خواجہ سرا درزی جیا خان عمدگی سے اپنی ٹیلرنگ شاپ چلارہی ہیں

کراچی کے اہم اور مصروف کاروباری مرکز صدر میں ایک ٹیلر کی شاپ ایسی ہے جس کو کوئی مرد درزی نہیں بلکہ ایک خواجہ سرا درزن چلا رہی ہیں۔ اس درزن خواجہ سرا کا نام جیا خان ہے جنہوں نے باقاعدہ ٹیلرنگ کا کام سیکھا ہے اور بڑی تگ ودو کے بعد یہ دکان حاصل کی۔

درزن خواجہ سرا کی یہ دکان جناح کمپلیکس اپارٹمنٹس اینڈ شاپنگ مال صدر میں واقع ہے۔ 35 سالہ جیا خان کا تعلق پنجاب سے ہے، بین الاقوامی ادارے رائٹرز سے گفتگو میں انہوں نے بتایا کہ وہ گزشتہ 20 سال سے کراچی میں ہیں اور ٹیلر بننے سے قبل وہ بھی عام خوجہ سراؤں کی طرح ڈانس پرفارمنس کرتی تھیں۔ انہوں نے کہا کہ ٹیلرنگ کا کام ایسا ہے کہ عمر کے کسی بھی حصے میں سیکھا جاسکتا ہے تو میں نے کپڑے سینے کا کام پیشہ ورانہ طور پر سیکھا اور آج بطور درزن یہ کام کررہی ہوں۔جیا خان نے بتایا کہ دکان ملنے میں انہیں بہت دشواری کا سامنا کرنا پڑا، صدر میں ہر جگہ دکان کی تلاش کے لیے بھاگ دوڑ کی، لوگ پوچھتے تھے کہ آپ دکان کو کیسے سنبھالو گے اور کافی باتیں بھی بناتے تھے۔ بہرحال پھر آخر میں جاکر جناح کمپلیکس صدر میں ایک دکان مل گئی۔

چونکہ ملک میں رمضان کی آمد آمد ہے اس لئے جیا خان بھی یہ چاہتی ہیں کہ ان کا کاروبار بڑھے ۔ بطور درزی جیا خان ہر طرح کے ڈیزائن کے کپڑے سینے میں ماہر ہیں اور ان کی کسٹمر خواتین ان کی سلائی کو کافی پسند بھی کررہی ہیں، جیا خان کے لئے یہ بات خوش آئند ہے کہ ان کی سلائی کو کسٹمرز بھی بھرپور انداز سے سراہا رہے ہیں۔ ان کی ایک کسٹمر فرزانہ زاہد کا کہنا تھا کہ مرد درزی کے مقابلے جیا کو کپڑوں کا ناپ وغیرہ دینے میں دقت کا سامنا نہیں ہوتا۔ ان کا یہ بھی کہنا تھا کہ انہوں نے اپنے کپڑے بنانے کے لئے مرد کے بجائے ایک خواجہ سرا کو ترجیح دی۔

خوش قسمتی سے گزشتہ چند سالوں میں ملک میں خواجہ سراؤں کے لئے تبدیلی رونما ہوئی ہےاور خواجہ سرا ناچ گانے اور بھیک مانگنے کے بجائے اب مختلف شعبہ جات میں اپنی قابلیت دیکھا رہے ہیں۔ کوئی وکالت کے شعبے سے منسلک ہوا ہے ، کوئی مدرسے میں دینی تعلیم دے رہا ہے، تو کوئی نیوز چینل پراینکر کے فرائض سر انجام دے رہا ہے بلاشبہ یہ لوگ بھی محنت اور ہنرمندی میں عام لوگوں کی طرح مہارت رکھتے ہیں۔

خیال رہے کہ پاکستان کی پارلیمنٹ نے 2018 میں تیسری صنف کو تسلیم کیا اور ان کو بنیادی حقوق جیسے ووٹ ڈالنے اور ان کی صنف کو سرکاری دستاویزات پر منتخب کرنے جیسے بنیادی حقوق حاصل ہوئے۔ تاہم ، 2017 کی مردم شماری میں تقریباً 10،000 ٹرانس جینڈر افراد کی تعداد ریکارڈ کی گئی اگرچہ ٹرانس رائٹس گروپس کا کہنا ہے کہ 220 ملین آبادی کے ملک میں یہ تعداد بڑھ کر 300،000 سے زیادہ ہوسکتی ہے۔