شادی کا دن ہر لڑکے اور لڑکی کے لئے خاص ہوتا ہے، آج کل اس دن کو یادگار بنانے کے لئے دولہا دلہن کے جوڑے سے لیکر شادی ہال میں ان کی منفرد انٹری تک ہر چیز کو منفرد بنانے کا شوق زور پکڑتا جا رہا ہے جبھی انٹری کے نت نئے انداز دیکھنے میں آ رہے ہیں جس کے باعث کئی شادیوں کی ویڈیوز سوشل میڈیا پر بھی وائرل ہورہی ہیں۔
حال ہی میں انسٹاگرام پر پر ایک دلہن کی ویڈیو وائرل ہوئی ہے جس میں دولہا دلہن کے بجائے دلہن کے ‘بھائیوں’ نے اپنی بہن کی انٹری کو یادگار بنادیا ہے۔
عام طور پر بہن کی شادی کے موقع پر بھائی اکثر ڈولی یا پھر پھولوں کی چادر اٹھائے اپنی بہن کی انٹری کرواتے ہیں لیکن سوشل میڈیا پر جاری ہونے والی اس ویڈیو میں بھائیوں نے اپنی بہن کی انٹری ایک نئے انداز میں کروائی، دلہن کی انٹری کے لئے راستے میں پھول بچھائے گئے اور بھائیوں نے گھٹنوں پر بیٹھ کر اپنی بہن کے قدموں کے نیچے اپنی ہتھیلیاں رکھیں جس پر پاؤں رکھتے ہوئے دلہن انٹری دے رہی ہے۔
بیشک بھائی اور بہن کا رشتہ دنیا کے بہترین رشتوں میں سے ایک ہوتا ہے جس کو لفظوں میں بیان کرنا شاید ناممکن ہے۔ اس لئے بھائیوں کی جانب سے اپنی بہن کے لیے اس بے پناہ پیار کو دیکھ کر سوشل میڈیا صارفین بھی تعریف کیے بغیر نہ رہ سکے اور انہوں نے بہن کو خوش قسمت قرار دیا ہے۔
مزید پڑھیں: شادی میں انٹری کا انوکھا انداز دولہا دلہن کو مہنگا پڑ گیا
آج کل شادی بیاہ میں دولہا دلہن کی انٹری کے یہ انداز کبھی تو ہمیں پرانے وقتوں کی یاد دلاتے ہیں تو کبھی یہ نئے اور انوکھے انداز دیکھنے والوں کو حیران کر کے رکھ دیتے ہیں۔ جیسا کہ پہلے زمانے میں دولہا گھوڑے پر سوار آکر بارات لیکر آتا تھا لیکن گزشتہ دنوں شہر کراچی میں ایسی شادی ہوئی جس میں دولہا کے بجائے دلہن گھوڑے پر آئی۔ دلچسپ بات یہ ہے کہ یہ دلہن عام دلہنوں کی طرح شرمائی گھبرائی نہیں بلکہ ‘ارتغرل غازی’ کی طرح تلوار کے سائے میں اس کا استقبال کیا گیا۔
وائرل ہونیوالی اس ویڈیو میں دلہن نے شادی میں ارطغرل غازی کے انداز میں انٹری دے کر مہمانوں کو دنگ کردیا۔ اس ویڈیو میں دلہن شادی کی تقریب میں ارطغرل غازی کی طرح گھوڑے پر انٹری دیتی ہے۔ جبکہ پس منظر میں ارطغرل غازی کا ٹائٹل سونگ بھی بج رہا ہوتا ہےاور دلہن کے اردگرد اس کے رشتے دار اور دوست ہاتھوں میں تلوار لیے بالکل ارطغرل کے سپاہی بنے ہوئے ہوتے ہیں۔
مزید پڑھیں: شادی میں دلہن کی اسلحے کے ساتھ انٹری
ارطغرل غازی سے متاثر دلہن کی اس انٹری کو صارفین کی جانب سے بے حد پسند کیا گیا تھا بلکہ اس دبنگ دلہن کے خوب چرچے بھی ہوئے تھے۔
0 Comments