دنیا کے ‘ناقابل رہائش’ شہروں کی فہرست میں کراچی پانچواں نمبر پر آگیا

عالمی جریدے اکانومسٹ انٹیلی جنس یونٹ نے دنیا کے 173 ممالک کے شہروں کی قابل رہائش اور ناقابل رہائش ہونے کی بنیاد پر ٹاپ ٹین رینکنگ جاری کی ہے جس میں پاکستان کو سب سے زیادہ ریونیو دینا والا شہر کراچی فہرست میں پانچواں نمبر پر ہے۔ ای آئی یو کے انڈیکس میں 30 سے زیادہ عوامل کی بنیاد پر 173 شہروں میں حالات زندگی کی درجہ بندی کی گئی ہے، شہروں کی درجہ بندی استحکام، صحت کی سہولیات، ثقافت و ماحول، تعلیم اور انفرااسٹرکچر کے شعبوں کی نوعیت اور غیر دستیاب عوامل کی بنیادوں پر کی جاتی ہے۔

اس سال رہائش کے لیے دنیا کے بدترین شہروں کی فہرست میں کراچی 173 شہروں میں 168 ویں نمبر پر ہے جو درجہ بندی کے لحاظ سے محض الجزائر، طرابلس، لاگوس اور دمشق جیسے شہروں سے بہتر رہا۔ اس فہرست میں چھٹے نمبر پر پاپوا نیو گنی کا شہر پورٹ مورسبی، ساتویں نمبر پر بنگلہ دیش کا شہر ڈھاکا، آٹھویں نمبر پر زمبابوے کا شہر ہرارے، نویں نمبر پر کمیرون کا شہر دوالا اور دسویں نمبر پر ایران کا دارالحکومت تہران ہے۔

رواں سال اس فہرست میں سندھ کا دارالحکومت 37.5 انڈیکس اسکور کے ساتھ 173 شہروں میں 168 ویں نمبر پر رہا، کراچی کا ہیلتھ کیئر اسکور 33.3 ہے، اس نے ثقافت اور ماحولیات کے لیے 35.2 اسکور حاصل کیا، تعلیم کے لیے 66.7 اور انفراسٹرکچر میں 51.8 کا سکور حاصل کیا۔

مذکورہ فہرست میں آسٹریا کا دارالحکومت ویانا ایک بار پھر رہائش کے لیے دنیا کے بہترین شہر کے طور پر پہلے نمبر پر آگیا ہے۔ رپورٹ کے مطابق ویانا نے نیوزی لینڈ کے شہر آکلینڈ سے بہترین شہر کا ٹائٹل چھین لیا ہے،اس  شہر کی نمایاں خصوصیات اس کا استحکام اور اچھا انفرااسٹرکچر ہے، اس کے علاوہ اچھی طبی سہولیات اور ثقافت اور تفریح کے مواقع بھی شہریوں کے لیے پرکشش ہیں۔ ویانا کے بعد دوسرے نمبر پر ڈنمارک کا دارالحکومت کوپن ہیگن ، تیسرے نمبر پر سوئٹزرلینڈ کا شہر زیورخ ہے جبکہ اس کے بعد بالترتیب کینیڈا میں کیلگری، پھر وینکوور اور اس کے بعد سوئٹزرلینڈ میں جنیوا کے نام آتے ہیں۔

چھٹے نمبر پر جرمن شہر فرینکفرٹ، پھر کینیڈا کے شہر ٹورنٹو، اس کے بعد نیدرلینڈز کے شہر ایمسٹرڈیم اور دسویں نمبر پر مشترکہ طور پر جاپان کے اوساکا اور آسٹریلیا کے میلبورن کے نام شامل ہیں۔

مزید برآں، اگر مذکورہ رپورٹ کاجائزہ لیا جائے تو اس بات کی نشاندہی ہوتی ہے کہ فہرست میں کراچی سے پہلے اور بعد میں موجود زیادہ تر شہر پسماندہ خطے افریقا سے تعلق رکھتے ہیں یعنی اس درجہ بندی میں کراچی کا شمار خانہ جنگی اور قدرتی آفات سے متاثر ہونے والے شہروں کے ساتھ کیا گیا ہے۔ان شہروں کے ساتھ شہر قائد کی درجہ بندی اس بات کی کھلی دلیل ہے کہ کسی قدرتی آفت کے بغیر پاکستان کے میگا سٹی میں استحکام ،صحت عامہ، ماحولیات،تعلیم اور انفرا اسٹرکچر کی صورت حال اس قدر مخدوش ہوچکی ہے کہ اس کا شمار دنیا کے ناقابل رہائش شہروں کی ٹاپ ٹین فہرست میں گیا ہے۔

یاد رہے کہ اکانومسٹ انٹیلی جنس یونٹ کی گزشتہ رپورٹ میں کراچی، ناقابل رہائش شہروں کی لسٹ میں ساتویں نمبر پر تھا۔