حالیہ دنوں میں لاہور کے مقامی ہوٹل میں ہونے والے برائیڈل ویک کے آخری روز ماڈلز نے ریمپ پر خوب جلوے بکھیرے جبکہ اداکاراؤں کی انٹری نے اس ایونٹ کو چار چاند لگادیئے۔ پاکستان شوبز انڈسٹری کی اداکارہ علیزے شاہ نے بھی اس ایونٹ میں شرکت کی اور مشہور ڈیزائنر نسا حسین کا تیار کردہ عروسی لباس پہن کر “شو اسٹاپر “کے طور پر ریمپ پر انٹری دی۔ اداکارہ کے ہمراہ گلوکار شازیہ منظور اپنا گانا ”چن میرے مکھنا“ گاتی ہوئی آئیں، علیزے نے واک کرتے ہوئے گلوکارہ کے ساتھ ریمپ پر زبردست ڈانس بھی کیا جس پر شرکاء نے انہیں خوب داد دی۔
تاہم ریمپ پر سے واپس جاتے ہوئے علیزے اور شازیہ منظور بے دہانی میں غلط سمت میں موڑ گئیں اور جب شازیہ منظور ان کو پکڑ کر درست سمت میں لیجانے لگیں تو علیزے اپنا توازن برقرار نہ رکھ سکیں اور پھسل کر گر پڑیں جبکہ شازیہ منظور نے علیزے کو سہارا دے کر اٹھایا اور ان کی ہمت بڑھائی۔
فیشن شوز چاہے مقامی ہوں یا بین الاقوامی ریمپ پر واک کے دوران اکثر ماڈلز کے گرنے اور پھسلنے کے واقعات رونما ہوتے رہتے ہیں لیکن جس طرح علیزے شاہ ریمپ پر گریں اور شازیہ منظور ان کو گود میں اٹھا کر ان کی ہمت بڑھائی ایسا شاذو نادر ہی دیکھنے میں آتا ہے۔
دوسری جانب ، برائیڈل ویک میں علیزے شاہ کے ریمپ پر گرنے کی یہ ویڈیو سوشل میڈیا پر آتے ہی وائرل ہوگئی، اس ویڈیو پر اداکارہ کے مداحوں نے تو ان کے ساتھ ہمدردی دیکھائی تاہم ناقدین نے طنزیہ اور مزاحیہ تبصرے کئے۔
البتہ مذکورہ ویڈیو وائرل ہونے کے بعد اب علیزے شاہ نے اس واقعے کی وضاحت کردی ہے اور ان کا کہنا ہے کہ دراصل ان کے اور شازیہ منظور کے درمیان کنفیوژن تھی، جس وجہ سے وہ گر پڑیں۔ انہوں نے انسٹاگرام پر ایک پوسٹ شیئر کی ہے، جس میں لکھا کہ وہ رات جذبات سے بھری ایک رولر کوسٹر تھی۔
مزید پڑھیں: علیزے شاہ نے یاسر نواز کے علاوہ ہمایوں سعید سے بھی بدتمیزی کی
اداکارہ نے گِرنے کے واقعے کا تذکرہ کرتے ہوئے کہا کہ اس رات ایک غلط فہمی کی وجہ سے میں پھسل بھی گئی تھی انہوں نے لکھا کہ میں بائیں طرف جا رہی تھی اور شازیہ منظور نے سوچا کہ ہمیں دائیں طرف جانا ہے جس کی وجہ سے ہم دونوں میں ایک غلط فہمی ہوئی اور جس وجہ سے میں پھسل گئی۔
اداکارہ نے شازیہ منظور کی تعریف کرتے ہوئے لکھا کہ اس واقعے کے بعد شازیہ منظور نے مجھے پیار سے اٹھایا اور میرا حوصلہ بڑھایا۔ انہوں نے امر خان سمیت ساتھی ماڈلز کی حوصلہ افزائی کرنے پر بھی شکریہ ادا کیا۔ پوسٹ میں علیزے شاہ نے لکھا کہ زندگی اسی کا نام ہے اور اس میں اتار چڑھاؤ آتے رہتے ہیں اور اگر ہم سب مل کر کر چلیں تو مثبت تبدیلیاں لائی جا سکتی ہیں۔
علاوہ ازیں ، مذکورہ فیشن ویک کی ایک اور ویڈیو سوشل میڈیا پر وائرل ہو رہی ہے، جس میں اداکارہ اشنا شاہ کو بھی لڑ کھڑاتے ہوئے دیکھا جاسکتا ہے، تاہم وہ اپنا تواز برقرار رکھنے میں کامیاب ہو جاتی ہیں۔
0 Comments