پاکستانی ڈراموں اور فلموں سے شہرت حاصل کرنے والے اداکار علی خان نے اپنے ایک انٹرویو کے دوران انکشاف کیا ہے کہ معروف اداکارہ، وی جے و ماڈل ماورہ حسین کو بالی ووڈ فلم میں انہوں نے کام دلوایا تھا اور وہ بالی ووڈ کی بھوکی ہیں۔
سوشل میڈیا پر علی خان کے ایک پرانے انٹرویو کی ویڈیو انسٹاگرام پر تیزی سے وائرل ہو رہی ہے جس میں وہ میزبان نادیہ خان کے پروگرام میں شریک ہیں۔ شو کے دوران جب اسکرین پر ماورہ حسین کی تصویر دکھائی جاتی ہے تو علی خان کہتے ہیں کہ یہ حسین، چلبلی اور بھوکی ہیں، جواب پر نادیہ خان حیرانی کا اظہار کرتے ہوئے پوچھتی ہیں کہ کیا یہ دن میں 4 یا 8 بار کھانا کھاتی ہیں؟
اس پر اداکار علی خان جواب میں کہتے ہیں کہ کھانا کھاتی ہوں گی، ان کی صحت کو دیکھ کر نہیں لگتا لیکن یہ بالی وڈ کے لئےکافی بھوکی ہیں۔ انہوں نے بات جاری رکھتے ہوئے بتایا کہ ہمارا ایک پراجیکٹ ابھی ختم ہوا ہی تھا کہ میرے پاس اتفاق سے بھارت سے ایک پروڈیوسر کی کال آگئی، پروڈیوسر نے مجھ سے کہا کہ کوئی ایسی لڑکی بتاؤ جو نئی ہو، جس پر میں نے ماورہ کا نام بتا دیا اور اب وہ بالی وڈ میں ایک بڑی فلم میں کام کر رہی ہیں۔
میزبان نادیہ خان نے علی خان سے سوال کیا کہ ماورہ کو آپ نے بالی وڈ میں کام دلوایا؟ جس پر علی خان نے ہاں میں سر ہلاتے ہوئے کہا کہ کام تو اللہ دیتا ہے۔
یاد رہے کہ ماورہ حسین نے 2016 میں بالی وڈ فلم “صنم تیری قسم” میں اداکاری کے جوہر دکھائے تھے۔ جس میں ان کے مقابل ہرش وردھن رانے تھے۔ جب کہ علی خان برطانوی نژاد پاکستانی اداکار ہیں جو پاکستان کے علاوہ بالی اور ہالی ووڈ میں بھی کام کرچکے ہیں۔ پاکستان میں ان کا حالیہ پراجیکٹ ویب سیریز “عورت گردی” ہے جس میں ان کے مقابل جویریہ سعود ہیں۔
اس سے قبل ماورہ حسین کی ایک ویڈیو سوشل میڈیا پر وائرل ہوئی تھی جس میں انہوں نے کہا تھا کہ لاہوریوں کی چھیڑ چھاڑ سے کوئی مسئلہ نہیں ۔ندا یاسر کے شو میں ایک سوال پر اپنے خیالات کا اظہار کرتے ہوئے اُن کا کہنا تھا کہ گاڑی میں تیز میوزک لگانا اور چھیڑ چھاڑ کرنا لاہوریوں کا “فن”ہے اور اگر کوئی انہیں چھیڑے تو وہ اس پر برا نہیں مانتی۔ بظاہر ہلکے پھلکے انداز میں کہی جانے والی یہ بات سوشل میڈیا پر متنازعہ شکل اختیار کرگئی تھی اور ماورہ کو اپنے مداحوں کی جانب سے تنقید کا سامنا کرنا پڑا تھا۔
0 Comments