پاکستان مسلم لیگ (ن) کی سینئر نائب صدر مریم نواز اور کیپٹن (ر) صفدر اعوان کے بیٹے جنید صفدر جلد ایک قریبی خاندانی دوست کی بیٹی سے شادی کے بندھن میں منسلک ہونے جا رہے ہیں۔ کیا آپ جانتے ہیں دلہن اور ان کے والد کون ہیں؟
تفصیلات کے مطابق بدھ کے روز مریم نواز کی جانب سے سماجی رابطے کی ویب سائٹ ٹوئیٹر پر بیٹے کی شادی کا دعوت نامہ شئیر کیا گیا۔ جس میں درج معلومات کے مطابق قوی احتساب بیورو (نیب) کے سابق چیئرمین سیف الرحمن خان کی بیٹی عائشہ سیف اور جنید صفدر کا نکاح 22 اگست کو ہوگا۔
سیف الرحمان خان کے حوالے سے اگر بات کی جائے تو ان کو شمار سابق وزیراعظم میاں نواز شریف کے قریبی دوستوں میں ہوتا ہے، انہیں میاں نواز شریف کے دوسرے دور یعنی1997 میں احتساب بیورہ کا چئیرمین مقرر کیا گیا تھا۔ حیرت انگیز طور پر مریم نواز کے بیٹے کی دعوت نکاح میں مرحرم کلثوم نواز کا نام بھی میزبانوں کی فہرست میں شامل کیا گیا ہے۔
اس موقع پر جہاں مریم نواز نے ٹوئیٹر پر بیٹے کے نکاح کا کارڈ شئیر کیا، وہیں اس بات کو بھی باور کرایا کہ وہ بیٹے کی شادی کے لئے بیرون ملک سفر کی اجازت کے لئے حکومت سے کوئی درخواست نہیں کریں گی۔ ان کا مزید کہنا تھا کہ افسوس کے ساتھ، میں بےبنیاد الزامات کا شکار، بوگس کیسز اور ایگزٹ کنٹرول لسٹ (ای سی ایل) میں نام شامل ہونے کی وجہ سے تقریب میں شرکت نہیں کرسکیں گی۔
بعدازاں رہنما پاکستان مسلم لیگ (ن) مریم نواز نے ایک اور ٹوئٹ کی، جس میں انہوں نے لکھا کہ میں جیل میں تھی، جب میری والدہ کا انتقال ہوا، اور اب وہ اپنے بیٹے کی خوشیوں میں شریک ہونے سے قاصر ہیں، لیکن وہ حکومت سے بیرون ملک سفر کرنے کی کوئی درخواست کریں گی۔ میں نے اپنا معاملہ اللہ تعالیٰ پر چھوڑ دیا ہے۔
واضح رہے ایون فیلڈ پراپرٹی کیس میں سزا سنائے جانے کے بعد مریم نواز کا نام ای سی ایل میں شامل کیا گیا تھا۔ یہ نیب کی جانب سے مریم نواز کے والد اور پاکستان مسلم لیگ کے قائد میاں محمد نواز شریف کے خلاف دائر کیا گیا تھا۔ اگرچے حکومت نے سال 2019 میں طبی بنیادوں پر سابق وزیراعظم کو بیرون ملک علاج کے لئے جانے کی اجازت دی تھی، البتہ مریم نواز ان کے ہمراہ ای سی ایل میں نام کی باعث نہیں جاسکی تھیں۔
خیال رہے کچھ عرصہ قبل ذرائع سے یہ خبریں سامنے آئیں تھیں کہ نواز شریف لندن میں واقع پارک لین کے فلیٹ میں کافی وقت گزار رہے ہیں۔ جہاں وہ ناصرف سیاسی اور پارٹی امور دیکھ رہے ہیں بلکہ وہ خاندانی امور پر بھی توجہ مرکوز کئے ہوئے ہیں۔ جس میں ان کے نواسے جنید صفدر کی شادی بھی شامل ہے۔
اس سلسلے میں یہ بھی بتایا جا رہا ہے کہ خوبصورت اور دلفریب شخصیت کے مالک جنید صفدر کے لئے لڑکی پسند کرنے سے لیکر شادی کے تمام معاملات خود سابق وزیراعظم نے انجام دیئے ہیں۔
یاد رہے جنید صفدر کا نام پہلی بار مرکزی خبروں میں اس وقت سامنے آیا تھا، جب لندن میں واقع ان کی رہائش گاہ کے باہر احتجاج کرنے والے پاکستان تحریک انصاف کے کارکنان سے وہ الجھ پڑے تھے۔ جبکہ حال ہی میں کشمیر الیکشن کی مہم کے دوران وزیراعظم عمران خان کی جانب سے انہیں گالف کھیلنے پر تنقید کا نشانہ بنایا تھا اور کہا تھا کہ یہ بادشاہوں کا کھیل ہے۔ بعدازاں مریم نواز نے بھی عمران خان کے بچوں پر جوابی وار کرتے ہوئے کہا تھا کہ وہ نواز شریف کا نواسا ہے، اس کی کسی یہودی کی گود میں پرورش نہیں ہوئی ہے۔
0 Comments