شوبز انڈسٹری کی مقبول جوڑی یاسر حسین اور اقراء عزیز آج کل اپنے گھر آئے ننھے مہمان کبیر حسین کی دیکھ بھال میں مصروف ہیں۔ کبیر حسین کے حوالے سے یاسر حسین اپنے انسٹاگرام اکاؤنٹ پر تصویریں اور مختلف تجربات شیئر کرتے رہتے ہیں۔
حال ہی میں اقراء عزیز نے اپنے شوہر یاسر کی بیٹے کا ڈائپر اور کپڑے تبدیل کرنے کی تصویریں شیئر کیں اور بیٹے کی ذمہ داریوں میں ہاتھ بٹانے پر یاسر کو سراہا۔
سوشل میڈیا پر اقراء عزیز کی یہ پوسٹ وائرل ہوئی تو پاکستان پیپلز پارٹی کی رہنما اور رکن سندھ اسمبلی شرمیلا فاروقی نے تبصرہ کرتے ہوئے کہا اس میں فخر کرنے والی کوئی بات نہیں۔
مزید پڑھیں: یاسر حسین کا بڑا دعوی: ماضی میں ایک بھوت کے ساتھ رہ چکے ہیں
اقراء عزیز نے انسٹاگرام اکاؤنٹ پر یاسر کی تصویر شیئر کیں جس میں وہ اپنے بیٹے کبیر کے کپڑے تبدیل کررہے ہیں۔ بچے کی ذمہ داریوں میں ہاتھ بٹانے پر خوشی کا اظہار کرنے والی اقراء عزیز نے کیپشن میں لکھا کہ کام پر جانے سے پہلے پیمپر اور کپڑے تبدیل کرنے کا سیشن، اداکارہ نے بتایا کہ یاسر نے پہلی بار کبیرکے کپڑے تبدیل کیے ہیں اور مجھے ان پر فخر ہے۔
یاسر کا شکریہ ادا کرتے ہوئےاقراء نے مزید لکھا تھا، آپ نے زندگی کے اس نئے مرحلے میں میری بہت مدد کی ہے۔ ڈائپر تبدل کرنے سے لے کر میرے آرام کے دوران اسے سنبھالتے ہوئے اور مجھے ناشتہ بناکر دیتے ہوئے۔ یاسر حسین نے جواب میں پُرمزاح انداز میں لکھا کہ اگر انہیں یہ تصویر کھینچنے کا علم ہوتا تو کوئی اچھا پوزہی بنا لیتے۔
اقراء کی اس پوسٹ پر ساتھی اداکاروؤں نے تو ان کی جوڑی کو خوب سراہا لیکن شرمیلا فاروقی نے ان خصوصیات کو ہر اچھے باپ کی پہچان بتاتے ہوئے اقراء پر یہ بات واضح کردی کہ اس میں فخر کرنے والی کوئی بات نہیں۔
شرمیلا فاروقی نے لکھا کہ مجھے خوشی ہے کہ آپ کا شوہر کام کررہا ہے لیکن اس میں فخر کرنے کی یا کوئی خاص بات نہیں۔ تمام اچھے شوہر اپنے بچوں کیلئے ایسا کرتے ہیں۔ میرے شوہر بیٹے کو نہلاتے، ڈائپر تبدیل کرتے اور فیڈر پلاتے ہیں۔ اگر میری طبیعت ٹھیک نہ ہو تو ہمارے بیٹے کو اس کے پری اسکول چھوڑنے جاتے ہیں اور انہیں ایسا کرنا بہت پسند ہے۔
پی پی رہنما کے مطابق بچے کی ذمہ داریاں بانٹنا والدین کا کام ہے لیکن جب باپ بچے کے بنیادی کاموں میں ماں کی مدد کرے تو کیسے اس بات کو غیر معمولی سمجھا جاتا ہے۔
اب اقراء شرمیلا فاروقی کی اس بات سے متفق ہوتی ہیں یا نہیں اس بارے میں فی الحال کچھ کہا نہیں جاسکتا کیونکہ اداکارہ کی جانب سے کوئی ردعمل سامنے نہیں آیا ہے۔
مزید پڑھیں: یاسر حسین اور نوشین شاہ آمنے سامنے بات بحث سے نکل کر شدت اختیار کرگئی
یاسر حسین نے جولائی 2019 میں ایوارڈ کی ایک تقریب کے دوران اقراء عزیز کو شادی کی پیشکش کی تھی، اس موقع پر انہوں نے اقراء عزیز کو سب کے سامنے انگوٹھی پہنائی تھی اور ان کے گال پر بوسہ بھی دیا تھا جس کے بعد دونوں پر تنقید کی گئی تھی۔ پھر اس جوڑے نے28 دسمبر 2019 کو کراچی میں شادی کی تھی اور دونوں کی شادی کے سوشل میڈیا پر خوب چرچے بھی ہوئے تھے۔
0 Comments