موسم گرما کا مزیدار پھل لیچی، جسکے چھلکے بھی ہیں نہایت فائدے مند

لیچی کا نام سنتے ہی منہ میں پانی آجاتا ہے، یہ پھل گرمیوں کے موسم میں آتا ہے جس کو کھا کر فرحت بخش احساس پیدا ہوتا ہے۔ لیچی انتہائی نازک پھل ہے جسے زیادہ دن تک ذخیرہ نہیں کیا جاسکتا۔ اس کے اوپر سرخ رنگ کا موٹا چھلکا ہوتا ہے جب کہ اندر جھلی نما سفیدی مائل گودا خوش ذائقہ ہوتا ہے۔ جلد کے فوائد سے لیکر مضبوط وقت مدافعت تک یہ پھل کئی طریقوں سے آپ کی صحت کے لیے فائدہ مند ثابت ہوسکتا ہے۔

ماہرین کے مطابق یہ ایسا پھل ہے جو صحت کے لئے نہایت مفید ہونے کے ساتھ مدافعتی طاقت اور خون کے دورانیے کو بہتر کرنے کے علاوہ جلد کو خوبصورت بنانے کا کام بھی سرانجام دیتا ہے۔ اس میں وٹامن سی زیادہ مقدار میں پائی جاتی ہے جو کہ انسانی صحت کے لئے انتہائی مفید ہے۔

اس کے علاوہ یہ میگنیشئیم، فوسفورس، آئرن، میگنیز اور کاپر سے بھرپور ہوتی ہے، یہ تمام منرلز ہڈیوں کو کیلشئم جذب کرنے دیتے ہیں جس کی وجہ سے ہڈیاں مضبوط اور طاقتور ہوتی ہیں۔ لیچی میں پرانتھوساینڈنز اور لیچیٹینین ہوتا ہے جس کے اندر یہ خاصیت پائی جاتی ہے کہ وہ ہر قسم کے وائرس سے تحفط فراہم کرسکتا ہے اور وائرس پھیلنے سے روکتی ہے۔

لیچی کے جِلد کی خوبصورتی کے حوالے سے بھی بہت سے فوائد ہیں، لیچی میں پائی جانے والی متعدد خصوصیات آپ کی جِلد کو بہت سے فائدے پہنچا سکتی ہیں۔ لیچی میں موجود وٹامن سی جِلد کو صحت اور حسین و جمیل بناتا ہے اور چہرے سے بڑھتی عُمر کے اثرات بھی ختم کرتا ہے۔ لیچی کے ان گنت فوائد کی طرح اس کے چھلکے بھی بڑے کام کے ہیں اور ان کو مختلف طریقوں سے جلد اور بالوں پر استعمال کیا جاسکتا ہے۔ کیسے آئیے جانتے ہیں؛

لیچی کے چھلکوں کو چہرے کے اسکرب کے طور پر استعمال کیا جاسکتا ہے۔اس کے لیے مکسچر گرائنڈر میں چھلکا ڈال کر چاول کا آٹا، ایلو ویرا جیل اور عرق گلاب کو پیس لیں۔ اپنے چہرے کی مالش کریں اور صاف پانی سے دھو لیں۔اس سے آپ کے چہرے پر چمک آجائے گی۔

چکنی جلد اور ایکنی کیلئےلیچی کے جوس کے چند قطرے عرقِ گلاب کے ساتھ ملا کر 20 منٹ تک لگائیں، گرمیوں میں چکنی جلد سے مکمل طور پر چھٹکارا ملے گا اورساتھ ہی ایکنی جیسے مسائل بھی دور ہوجائیں گے۔

لیچی کے چھلکوں سے گردن پر لگنے والا میل دور ہو سکتا ہے، اس کے لیے چھلکے کو پیس کر لیموں کا رس، ناریل کا تیل، ہلدی ملا کر پیسٹ تیار کریں، اس سے گردن کے مردہ خلیے ختم ہوجائیں گے۔

لیچی کا چھلکا ٹخنوں کی گندگی کو صاف کرنے میں بہت مددگار ثابت ہوتا ہے۔اس کے لیے چھلکے کو باریک پیس لیں اور اس میں ملتانی مٹی، سیب کا سرکہ، بیکنگ سوڈا ملا دیں۔ اسے ٹخنوں پر لگائیں اور 20 منٹ کے لیے چھوڑ دیں۔ اس کے بعد اسے پانی سے صاف کرلیں۔

اس رسیلے پھل میں کاپر موجود ہوتا ہے جو بالوں کی بہتر نشونما کے لئے مفید ہے۔ 2 کھانے کے چمچ ایلوویرا کا گودا لیچی کے ذرا سے جوس کے ساتھ ملا کر ایک گھنٹے کے لئے بالوں پر لگائیں اور پھر دھونے کے بعد کمال دیکھیں۔