دعا مانگنے کی فضیلت اور اس کی قبولیت کے مخصوص اوقات

‘دعا’ کا مطلب ہے مانگنا، ندا کرنا، چاہنا، آواز بلند کرنا اور مدد طلب کرنا ہے، دینی اصطلاح میں دعا کا مطلب اللہ تعالیٰ سے حاجت طلب کرنا ہے۔ دعا کے بارے میں قرآن مجید میں اللہ تعالیٰ نے متعدد جگہ ہدایت دی ہے، ان آیات مبارکہ سے دعا کی عظمت واضح ہوتی ہے۔ سورۃ البقرۃ ، (آیت نمبر186) میں ارشاد باری تعالی ہے کہ ؛
‘اور (اے پیغمبر) جب تم سے میرے بندے میرے بارے میں دریافت کریں تو (کہہ دو کہ) میں تو (تمہارے) پاس ہوں، جب کوئی پکارنے والا مجھے پکارتا ہے تو میں اس کی دعا قبول کرتا ہوں تو ان کو چاہیے کہ میرے حکموں کو مانیں اور مجھ پر ایمان لائیں تاکہ نیک راستہ پائیں’۔

دعا کی فضیلت

دعا کے معنیٰ اللہ تعالی سے مانگنے اور اس کی بارگاہ میں اپنا دامن پھیلانے کے ہیں، دعا صرف مشکلات، پریشانی یا بیماری سے چھٹکاراپانے کے لئے نہیں کی جاتی بلکہ دعا اس لئے بھی کی جاتی ہے تاکہ قربِ الہی حاصل ہوجائے۔ اللہ کے پیارے نبی حضرت محمد صلؔی اللہ علیہ وآلٖہ وسلؔم نے دعاکی عظمت، اس کی بر کتیں، دعا کے آداب اور دعا کرنے کے بارے میں ہدایات دی ہیں۔

ایسی بے شمار احادیث ہیں، جن میں دعا کا ذکر ہے اور دعا کی اہمیت و فضیلت بتائی گئی ہے۔ دعا کی اہمیت کا اندازہ اس حدیث مبارک سے بھی ہوتاہے کہ ؛
‘دعا مومن کا ہتھیار ہے ، دین کا ستون ہے اور آسمان و زمین کی روشنی ہے’۔دعا نہ مانگنے سے اللہ تعالیٰ ناراض ہوتا ہے۔حضرت ابو ہریرہ رضی اللہ عنہ روایت کرتے ہیں کہ رسول اللہ صلؔی اللہ علیہ وآلٖہ وسلؔم نے فرمایا کہ؛
ـ ‘جو شخص اللہ تعالیٰ سے دعا نہیں مانگتا اللہ اس سے ناراض ہوتا ہے’۔

دعا کی قبولیت کے مخصوص اوقات

اللہ تعالی ہر وقت اپنے بندوں کی دعا کو سنتا اور ان کی دعاؤں کو قبول بھی کرتا ہے لیکن کچھ خاص اوقات ایسے بھی ہیں، جن میں دعائیں بہت جلد قبول ہوجاتی ہیں، ان میں سے بعض اوقات یہ ہیں :

رات کا آخری پہر یعنی پچھلی شب بیدار ہو کر نماز تہجد پڑھنے کے بعد کی دعا۔

جمعہ کے دن ، قبولیت کی ایسی ساعت (گھڑی) ہوتی ہے، جس میں دعا قبول ہوتی ہے۔

رمضان المبارک میں شب قدر میں مانگی جانے والی دعا۔

رمضان المبارک کے مہینے میں افطارکے وقت کی دعا۔

فرض نمازوں کے بعد کی دعا۔

مزید پڑھیں: جمعتہ المبارک اور سورۂ کہف کی فضیلت

سجدے کی حالت میں مانگی جانے والی دعا۔

قرآن مجید کی تلاوت اور ختم قرآن کے وقت مانگی جانیوالی دعا۔

مرغ کی بانگ کے وقت کی دعا۔

اذان اور بارش کے وقت کی دعا۔

ان اوقات کے علاوہ بھی انسان کو اللہ تعالیٰ سے ہر لمحہ، ہر پل اس یقین سے دعا ما نگتے رہنا چاہیے کہ اس کی دعا سنی جارہی ہے، کیونکہ ممکن اور ناممکن تو ہماری سوچوں میں ہے اللہ کے لئے تو کچھ بھی ناممکن نہیں۔