بدلتے موسم میں اپنی صحت کا خیال کیسے رکھیں؟

نومبر شروع ہوتے ہی ملک میں موسم کی رُت بدلنا شروع ہوگئی ہے،صبح میں خشک ہوائیں، دوپہر میں قہر ڈھاتی گرمی جبکہ شام میں ٹھنڈی ہوانے شہر میں بسیرا کرلیا ہے۔ ایسے موسم میں کھانسی، نزلہ زکام اور جلد کی بیماریاں عام ہوتی جارہی ہیں،لہٰذا روزمرہ روٹین میں چند احتیاطی تدابیر اختیار کرکے ہم اپنی صحت کا خیال رکھ سکتے ہے، کیسے؟ آئیے جانتے ہیں؛

خشک میوہ جات

موسم سرما کے علاوہ موسم گرما میں بھی خشک میوا جات کا استعمال بہت مفید ہے ذہنی نشونما کیساتھ ساتھ جسمانی توانائی کیلئے بھی اہم سمجھا جاتا ہے۔ بادام، پستہ،اخروٹ، کاجو، مونگ پھلی، چلغوزے، خوبانی، ناریل، کشمش، انجیر اور دیگر غذائیت سے بھرپور ہوتے ہیں، جو جسمانی وزن کو کم اور کولیسٹرول کو نارمل رکھتا ہے اس کے علاوہ دل کے امراض کے لئے بھی مفید ہے۔ بادام اور کاجو کے تیل کو چہرے پر لگانے سے چہرہ تروتازہ ہوجاتا ہے۔

پھل اور سبزیاں

موسم کے بدلتے رنگ کے لئے قدرت نے موسمی پھل اور سبزیاں بھی عطا کی ہیں جن کو کھا کر ہم مختلف بیماریاں کولیسٹرول، دل کے امراض، موٹاپے اور جگر کے امراض سے بچ سکتے ہیں۔ جبکہ پھل اور سبزی کے استعمال سے پانی کی کمی بھی دور ہوتی ہے وہیں مکمل انرجی بھی ملتی ساتھ ان سے چہرہ بھی سرسبزو شاداب رہتا ہے۔

سوپ اور یخنی

بدلتے موسم میں اکثر وائرل انفیکشن کے باعث لوگوں میں بخار، گلے کی سوزش، زکام، ناک کا بند ہوجانا، سر درد، جسم میں درد کی شکایت عام ہوجاتی ہے خاص طور پر بچے اور معمر حضرات اس کیفیت سے متاثر ہوتے ہیں، ان کیفیت سے بچنے کے لئے چکن اور مختلف سبزیوں کی گرم یخنی اور سوپ کو اپنے کھانے میں شامل کرنا چاہیے۔ جس سے گلے اور جسم کے درد میں آرام آتا ہے، بند ناک کھول جاتی ہے جبکہ ساتھ ہی زکام کے ددوران راحت و سکون کی نیند بخشتی ہے جبکہ زکام کے باعث جمے بلغم کو بھی خارج کرنے میں مدد دیتی ہے۔

دودھ اور انڈے

اس موسم میں چند بنیادی بیماریوں سے بچنے کے لیے انڈوں کا استعمال ضروری ہے۔ ایک ایسا پروٹین ہے جو جسم کے اندر اینٹی باڈیز بنانے کے کام آتا اور مدافعتی نظام کو مضبوط کرتا ہے۔انڈوں میں وٹامن ڈی کی وافر مقدار پائی جاتی ہے، سردی کے موسم میں دھوپ کم ہونے کی وجہ سے وٹامن ڈی کی کمی ہو جاتی ہے جس کی وجہ سے ہڈیوں اور جوڑوں میں درد کی شکایت بڑھ جاتی ہے۔ دودھ ایک مکمل غذا ہے، جس میں کیلشیئم، پروٹین، وٹامن (اے، کے اور بی 12)، امائنو ایسڈز، فائبر، سوڈیم اور دیگر خصوصیات شامل ہیں جو جسم کو توانائی بخشنے میں اہم کردار ادا کرتی ہیں۔

شہد

شہد انسان کے لئے قدرت کی عطا کردہ بیش بہا نعمت ہے جسم کو صحت مند رکھنے اور جلد کو جگمگانے کے لیے بہترین چیز ہے اور سنت نبوی میں بھی اسے بہترین قرار دیا گیا ہے۔ شہد کو گرم دودھ میں شامل کرکے موسمی اثرات سے بچا جاسکتا ہے جبکہ دیگر چیزوں جیسے لیموں ، ہلدی ،ایلوویرا میں ڈال کر جلد پر لگانے سے خشک جلد سے بھی نجات ملتی ہے۔

گرین ٹی

گرین ٹی مشروبات میں آل راؤنڈر کی حیثیت رکھتا ہے، ذہنی سکون کیساتھ ساتھ یہ آپ کی جلد کو گہرے سیاہ دھبوں سے بچاتا ہے اور جلد کی تازگی کو بڑھاتا ہے۔ گرین ٹی میں شامل اینٹی آکسائیڈنٹس اجزاء کیل مہاسوں کا خاتمہ کرتا ہے جبکہ جلد کو چکنا بنانے میں بھی اہم کردار ادا کرتا ہے۔ گرین ٹی کیساتھ ادرک کے استعمال سے بند ناک کھول جاتی ہے جبکہ کھانسی میں بھی آرام آتا ہے۔جنہیں زکام کی شکایت ہو ان کو بھی گرین ٹی راحت بخشتی ہے۔

مزید پڑھیں: مشروم کے ذریعے ڈپریشن کا علاج کیا جاسکتا ہے، تحقیق

پانی

پانی زندگی کی بنیاد ہے اور اس میں صحت کے حوالے سے بھی بہت سے فوائد چھپے ہوئے ہیں۔ زیادہ پانی پینے سے انسان گردوں کی بیماری سمیت مختلف بیماریوں سے دور رہتا ہے جبکہ زیادہ پانی پینے سے جسم میں توانائی کی مقدار برقرار رہتی ہے اور چہرہ شاداب رہتا ہے۔