کوک اسٹوڈیو Nu.WAV کا پہلا گانا ’دل‘ ریلیز، افیوسک (Afusic)اور زوہا وسیم کی آوازوں کا خوبصورت امتزاج

کوک اسٹوڈیو Nu.WAV نے اپنے سفر کا آغاز پہلے گانے ’دل‘ کی ریلیز سے کردیا، جس میں ابھرتے ہوئے گلوکار، نغمہ نگار اور ریپر افیوسک (Afusic) اور گلوکارہ زوہا وسیم نے آواز کا جادو جگایا ہے۔ محبت، مصروفیات اور زندگی کی بے شمار الجھنوں کے درمیان اپنے محبوب کی اہمیت کو اجاگر کرنے والا یہ گانا کوک اسٹوڈیو Nu.WAV کی چھ میں سے پہلی پیشکش ہے۔

’دل‘ کی تخلیق کا آغاز نہایت سادہ اور فطری انداز میں ہوا۔ پروڈیوسر علی سومرو نے گٹار بجانے سے دھن کا آغاز کیا اور محض 20 منٹ میں بیٹ کی ابتدائی شکل تیار ہوگئی۔ بعد ازاں اسی رات یہ دھن افیوسک تک پہنچی، جنہوں نے موبائل فون پر ریکارڈ کی گئی اپنی آواز کا ایک مختصر وائس نوٹ بھیجا۔ اگلی صبح تک اس ریکارڈنگ میں کسی بڑی تبدیلی کی ضرورت محسوس نہیں ہوئی۔ علی سومرو کے مطابق یہ وہ لمحہ تھا جسے ’آمد‘ کہا جاسکتا ہے، یعنی جب کوئی خیال انسان کو تلاش کرنے سے پہلے خود اس تک پہنچ جائے۔

’دل‘ ایک ذاتی اور جذباتی محبت کا گانا ہے، جس میں افیوسک کی شاعری اس خاتون سے مخاطب ہے جو کامیابی اور شہرت کے سفر سے پہلے ہی انہیں جانتی تھی۔ گانے میں اس وقت کی کیفیت کو بیان کیا گیا ہے جب کامیابی کے بعد زندگی میں بڑھتی ہوئی توجہ، مصروفیات اور بے شمار خلفشار انسان کو اپنے اصل رشتوں سے دور کرنے لگتے ہیں۔ زوہا وسیم کی آمد کے ساتھ گانا ایک مکالمے کی شکل اختیار کرلیتا ہے اور ان کی آواز رشتے کے دوسرے پہلو کو سامنے لاتی ہے۔

گانے کی ویڈیو کی ہدایت کاری کمال خان نے کی ہے، جس میں محبت اور خلفشار کے تصور کو ایک منفرد اور قدرے ماورائی انداز میں پیش کیا گیا ہے۔ کہانی روایتی ہیرو کے سفر سے متاثر ہے، جس میں افیوسک اپنے گھر واپس پہنچنے کی کوشش کرتے دکھائی دیتے ہیں، جبکہ زوہا وسیم ایک ایسی دنیا میں موجود ہیں جو لفظی طور پر الٹ چکی ہے۔ فرنیچر چھت سے لٹکا ہوا ہے اور روزمرہ استعمال کی اشیا اپنی جگہوں سے ہٹ چکی ہیں۔ دونوں کردار جب بالآخر ایک ہی کمرے میں پہنچتے ہیں تو بکھری ہوئی دنیا دوبارہ اپنی جگہ پر آجاتی ہے۔

کوک اسٹوڈیو Nu.WAV کے ایگزیکٹو پروڈیوسر کمال خان نے کہا کہ ’دل‘ کو پلیٹ فارم کے افتتاحی گانے کے طور پر پیش کرنا اس لیے موزوں ہے کیونکہ یہ اس تصور کی عکاسی کرتا ہے جس کے تحت Nu.WAV تخلیق کیا گیا ہے، جہاں فنکار اپنی ذاتی کہانی اور احساسات کو اپنی مرضی کے مطابق موسیقی میں ڈھالتے ہیں۔ ان کے مطابق گانے میں محبت کو درپیش خلفشار کو ایک منفرد بصری دنیا کے ذریعے پیش کیا گیا ہے، جبکہ افیوسک اور زوہا وسیم نے ایک ہی کہانی کے دو مختلف پہلو سامنے لائے ہیں۔

حیدرآباد سے تعلق رکھنے والے افیوسک نے آزاد اور ڈیجیٹل موسیقی کے ذریعے اپنے فنی سفر کا آغاز کیا اور اب وہ جنوبی ایشیا کی نئی پاپ اور ہپ ہاپ موسیقی کے نمایاں ابھرتے ہوئے ناموں میں شمار ہوتے ہیں۔ ان کا مقبول گانا ’Pal Pal‘ کروڑوں مرتبہ سنا جاچکا ہے جبکہ اس کی مقبولیت پاکستان سے باہر برطانیہ اور کینیڈا تک بھی پہنچی۔

دوسری جانب زوہا وسیم کلاسیکی اور غزل گائیکی کی مضبوط بنیاد رکھتی ہیں۔ لاہور میں کلاسیکی موسیقی کی پرفارمنسز کے ذریعے ابتدائی شناخت بنانے والی زوہا وسیم نے ’Majboor‘ سمیت اپنی دیگر پیشکشوں کے ذریعے ڈیجیٹل پلیٹ فارمز پر بھی تیزی سے جگہ بنائی ہے۔ ان کی موسیقی روایتی گائیکی کی تربیت کو جدید میوزک پروڈکشن کے ساتھ جوڑتی ہے۔

’دل‘ کے بول اور کمپوزیشن افیوسک اور علی رضا نے تیار کیے ہیں، جبکہ موسیقی کی ترتیب اور پروڈکشن علی سومرو نے کی ہے۔ گانے کی ماسٹرنگ شان ٹال مین نے کی۔ ویڈیو کے ڈائریکٹر آف فوٹوگرافی عامر مغل اور پروڈکشن ڈیزائن کی ذمہ داری سید حماد سہیل نے انجام دی، جبکہ منصوبے کی پروڈکشن گالی فلمز نے کی اور ایمان خان پروڈیوسر ہیں۔

کوک اسٹوڈیو Nu.WAV کی جانب سے ’دل‘ کے بعد مزید پانچ گانے اور ان سے جڑی منفرد تخلیقی دنیائیں آنے والے ہفتوں میں سامعین کے سامنے پیش کی جائیں گی۔