بال لمبے بنانے ہیں تو پئیں یہ مشروبات

روکھے اور بے جان بال خوبصورت شخصیت کو ماند کر سکتے ہیں اس کے برعکس لمبے اور چمکدار بال معمولی سی شخصیت کو بھی نہایت پُرکشش بنادیتے ہیں۔ یہ بات تو ہم سب کو معلوم ہے کہ خوبصورت، لمبے اور گھنے بالوں کے لیے مناسب غذا، معیاری ہیئر پراڈکٹس (شیمپو ، کنڈیشنر، ہیئر ٹانک اور سیرم) کے ساتھ احتیاط کی بھی ضرورت ہوتی ہے ورنہ نامناسب نگہداشت سے بال گرِنا شروع ہوجاتے ہیں۔ لیکن کیا آپ جانتے ہیں کہ کچھ سبزیوں کے مشروبات ایسے بھی ہیں جو بالوں کی صحت کے لیے فائدہ مند ہیں اور اگر ہم یہ مشروبات روزانہ غذا کا حصہ بنالیں تو بالوں کی ضروریات کو پورا کرنے میں مدد مل سکتی ہے بلکہ بالوں کا جھڑنا اور گرنا بھی ختم ہوسکتا ہے۔

(Baal Lambe) بال لمبے

لہٰذا، آج ہم کچھ ایسے ہی مشروبات کا ذکر کرینگے جو مرد و خواتین دونوں کے گرتے بالوں کی روک تھام کے لیے بطور ہیئر ٹانک کام کرتے ہیں۔ ان مشروبات کا استعمال گِرتے بالوں کو روکنے، ان کو لمبا و گھنا کرنے کے ساتھ نئے بالوں کی نشوونما میں بھی اہم کردار ادا کرتے ہیں۔ اس لئے اگر آپ بھی چاہتے ہیں کہ آپ کے بال لمبے اور دلکش نظر آئیں تو ان مشروبات کا استعمال کریں۔

گاجر

گاجر کا جوس صحت کے لیے بہت فائدہ مند ہوتا ہے جس کی وجہ اس میں بیٹا کیروٹین کی موجودگی ہے جو بالوں کو جگمگانے میں مدد دینے والا جز ہے۔ اس جوس کو پینے سے بالوں کی جڑیں مضبوط ہوتی ہیں اور بالوں کا روکھا پن ختم ہوتا ہے۔

پودینہ

پودینہ اینٹی ہیئر فال خصوصیات سے مالا مال ہوتی ہے۔پودینے کا استعمال گرتے بالوں کی روک تھام میں خاصا مددگار ثابت ہوتا ہے۔ یہ سر کی جلد کو صحت فراہم کرتے ہوئے بالوں کو لمبا کرنے میں اہم کردار ادا کرتا ہے، ساتھ ہی بالوں کی چمک اور انہیں صحت مند بنانے میں بھی اہم کردار ادا کرتا ہے۔پودینے کی پتیوں کو سبز چائے کے ساتھ ملا کر بھی استعمال کیا جاتا ہے، جس کے پیش نظر یہ مختلف قسم کے طبی فوائد کے حصول کا باعث بن جاتی ہے۔ پودینے کی چائے بالوں کو لمبا کرنے اور گرتے بالوں کی روک تھام میں خاصی مددگار ہے۔

آملہ

عام طور آملہ کا رس، بالوں پر لگانے کے لیے استعمال کیا جاتا ہے لیکن بالوں کی صحت کے لئے آملہ کا رس بطور مشروب بھی استعمال کیا جاسکتا ہے۔ آملہ میں ایسے غذائی اجزاء پائے جاتے ہیں جو بالوں کی نشوونما بڑھانے اور گرتے بالوں کے خلاف مزاحمت کا کام سرانجام دیتے ہیں۔

کھیرا

اس کا مشروب بالوں کی مناسب نشوونما میں مدد دیتا ہے، اس میں موجود انزائے بالوں کے گرنے کی روک تھام کرتے ہیں جبکہ بالوں کی جڑوں میں ہیموگلوبن کی گردش بڑھاتے ہیں، روزانہ ایک گلاس اس جوس کا پینا بالوں کے مسائل کا حل ثابت ہوسکتا ہے۔

پالک

پالک ایک ایسی سبزی ہے جس میں کئی طرح کے منرلز، وٹامنز اور آئرن وغیرہ موجود ہوتے ہیں جو جلد اور بالوں کے لیے بہت مفید ہوتے ہیں، پالک کے جوس سے سر کی خارش اور بالوں کا گھنا پن ختم ہونے کے مسئلے پر قابو پانے ممکن ہوتا ہے، اس میں موجود وٹامن بی بالوں کی جگمگاہٹ بحال کرنے کے ساتھ نشوونما تیز کرتے ہیں۔

ایلوویرا جیل

ایلوویرا کے پتے سے نکالا جانے والا لیس دار عرق بالوں اور چہرے دونوں کے لیے بے شمار فوائد کا حامل ہوتا ہے۔ ایلوویرا کا جیل عام طور پر لگایا جاتا ہے لیکن اسے کھایا بھی جاسکتا ہے۔ ایلوویرا بطور مشروب استعمال کیا جائے تو یہ عمل نظام ہاضمہ کو بہتر بنانے میں مدد دیتا ہے۔ساتھ ہی غیر متوازن ہارمونز کا توازن برقرار رکھنے کے لیے ایلوویرا جوس کا استعمال بے حد مفید ہے۔

مزید پڑھیں: سردیوں میں خشکی سے کیسے چھٹکارا پائیں؟

علاوہ ازیں، پیاز بھی ایک ایسی سبزی ہے جس کے اندر کئی ایسے اجزاء پائے جاتے ہیں جو بالوں کے لئے بھی مفید ہیں۔ پیاز میں سلفر پایا جاتا ہے جو دوران خون کو بہتر، کولیگن کی نشوونما میں تیزی اور جراثیم کش ہونے کے باعث سر کے انفیکشنز کی روک تھام کرتی ہے۔ اس لئے پیاز کمزور بالوں کو مضبوط بنانے اور انہیں ٹوٹنے سے بچانے کی خصوصیت رکھتی ہے۔