’دوستی، ڈسکو دیوانے، آنکھیں ملانے والے، بوم بوم اور دل کی لگی‘ جیسے مشہور گیت گانے والی مایہ ناز پاپ گلوکارہ نازیہ حسن کی آواز کا جادو آج بھی سر چڑھ کر بولتا ہے۔ ان کی 22 ویں برسی کے موقع پر خراج تحسین پیش کرنے کے لیے میوزک اسٹریمنگ ویب سائٹ ’اسپاٹی فائے‘ نے ان کی تصویر پہلی بار امریکا کے شہر نیویارک کے شہرہ آفاق ’ٹائمز اسکوائر‘ کے بل بورڈز پر آویزاں کردی۔
‘اسپاٹی فائے‘ نے رواں برس نازیہ حسن کی برسی کے موقع پر انہیں خراج تحسین پیش کرتے ہوئے ان کی تصویر ’ٹائمز اسکوائر‘ پر آویزاں کی، جس پر میوزک اور شوبز سے وابستہ شخصیات نے میوزک ویب سائٹ کا شکریہ بھی ادا کیا۔
اسپاٹی فائے نے ٹائمز اسکوائر پر نازیہ حسن کی تصویر ’ائکول پاکستان‘ نامی منصوبے کے تحت آویزاں کیں، جسے ویب سائٹ نے رواں برس مارچ میں شروع کیا تھا۔
نازیہ حسن کی ٹائمز اسکوائر پر آویزاں کی گئی تصویر کو ان کے بھائی گلوکار زوہیب حسن نے بھی شیئر کیا۔ اس موقع پر اسپاٹی فائے نے زوہیب حسن اور ان کی بیٹیوں سے امیلیا اور آلیانہ حسن سے خصوصی گفتگو بھی کی ہے۔زوہیب حسن نے بتایا کہ نازیہ حسن ہمیشہ خود کو گلوکارہ کے بجائے سماجی کارکن سمجھتی تھیں،ان کا ہمیشہ احترام کیا جاتا تھا اور ان کا موازنہ شہزادی ڈیانا سے کیا جاتا تھا۔
اس حوالے سے زوہیب حسن نے مزید بتایا کہ وہ ہمیشہ اچھا کرنا چاہتی تھی اور اس نے بچوں کی فلاح و بہبود اور خطے میں امن کے لئے اقوام متحدہ کے ساتھ کام کیا، وہ ضرورت مند بچوں اور نوجوانوں کی مدد کرنا چاہتی تھی یہی اس کی اصل خواہش تھی اور اس نے یہ بہت خاموشی سے کیا۔انہوں نے یہ بھی بتایا کہ نازیہ نے اپنی فلاحی خدمات کسی کے ساتھ بھی شیئر نہیں کیں،حتیٰ کہ اپنے کے اپنے خاندان کے ساتھ بھی نہیں، ان کے خاندان کو انتقال کے بعد نازیہ کی خدمات کا پتہ چلا، جب ان تمام خیراتی اداروں نے آکر شکریہ ادا کیا کہ نازیہ نےاپنی تمام رائٹیز عطیہ کردی تھیں۔
یاد رہے کہ پاکستانی پاپ میوزک کی ملکہ نازیہ حسن 13 اگست 2000 کو کینسر سے زندگی کی بازی ہار گئی۔
واضح رہے کہ مارچ 2022 میں پہلی بار ’اسپاٹی فائے‘ نے ’ائکول پاکستان‘ کے نام سے گلوکاروں کی تصاویر کو ٹائمز اسکوائر پر آویزاں کرنا شروع کیا تھا اور سب سے پہلے پاکستانی نژاد امریکی گلوکارہ عروج آفتاب کی تصویر آویزاں کی گئی تھی۔ اسی سلسلے کی کڑی کے تحت اگست میں نازیہ حسین کی تصویر کو’سنگر آف دی منتھ‘ کے طور پر ’ائکول پاکستان‘ منصوبے کے بینر تلے ٹائمز اسکوائر پر آویزاں کیا گیا۔
مزید پڑھیں: نازیہ حسن کے انتقال کے 21 برس بعد بھائی زوہیب حسن کے تہلکہ خیز انکشافات
نازیہ حسن سے قبل جولائی میں گلوکارہ نتاشا بیگ ،جون میں گلوکارہ زبیری زوہا اور حدیقہ کیانی کی تصاویر کو بھی ٹائمز اسکوائر پر آویزاں کیا گیا تھا۔
0 Comments