سوشل میڈیا پر ‘فضا’ اور ‘شزا’ کی میمز کی بھرمار ہوئی ہے، اس ڈرامے کا ایک کلپ کیا وائرل ہوا لوگوں کو تو جیسے تفریح کا موضوع ہاتھ لگ گیا۔ اس ڈرامے میں جڑواں دلہن کا مرکزی کردار ادا کرنیوالی اداکارہ کرن تعبیر اس سے قبل بھی کئی ڈراموں میں اپنی اداکاری کا جادو جگا چکی ہیں اور وہ اپنی تصاویر کی وجہ سے سوشل میڈیا پر کافی مقبول بھی ہیں لیکن اس بات سے انکار نہیں کہ مذکورہ ڈرامہ میں فضا شزا کے وائرل کلپ نے ان کی مقبولیت کا گراف مزید کئی گنا بڑھا دیا ہے۔
اسی حوالے سے آج کل سوشل میڈیا پر اداکارہ کے ایک انٹرویو کا کلپ بھی وائرل ہو رہا ہے جس میں انہیں اپنے کیرئیر کی ابتدا میں والد کے ردعمل سے متعلق بات کرتے دیکھا جاسکتا ہے جس میں انہوں نے اس بات کا انکشاف کیا ہے کہ انہیں پہلی بار ٹی وی پر دیکھ کر والد نے گھر سے باہر نکال دیا تھا۔
انٹرویو میں اداکارہ نے بتایا کہ ان کا تعلق ایک پنجابی فیملی سے ہے، والد سے جب آڈیشن کے لیے اجازت لی تو انہوں نے شوبز کے لیے سخت الفاظ کا استعمال کرتے ہوئے انکار کردیا لیکن چونکہ وہ بہن بھائیوں میں سب سے چھوٹی تھیں اور ضدی بھی تھیں لہٰذا انہیں آڈیشن کی اجازت مل گئی۔ اداکارہ کا کہنا تھا کہ والد کو یقین تھا کہ کون سی سلیکشن ہوجانی ہے تو انہوں نے اجازت دے دی لیکن ایک ماہ بعد اداکاری کے لیے کال آئی۔
کرن تعبیر نے مزید بتایا کہ جب والد نے پہلی بار ٹی وی پر دیکھا تو غصے سے پوچھا کہ تم نے ٹی وی پر کام کیا ہے؟ جس کے بعد انہوں نے کہا کہ آج سے تم میرے لیے مرگئی ہو، نکل جاؤ میرے گھر سے۔ اداکارہ نے مزید بتایا کہ اس کے بعد والد نے انہیں بازو سے پکڑا اور بغیر چپل کے رات کے 9 بجے گھر سے باہر نکال دیا۔
واضح رہے کہ ڈرامہ سیریز حقیقت میں جڑواں دلہن کا کلپ کے وائرل ہوتے ہی لوگوں کی جانب سے ڈرامے کی کاسٹ اور کہانی کا خوب مذاق اڑایا گیا تھا اور لوگوں کا کہنا تھا کہ دور جدید میں بھی اس طرح کی بے ڈھنگی کہانیاں دکھائی جارہی ہیں۔
تاہم اس کلپ کے وائرل ہونے اور تنقید کا نشانہ بنانے پر کرن تعبیر ڈرامے کا مذاق اڑانے والوں کو اپنی صلاحیتیں بہتر جگہ استعمال کرنے کی تجویز دی تھی۔ ان کا کہنا تھا کہ پاکستانی قوم کے پاس اتنا وقت ہے کہ دوسال قبل ڈرامہ کا ایک سین آج کل موضوع بحث بنا ہوا ہے اور لوگ اپنا قیمتی وقت اس ڈرامے کی اسٹوری پر ضائع کررہے ہیں۔ ’حقیقت’کے نام سے یہ ڈرامہ آج سے کم و بیش 3 سال قبل 2019 میں نشر کیا گیا جس کی 15 اقساط میں ہر بار الگ کہانی پیش کی گئی۔ کرن تعبیر نے 9ویں قسط میں دلہن کا کردار ادا کیا جس کا عنوان جڑواں رکھا گیا تھا۔
مزید پڑھیں: انٹرنیٹ پر وائرل پاکستانی میم ‘فرینڈ شپ اینڈ ود مدثر’
اس سے قبل کرن تعبیر نے تین سال میں بغیر ورزش کے 32 کلو وزن کم کرکے سب کو حیران کردیا تھا۔ اداکارہ دن میں بغیر چینی کے فریش جوس، سلاد ،ابلا چکن، سرخ لوبیا، گاجر، کھیرا اور ٹماٹر لیتی رہی اور پھر شام میں باربی کیو روٹی کے بغیر کھاتی تھی اور ایک گلاس دودھ روزانہ پیتی رہی تھیں۔
0 Comments