دنیا کا مقبول ترین میسنجر واٹس ایپ ہر سال متعدد نئے فیچرز متعارف کرواتاہے اسی وجہ سے اس کے صارفین کی تعداد میں روز بہ روز اضافہ ہوتا جارہا ہے۔اب ایک مرتبہ پھر صارفین کی مشکل آسان کرنے کے لئے ایک اور نیا فیچر متعارف کیا گیا ہے، اس فیچر میں اگر آپ غلطی سے میسج کو ‘ڈیلیٹ فار می’ کردیں گے تو اسے واپس لایا جاسکے گا۔ ایپلی کیشن نے یہ فیچر دسمبر کے آغاز پر متعارف کرایا تھا لیکن تمام صارفین کی اس فیچر تک رسائی ممکن نہیں تھی، اب واٹس ایپ کی جانب سے باضابطہ اعلان کیا گیا ہے کہ یہ فیچر ڈیسک ٹاپ ، اینڈرائیڈ اور آئی فون صارفین کے لیے پیش کردیا گیا ہے۔
اس نئے فیچر میں کیا ہے؟
اکثر ایسا ہوتا ہے کہ صارفین چیٹ کے دوران جلد بازی میں یا غلطی سے کسی پیغام کو ‘ڈیلیٹ فار ایوری ون’ کی بجائے ‘ڈیلیٹ فار می’ کردیتے ہیں جس سے پیغام ہمیشہ کے لیے ڈیلیٹ ہوجاتا ہے اور جس کو میسج غلطی سے گیا ہوتا ہے وہ پڑھ لیتا ہے۔مگر نئے فیچر سے صارفین کو اس پریشانی کا سامنا نہیں ہوگا کیونکہ اب جب آپ کسی میسج کو غلطی سے ڈیلیٹ فار می کریں گے تو اسے دوبارہ اپنی اسکرین پر بھی واپس لاسکتے ہیں۔
اس فیچر کو کیسے استعمال کرنا ہوگا؟
واٹس ایپ نے نئے فیچر کے تحت میسج کو ری کوور کرنے کے لئے صارفین کو ‘ان ڈو’ کا آپشن دے دیا ہے، مگر آپ کے پاس ڈیلیٹ میسج ان ڈو کرنے کے لیے بس چند سیکنڈ ہوں گے اور اس کے بعد یہ آپشن غائب ہوجائے گا، جبکہ ڈیلیٹ فار ایری ون میں یہ آپشن موجود ہی نہیں ہوگا۔
ایک اندازے کے مطابق اس وقت دنیا میں ہر 4 میں سے ایک آدمی کے پاس واٹس ایپ کا اکاؤنٹ موجود ہے اور دنیا بھر میں 2 ارب صارفین اس ایپلیکیشن کے ذریعے روزانہ 42 ارب میسجز کا تبادلہ کرتے ہیں۔ یہی نہیں، واٹس ایپ کے پلیٹ فارم کے ذریعے ہر 24 گھنٹوں میں ڈھائی کروڑ وڈیوز بھی ایک دوسرے سے شئیر کی جاتی ہیں۔اس ایپ کی خاص بات یہ ہے کہ یہ سروس مفت دستیاب ہے۔ پہلے تک اس سروس کی فیس ایک ڈالر سالانہ تھی مگر کمپنی نے جنوری 2016 سے وہ بھی ختم کردی اور ہر صارف بغیر کسی خرچ اور اشتہارات کی جھنجٹ کے، واٹس ایپ استعمال کرسکتا ہے۔
اس حوالے سے عالمی خبررساں ایجنسی کے مطابق 2019 میں بھی واٹس اپ نے اپنی مقبولیت برقرار رکھنے اور صارفین کی توجہ حاصل کرنے کے لیے نئے فیچرز متعارف کرانے کا فیصلہ کیا تھا اور توقع کی جارہی ہے کہ یہ نئے فیچرز بہت جلد عوام الناس میں مقبولیت حاصل کرلیں گے۔
یاد رہے کہ گزشتہ دنوں واٹس ایپ نے آئی او ایس صارفین کے لیے چیٹ کا زبردست فیچر پیش کیا جس کے تحت اب پرانے پیغامات ڈھونڈنے میں کسی پریشانی کا سامنا نہیں کرنا پڑے گا۔ اس فیچر پر گزشتہ دو برسوں سے کام جاری تھا لیکن بیچ میں یہ تاخیر کا شکار ہوگیا تاہم حالیہ دنوں میں اسے پیش کردیا گیا ہے۔
0 Comments