان ٹرانسمیشن کے مقبول ترین اینکر پرسن کی حیثیت سے مشہور ڈاکٹر عامر لیاقت کی زندگی میں کئی نشیب و فراز آئے اور انہیں بے انتہا کامیابیوں کے ساتھ ساتھ چند مایوس کن لمحات کا بھی سامنا کرنا پڑا۔ انتقال سے کچھ ماہ قبل ڈاکٹر عامر لیاقت کی نجی زندگی شدید مسائل سے دوچار تھی اور ان کی تیسری شادی کا اختتام بھی طلاق پر ہوا تھا۔
انہوں نے پہلی شادی ڈاکٹر بشریٰ سے کی تھیں، جن سے انہیں دو بچے ایک بیٹا ایک بیٹی بھی ہیں، جن کی عمریں 20 سال سے زائد ہیں۔ڈاکٹر بشریٰ اقبال نے دسمبر 2020ء میں تصدیق کی تھی کہ شوہر نے انہیں طلاق دے دی۔ عامر لیاقت نے دوسری شادی ماڈل و اداکارہ طوبیٰ انور سے جولائی 2018ء میں کی تھی جو ان سے کئی سال کم عمر تھیں اور دونوں کی شادی 4 سال سے بھی کم عرصے تک چلی۔
گزشتہ سال فروری میں طوبیٰ انور نے تصدیق کی تھی کہ انہوں نے عامر لیاقت سے خلع لے لی ہے تاہم عامر لیاقت مسلسل اس کی تردید کرتے رہے۔پھر انہوں نے تیسری شادی فروری 2022ء میں بہاولپور کی 18 سالہ لڑکی دانیہ شاہ سے کی تھی، جنہوں نے مئی کے آغاز میں خلع کے لیے مقامی عدالت میں درخواست دائر کردی تھی۔دانیہ شاہ کی جانب سے طلاق کے لیے درخواست دائر کرنے کے بعد عامر لیاقت نے ان کی مبینہ آڈیو لیک کیں تو دانیہ شاہ نے بھی عامر لیاقت کی مبینہ آڈیو اور ویڈیوز لیک کردیں اور دونوں نے ایک دوسرے پر سنگین الزامات بھی لگائے تھے۔
بعد ازاں ، عامر لیاقت نے اپنی ہار تسلیم کرتے ہوئے دانیہ شاہ سے معافی مانگتے ہوئے پاکستان چھوڑ جانے کا اعلان کیا تھا، تاہم انہوں نے ملک چھوڑنے کی تاریخ نہیں دی تھی۔
0 Comments