صبور علی پیاگھر سدھار گئیں، بہنوئی احد رضا میر نے شرکت کیوں نہیں کی؟

نئے سال کے آغاز کے ساتھ ہی شوبز انڈسٹری میں شادی کا سیزن شروع ہوگیا ہے۔ گزشتہ برس منگنی کرنیوالے صبور علی اور علی انصاری بھی شادی کے بندھن میں بندھ گئے۔جس کی تصویریں اور ویڈیوز سوشل میڈیا پر وائرل ہو رہی ہیں۔

سوشل میڈیا پر جاری ویڈیوز میں دیکھا جاسکتا ہے کہ نکاح کی تقریب میں جب علی انصاری اپنی دلہنیا کو لیجانے کے لئے بہن مریم انصاری کے ساتھ پہنچے تو دلہن کی بہن سجل علی نے ان کا خوب صورت انداز میں استقبال کیا۔ اس موقع پر اداکارہ نے سنہری رنگ کا عروسی جوڑا پہنا جس پر انہوں نے روایتی سفید اور گولڈ جیولری پہن رکھی تھی جبکہ علی انصاری نے سفید رنگ کی شیروانی زیب تن کی اور اس پر پگڑی پہنی۔

نکاح کے لئے صبور علی کو سجل علی اور ان کے بھائی اسٹیج پر لائے جہاں نکاح نامے پر دستخط کیے گئے۔ نکاح کے وقت صبور علی آبدیدہ نظر آئیں جبکہ علی انصاری ان کا حوصلہ بڑھاتے رہے۔ دونوں فنکاروں کی زندگی کے اس خاص دن پر ساتھی اداکاروں نے شرکت کرکے تقریب کو چار چاند لگائے۔ ایمن خان ،عروہ حسین، کنزا ہاشمی، زارا نور عباس، سعدیہ غفارسمیت دیگر شخصیات نے رخصتی کی تقریب میں شریک ہوئیں۔ یاد رہے کہ گزشتہ برس مئی میں اداکار علی انصاری کے ساتھ منگنی کے بندھن میں بندھ جانے والی اداکارہ صبور علی کی شادی کی تقریبات کا آغاز ’ڈھولکی‘ کی تقریب سے ہوا تھا۔

لیکن تعجب کی بات یہ ہے کہ صبور علی کے نکاح اور رخصتی کی تقریب میں اُن کے رشتہ داروں اور شوبز ستاروں نے تو بھرپور انداز سے شرکت کی مگر ان کے بہنوئی احد رضا میر کہیں بھی نظر نہیں آئے بلکہ احد رضا میر اور اُن کے اہلخانہ صبور کی شادی کی کسی بھی تقریب میں شریک نہیں ہوئے جس کے بعد سوشل میڈیا صارفین کی جانب سے سجل اور احد کی ازدواجی زندگی سے متعلق کئی سوالات کیے جا رہے ہیں۔ اس کے ساتھ ہی سوشل میڈیا پر عین صبور کے نکاح کے دن احد رضا میر اور اُن کے اہلخانہ کی ایک تصویر بھی وائرل ہوئی جوکہ دبئی میں ایک شادی کی تقریب کے دوران لی گئی۔

View this post on Instagram

A post shared by DIVA Magazine Pakistan (@divamagazinepakistan)

سوشل میڈیا صارفین اس تمام صورتحال پر تشویش میں مبتلا ہیں اور ان کی جانب سے سوال کیا جارہا ہے کہ کیا احد کے لیے صبور علی کی شادی سے زیادہ یہ شادی اہم تھی؟ دوسری جانب یہ قیاس آرائیاں بھی کی جارہی ہیں کہ احد اور سجل نے اپنی راہیں جدا کرلی ہیں اس لئے اب ساتھ نظر نہیں آرہے۔

علاوہ ازیں ، سجل علی نے اپنے اور احد کے رشتے سے متعلق ان تمام سوالوں کی وضاحت کچھ دن پہلے خود ہی کی تھی۔ انہوں نے اپنی فلم ‘کھیل کھیل میں’ کی تشہیر کے دوران ایک انٹرویو میں احد رضا میر کی غیر حاضری سے متعلق پوچھے گئے سوال کے جواب میں بتایا تھا کہ احد رضا میر آج کل ملک سے باہر ہیں اور اپنے کام میں مصروف ہیں، اسی لیے اُن کی فلم کی تشہیر کے دوران احد رضا میر اور وہ ایک ساتھ نظر نہیں آرہے۔