شادی کرکے کسی کی زندگی کو جہنم میں مت دھکیلیں، منال خان

سینئر صحافی ایاز امیر کے بیٹے شاہنواز نے اپنی 37 سالہ اہلیہ سارہ انعام کو باڈی بلڈنگ کرنیوالے ‘ڈمبل’ سے مار کر قتل کردیا۔ یہ واقعہ چک شہزاد کے فارم ہاؤس میں پیش آیا جبکہ پولیس نے بیوی کو قتل کرنے کے الزام میں شاہنواز کو گرفتار کرلیا۔ فی الحال اس کیس کے مرکزی ملزم شاہنواز جسمانی ریمانڈ پر پولیس کی تحویل میں ہیں۔

مقتولہ سارہ انعام کینڈین نژاد پاکستانی خاتون تھیں اور ان کے دوست، رشتہ دار اور ساتھ کام کرنے والے کینیڈا، متحدہ عرب امارات اور پاکستان میں پھیلے ہوئے ہیں۔ اس واقعے کی اطلاع اُن کے دوستوں کے لیے کسی قیامت سے کم نہیں تھی۔ اس افسوناک واقعے پر معروف اداکارہ منال خان نے بھی سارہ انعام کے قتل پر گہرے رنج و افسوس کا اظہار کرتے ہوئے کہا ہے کہ شادی کرکے کسی کی زندگی کو جہنم میں مت دھکیلیں، اگر آپ اپنے غصے کو کنٹرول نہیں‌ کرسکتے تو شادی مت کریں۔

اداکارہ نے انسٹاگرام پر اسٹوری شیئر کرتے ہوئے لکھا کہ گھریلو تشدد کب ختم ہوگا؟ اسے اب ختم ہونا چاہیے۔انہوں نے لکھا کہ میری پیاری سہیلی سارہ کو اس کے شوہر نے بےدردی سے قتل کر دیا، اس کی عمر 37 تھی اور وہ زندہ دل انسان تھی۔منال خان نے مزید لکھا کہ سارہ چاہتی تھی کہ وہ ماں بنے، اسے کتابیں پڑھنے سے بہت زیادہ رغبت تھی اور وہ اپنی فیملی سے بہت محبت کرتی تھی۔اداکارہ نے لوگوں پر زور دیا کہ گھریلو تشدد کو رکنا چاہیے، شادی کرکے کسی کی زندگی کو جہنم میں مت دھکیلیں۔

دوسری طرف ،قتل کی اس دل دہلا دینے والی واردات کی پرتیں کھلنے لگی ہیں، پولیس کو ابتدائی بیان میں ملزم شاہنواز نے بتایا کہ سارہ سے سوشل میڈیا پر دوستی اور 3 ماہ پہلے شادی ہوئی تھی۔ملزم نے بتایا کہ سارہ دبئی سے اسلام آباد آئی تھی، مجھے شک تھا کہ سارہ کا کسی کے ساتھ کوئی افیئر ہے، اہلیہ نے مجھے اس حوالے سے مطمئن کردیا۔ ملزم شاہنواز نے مزید کہا کہ مجھے لگتا تھا کہ سارہ کسی ملک کی ایجنٹ ہے اور مجھے قتل کرنا چاہتی ہے، رات میں اُس نے میرا گلا پکڑا تھا اور صبح بھی قریب آکر میری گردن پکڑلی تھی۔

اس موقع پر ملزم نے یہ بھی کہا کہ جب گردن پکڑی تو مجھے لگا جیسے میری گردن ٹوٹ جائے گی اور میں مرجاؤں گا، جس پر میں نے سارہ کو دھکا دیا، وہ نیچے گری اور پھر اٹھ کر مجھ پر حملہ کردیا۔ شاہنواز نے بتایا کہ قریب ورزش والا ڈم بل پڑا تھا جو اس کے سر پر دے مارا، جس سے اُس کے سر سے خون نکلا اور میں گھبرا گیا، خون صاف کرنے کے لیے سارہ کو باتھ ٹب میں ڈال دیا۔ملزم نے مزید بتایا کہ باتھ ٹب میں ڈالنے کے بعد میں نے پانی کھول دیا تاکہ خون بہہ جائے، پھر باتھ ٹب کی تصویر کھینچ کر اپنے والد ایاز امیر کو بھیج دی اور انہیں فون پر سارے واقعے کی اطلاع دی۔ذرائع کے مطابق ایاز امیر نے اسلام آباد پولیس کے سینئر افسران کو فون پر واقعے کی اطلاع دی۔

خیال رہے کہ ملزم شاہنواز کی پہلی بیوی نے شادی کے چند دن بعد ہی علیحدگی اختیار کرلی تھی، ملزم کی دوسری بیوی بھی شادی کے 6 ماہ بعد اسے چھوڑ گئی تھی۔ملزم کی یہ تیسری شادی تھی جبکہ اس کی پہلی بیوی کا نام بھی سارہ تھا۔