پولیس اہلکار خاتون کی نازیبا ویڈیو بناتے ہوئے پکڑا گیا

ملک میں دہشت گردی کا مسئلہ ہو یا اسٹریٹ کرائمز کی واردتیں یہ پولیس کے چوکس جوان ہی ہیں جو اپنی جانوں کو ہتھیلی پر لئے انتہائی محدود وسائل کے ساتھ قوم کی خدمت کے لئے سرگرمِ عمل رہتے ہیں۔ لیکن افسوس کہ اس محکمے میں چند کالی بھیڑیں ایسی بھی ہیں جنہوں نے اس محکمے کا نام بدنام کر رکھا ہے۔ درحقیقت یہی افسران ادارے کی تباہی ، بربادی اور بدنامی کا مؤجب ہیں۔

سوشل میڈیا پر ایک ویڈیو بہت تیزی سے وائرل ہو رہی ہے جس کی وجہ سے محکمہ پولیس پر خاصی تنقید کی جا رہی ہے اور عوام میں شدید غم وغصہ پایا جاتا ہے۔

انگریزی روزنامہ ایکسپرپس ٹریبیون کے مطابق یہ واقعہ بہاولنگر میں پیش آیا، جس میں ایک پولیس اہلکار کو لوگوں نے اس وقت پکڑ کر زدوکوب کیا جب وہ ایک گھر کے غسل خانے کے کھلی کھڑکی سے فون اندر داخل کر کے وہاں موجود کسی خاتون کی ویڈیو بنا رہا تھا۔ بعد ازاں اسے پولیس کے حوالے کردیا گیا۔

جب کہ اسی پولیس اہلکار کی دوسری ویڈیو میں اسے زخمی حالت میں درد سے کراہتے ہوئے دیکھا جاسکتا ہے اور ویڈیو میں وہ یہ کہہ بھی رہا ہے کہ اس کی کمر ٹوٹ چکی ہے۔ اس دوران ایک اور پولیس اہلکار آتا ہے اور اس کا فون چیک کر رہا ہے۔ ایس پی انویسٹٰی گیشن بہاولنگر فاروق احمد کا کہنا ہے کہ پولیس اہلکار کو معطل کر کے تفتیش شروع کردی گئی ہے اور اس پولیس اہلکار کے خلاف فورٹ عباس پولیس اسٹیشن میں ایف آئی آر درج کرلی گئی ہے۔

مزید پڑھیں: خواتین سے پارک میں بدتمیزی اور نازیبا جملے ادا کرنے والا مجرم گرفتار

ملک میں جرائم کی شرح میں آئے روز اضافہ ہو رہا ہے، خواتین کی عصمت دری اور بچوں کے ساتھ بدفعلی کے واقعات نے خوف وہراس کی فضا پھیلا رکھی ہے، گزشتہ دنوں بھی خاتون سے زیادتی کا ایک اور واقعہ سامنے آیا ، جس میں ملزم خاتون کی نازیبا ویڈیو بناکر اسے متعدد باراپنی ہوس کانشانہ بناتا رہا۔ پنجاب کے شہر لودھراں کے علاقہ دنیا پور میں ملزم نے پہلے خاتون کی نازیبا ویڈیو بنائی اور پھر متعدد بار اس کے ساتھ زیادتی کرتا رہا، متاثرہ خاتون نے تنگ آکر پولیس کو سب بتا دیا، خاتون کا کہنا تھا کہ ملزم نے نازیبا ویڈیو کے ذریعے بلیک میل کیا اور بلیک میل کرکے کئی بار زیادتی کانشانہ بنایا۔خاتون نے پولیس کو اپنے بیان میں یہ بھی بتایا کہ ملزم نے اسے جان سے مارنے کی دھمکیاں دیں اور نقدی اور زیورات لے کر فرار ہوگیا۔

مزید پڑھیں: شوہر نے نازیبا ویڈیوز وائرل کیں، اب قتل کرنا چاہتا ہے، ویسہا ابوبکر

علاوہ ازیں ، کچھ عرصہ قبل وفاقی تحقیقاتی ادارے (ایف آئی اے) کے سائبر کرائم سرکل نے کراچی میں کارروائی کرتے ہوئے ایک ایسے ملزم کو گرفتار کیا جو خود کو حساس ادارے کا اہلکار ظاہر کرکے ایک خاتون کو جنسی ہراساں کرکے نازیبا ویڈیوز بناتا اور الیکٹرک شاک بھی دیتا تھا۔ ایف آئی اے سائبر کرائم سرکل کی جانب سے جاری کردہ اعلامیہ میں بتایا ہے کہ گرفتار ملزم علی خود کو حساس ادارے کا اہلکار ظاہر کرتا تھا اور اس کا تعلق بااثر گھرانے سے ہے۔ ملزم شادی شدہ اور دو بچوں کا باپ ہے، اس نے متاثرہ لڑکی کی فیک آئی ڈی بناکر اس کے رشتے داروں کو ایڈ کیا تھا جہاں وہ اس کی غیر اخلاقی تصاویر شیئر کرتا تھا اور خاتون کو چھ سال سے زیادتی کا نشانہ بنارہا تھا۔ متاثرہ خاتون کے بیان کے مطابق ملزم نے خاتون پر تشدد کرتے ہوئے اس کے بال اور بھنویں مونڈ دی تھیں اور ٹیزر گن سے اسے کرنٹ کے جھٹکے بھی دیتا تھا۔

Story Courtesy: Express News