رکن قومی اسمبلی اور ٹی وی میزبان ڈاکٹر عامر لیاقت حسین براہِ راست رمضان ٹرانسمیشن میں اپنی مذہبی گفتگو، گیم شو میں معلوماتی اور مزاحیہ گفتگو جبکہ حالات حاضرہ کے پروگرام میں اپنی میزبانی سے شائقین کو محظوظ کرنے کا فن بخوبی جانتے ہیں۔ یہی نہیں میزبانی کے ساتھ ساتھ وہ ایک مزاحیہ ٹیلی فلم میں اپنی اداکاری کی صلاحیتوں کا لوہا بھی منواچکے ہیں۔ آج کل وہ ہمیں ٹی وی اسکرین پر ایک نئے رئیلٹی شو کی میزبانی کرتے نظر آرہے ہیں جو بھارت کے متنازع ترین ریئلٹی شو “بگ باس” کی طرز کا شو ہے جو نجی ٹی بول ٹی وی پر آن ائیر ہورہا ہے اور اس کا نام “بول ہاؤس”ہے۔
جیسکہ رمضان کی آمد آمد ہے اور ہر سال ہی عامر لیاقت حسین رمضان ٹرانسمیشن کی میزبانی کرتے ہیں مگر کچھ ماہ قبل دئیے گئے ان کے بیان کے مطابق ایک بین الاقوامی پراجیکٹ میں مصروف ہونے کی وجہ سے انہوں نے ابھی تک رمضان ٹرانسمیشن کی میزبانی کرنے کا فیصلہ نہیں کیا ہے۔
تاہم حال ہی میں عامر لیاقت حسین نے اپنی سابق بیوی بشریٰ اقبال کو رمضان ٹرانسمیشن کی مبارکباد دی ہے اور اس انسٹا اسٹوری کا ایک اسکرین شاٹ سوشل میڈیا پر وائرل ہورہا ہے جس میں عامر لیاقت اور ان کی پہلی اہلیہ سیدہ بشریٰ اقبال کی ایک پرانی تصویر لگی ہوئی ہے اور ساتھ میں عامر لیاقت کا پیغام درج ہے۔
مذکورہ پیغام میں عامر لیاقت نے سیدہ بشری اقبال کو ان کی آنے والی رمضان ٹرانسمیشن کی مبارکباد دی ہے۔ یہ اسکرین شاٹ پورے سوشل میڈیا پر وائرل ہے لیکن عامر لیاقت کی انسٹا اسٹوری پر موجود نہیں ہے۔ واضح رہے کہ سیدہ بشریٰ اقبال نجی ٹی وی چینل پر رمضان ٹرانسمیشن کی میزبانی کریں گی اور اس بات کا انکشاف انہوں نے اپنے سوشل میڈیا اکاؤنٹ انسٹاگرام پر ایک پوسٹ کے ذریعے کیا تھا جس کی کیپشن میں انھوں نے لکھا کہ ”لندن کی فضاؤں ایک اور خوشخبری آپ سب کے لیے بہت جلد رمضان میں ملاقات ہورہی ہے انشااللہ۔ میں کس چینل پر آ رہی ہوں یہ جاننے کے لیے آپ کو میرے ساتھ جڑے رہنا ہوگا”۔ انہوں نے اپنے اس پیغام میں چینل کا نام نہیں بتایا تھا۔
یاد رہے کہ گزشتہ دنوں عامر لیاقت نے اپنی تیسری شادی کا اعلان انسٹاگرام پوسٹ کے ذریعے کیا تھا۔ اپنی پوسٹ میں انہوں نے لکھا ہے کہ گزشتہ شب میرا نکاح 18 سالہ سیدہ دانیہ شاہ سے ہوا ہے۔ ان کا تعلق لودھراں کے مہذب گھرانے سے ہے اور وہ سرائیکی ہیں اور بہت پیاری اور سادہ ہیں۔انہوں نے لکھا کہ میری اپنے تمام چاہنے والوں سے درخواست کی ہے کہ پلیز ہمارے لیے دعا کریں، میں ابھی ایک تاریک راہ سے گزرا ہوں جو میرے لیے ایک براموڑ ثابت ہوا۔
اس سے قبل عامر لیاقت حسین نے اپنی پہلی بیوی سیدہ بشریٰ کو طلاق دیکر سیدہ طوبیٰ سے شادی کی تھی جنہوں نے چند دن پہلے ان سے خلع لیا اور اپنی پوسٹ میں میڈیا اور مداحوں سے اپیل کی کہ ان کے مشکل وقت کا بھرم رکھ کر ان کی پرائیویسی کا بھی خیال رکھا جائے۔ عامر لیاقت کے طوبیٰ سے کوئی بچے نہیں تاہم پہلی بیوی سے عامر لیاقت کے دو بچے ایک بیٹا اور بیٹی ہے۔
0 Comments