چند ماہ قبل لاہور موٹروے پر پیش آنے والے اجتماعی زیادتی کے ہولناک واقعے نے جہاں پوری قوم کو جھنجوڑ کر رکھ دیا تھا وہیں اس واقعے سے خواتین کے دلوں میں ایک واضح خوف ہراس دیکھا گیا۔ اس واقعہ پر عوام کا بس ایک ہی مضبوط مطالبہ سامنے آیا کہ اس بار مجرمان کو نشان عبرت بنایا دیا جائے۔
اس ہی دل دہلا دینے والے واقعے پر مشہور و معروف پاکستانی اداکارہ صنعم سعید کی جانب سے ” اب بس” کے نام سے ایک مختصر فلم یوٹیوب پر ریلیز کی گئی، جس میں لوگوں کو ایک مضبوط پیغام دیا گیا ہے۔
تفصیلات کے مطابق مختصر فلم “اب بس” کی کہانی موٹروے حادثے پر مبنی ہے۔ جیسے یوٹیوب پر سی پرائم نامی چینل پر ریلیز کیا گیا ہے، جبکہ اس فلم میں اداکارہ صنعم سعید نے مرکزی کردار ادا کیا ہے۔
واضح رہے اس سانحے کے بعد پورے ملک میں ایک نئی بحث کا آغاز ہوگیا تھا، سب ہی کا محض ایک ہی سوال تھا کہ کیا ہمارے معاشرے میں ایک اکیلی عورت بالکل محفوظ نہیں ہے؟ کیا عورت کو اپنا تحفظ اب خود کرنا ہوگا؟ اس طرح کے دیگر سوالات کی گونج سنائی دیتی رہی۔
یہ فلم “اب بس” اس ہی بڑھتے ہوئے سماجی مسائل کو دیکھتے ہوئے بنائی گئی ہے، جس کی کہانی میں بتایا گیا ہے کہ ہمارے ملک میں خواتین کتنی غیر محفوظ ہیں۔ فلم کے دورانئے کے حوالے سے بات کی جائے تو یہ 10 منٹ، 24 سیکنڈ پر مختص ہے، جبکہ اس فلم میں معروف اداکارہ صنعم سعید ایک مایا نامی لڑکی کا کردار ادا کررہی ہیں۔
فلم کی کہانی کے مطابق مایا کے والد کو دل کا دورہ پڑتا ہے، اور مایا کو پھر اپنے والد کے پاس جانے کے لئے اکیلے سفر کرنا ہوتا ہے، لیکن اس سفر سے قبل وہ اپنی حفاظت کے لئے مختلف قسم کی چھریاں، بندوق اور دیگر ضروری اشیاء رکھتی ہیں۔
اس فلم میں ہدایت کاری کے فرائض محسن طلعت نے ادا کئے ہیں جبکہ فلم کی پروڈیوسر سیمین نویس اور فلم کی کہانی شاہد ڈوگر نے لکھی ہے۔ اس فلم کو شائقین کی جانب سے خوب پسند کیا جارہا ہے ، شائقین ناصرف فلم بنانے والوں کی کاوشوں کو سراہا رہے ہیں بلکہ اس میں دیئے جانے والے پیغام کو خوب پسند کیا جارہا ہے۔ یوٹیوب پر ریلیز کی جانے والی اس فلم کو اب تک 16 لاکھ لوگ دیکھ چکے ہیں۔
یاد رہے لاہور کے علاقے گجرپورہ میں موٹروے پر 9 ستمبر کو لاہور سے گجرانوالہ جانے والی خاتون کو بچوں کے سامنے اجتماعی زیادتی کا نشانہ بنایا گیا تھا، اس واقعے نے پوری قوم کو جھنجھوڑ کر رکھا دیا تھا، بعدازاں پولیس کی جانب سے کاروائی کرتے ہوئے دونوں ملزمان کو گرفتار کرلیا گیا ہے۔ اب دونوں ملزمان کے خلاف عدالت میں کیس جاری ہے۔
0 Comments