جمعرات کے روز (آج) صوبہ پنجاب کے شہر بہاولنگر سے افسوسناک خبر، عاشورہ کے موقع پر نکالے جانے والے ماتمی جلوس میں دھماکہ کے نتیجے میں 2 افراد جاں بحق اور 59 افراد زخمی ہوگئے۔
ڈان نیوز کے مطابق پنجاب کے صوبائی وزیر داخلہ راجہ بشارت نے بتایا کہ ایک مشتبہ شخص نے بہاولنگر کے علاقے مہاجر کالونی کی جامعہ مسجد کے قریب سے گزرنے والے جلوس پر دستی بم پھینکا، یہ افسوسناک واقعہ صبح 10 بجے رونما ہوا۔ بعدازاں پولیس کی جانب سے حملہ آور کو گرفتار کر لیا گیا ہے۔
اس موقع پر صوبائی وزیر نے مزید بتایا کہ دھماکہ کے نتیجے میں زخمی ہونے والوں کو بہاولپور کے وکٹوریہ اسپتال منتقل کیا گیا، جن میں دو افراد کی حالت انتہائی تشویشناک ہے۔ ساتھ ہی واقعے کے فوری بعد رینجرز کو علاقے میں تعینات کر دیا گیا ہے جبکہ واقعے کی مزید تحقیقات کی جا رہی ہے۔
قبل ازیں سوشل میڈیا پر وائرل ہونے والی ویڈیوز میں جائے وقوع پر پولیس اور امدادی کارکنان کو زخمیوں کو ہسپتال منتقل کرتے ہوئے دیکھا جاسکتا ہے۔ مذکورہ ویڈیوز میں متعدد زخمی افراد کو بھی دیکھا جا سکتا ہے، جو مدد کے لیے پُکار رہے ہیں۔
اس حوالے سے بات کرتے ہوئے شیعہ رہنما خاور شفقت نے ایسوسی ایٹڈ پریس (اے پی) کو بتایا کہ دھماکہ اس وقت ہوا، جب جلوس شہر کے مہاجر کالونی محلے سے گزر رہا تھا۔ انہوں نے حملے کی مذمت کی اور حکومت پر زور دیا کہ وہ ملک میں جاری عاشورہ کے جلوسوں میں سیکورٹی مزید بڑھائی جائے۔
دوسری جانب پاکستان پیپلز پارٹی (پی پی پی) سے تعلق رکھنے والی سینیٹر سحر کامران نے بھی واقعے کی ایک ویڈیو کو شیئر کرتے ہوئے، اس پر افسوس کا اظہار کیا اور بتایا کہ ماتمی جلوس کو کریکر کے ذریعے نشانہ بنایا گیا۔
انہوں نے واقعے پر افسوس کا اظہار کرتے ہوئے دھماکے میں زخمی ہونے والے افراد کی صحت یابی کے لیے دعا بھی کی۔
واضح رہے بہاولنگر سمیت پورے ملک میں یوم عاشور کے موقع پر سیکورٹی کے پیش نظر موبائل فونز سروسز کو معطل رکھا گیا، تاکہ کسی بھی ناخوشگوار واقعے سے بچا جاسکے۔ البتہ خبریں زیر گردش ہیں کہ دھماکے کے بعد موبائل فونز سروس بند ہونے کی وجہ سے رابطے کرنے میں مشکلات کا شامنا کرنا پڑا۔
یاد رہے ہر سال محرم الحرام کی 10 تاریخ کو پورے ملک میں نواسہ رسول صلی اللہ علیہ وسلم اور ان کے ساتھیوں کی عظیم قربانی کی یاد میں جلوس برآمد کئے جاتے ہیں۔
Story Courtesy: Dawn
0 Comments