بیوی نے آشنا کی محبت میں شوہر کو جوس میں زہر دے کر قتل کردیا تھا

دھوکا، ظلم، بربریت، سفاکی یا پھر کچھ اور کراچی میں بے رحم بیوی نے آشنا کے ساتھ مل کر اپنے شوہر کو جوس میں زہر ملا کر قتل، پولیس نے بلاآخر کئی ماہ کی کوششوں کے بعد کیس کی گتھی سلجھا دی اور کاروائی کرتے ہوئے ملزمہ کو آشنا سمیت گرفتار کرلیا۔

تفصیلات کے مطابق کراچی کے علاقے گلشن اقبال میں ایک انسانیت سوز واقعے میں بیوی نے آشنا کی مدد سے شوہر کو جوس میں زہر ملا کر قتل کردیا، واقعہ گزشتہ برس 29 جون کو پیش آیا تھا، بعدازاں رضوان نامی شہری نے مقدمہ درج کرایا تھا۔

رضوان مقتول یوشاہ نامی نوجوان کے والد ہیں، جنہوں نے ایف آئی آر میں دعویٰ کیا تھا کہ 27 جون کو ان کے بیٹے یوشاہ اپنی اہلیہ وی آرین جنت کے ہمراہ گلشن اقبال میں واقع جوس سینٹر میں جوس پینے کیلئے گئے تھے جہاں پر جوس پینے کے بعد یوشاہ کی طبیعت اچانک خراب ہوگئی تھی، جس پر اسے فوری طور پر قریبی اسپتال لے جایا گیا جہاں وہ جانبر نہ ہو سکا۔ جس پر کیس کے مدعی اور مقتول کے والد نے بیٹے کو زہر دے کر قتل کرنے کا شبہ ظاہر کیا تھا۔

جس کے بعد پولیس کی جانب سے واقعے کی تفتیش کا آغاز کیا گیا، جس میں انتہائی حیران کن حقائق سامنے آئے، جس نے سب ہی کو حیران کرکے رکھ دیا۔

ایس ایس پی انویسٹی گیشن الطاف حسین کے مطابق دوران تفتیش اس کیس میں سنسنی خیز انکشافات سامنے آئے، یوشاہ کی بیوی آرین جنت کی لاہور کے رہائشی سلمان سے ڈیڑھ سال قبل سماجی رابطے کی ویب سائٹ انسٹاگرام پر دوستی ہوئی تھی جو آہستہ آہستہ عشق میں تبدیل ہوگئی اور دونوں نے ایک ہونے کیلئے یوشاہ کو راستے سے ہٹانے کا منصوبہ بنایا۔

اس سلسلے میں ملزم سلمان نے لاہور سے بذریعہ کوریئر سروس چاکلیٹ اور ایک عدد لیڈیز سینڈل ملزمہ کو کراچی بھجوائی، ملزم نے محبوبہ کو گفٹ کیے گئے سینڈل کی ہیل کے اندر زہر چھپا کر بھیجا تھا۔

اس دوران ایک روز اہلیہ آرین جنت شوہر متوفی یوشاہ کو چالاکی سے اپنے شوہر کو فریش جوس پلانے گلشن اقبال میں واقع جوس سینٹر لے گئی اور دھوکے سے اس کے جوس میں آشنا کا بھیجا گیا زہر ملا دیا، جس سے اس کی موت واقع ہوگئی۔

واضح رہے ایسا ہی ایک واقعہ کچھ عرصہ قبل لاہور کے علاقے مناواں پولیس اسٹیشن کی حدود میں بھی پیش آیا تھا، جہاں دو بچوں کی والدہ نے آشنا کے ہاتھوں شوہر کو قتل کروا دیا تھا، خاتون کے مطابق شوہر سے 12 سال قبل شادی ہوئی تھی جبکہ آشنا سے پچھلے 4 سال سے تعلقات تھے، آشنا نے خلع کے لئے زور دیا البتہ شوہر کے ساتھ خوشگوار تعلقات کے باعث قاصر تھیں، جس پر آشنا نے ایک رات گھر میں سوئے ہوئے شوہر کو گولیاں مار دیں اور پھر وہ فرار ہوگیا۔ بعدازاں پولیس نے تحقیقات کے بعد دونوں کو گرفتار کرلیا تھا۔

یاد رہے چند ماہ قبل کراچی میں ایک ہولناک واقعہ پیش آیا تھا، جس میں ایک فلیٹ میں 65 سالہ سہیل نامی شخص کو بےدردی سے ناصرف قتل کر دیا تھا، بلکہ مقتول کے لاش کے ٹکڑے ٹکڑے کر دیئے تھے.