لیجنڈری فنکار معین اختر کا یوم پیدائش آج منایا جارہا ہے

لوگوں کے چہروں پر قہقہے بکھیرنے والے ہر دلعزیز فنکار معین اختر کا 72واں یوم پیدائش آج منایا جارہا ہے۔ ان کی سالگرہ کے موقع پر گوگل نے بھی اپنے ڈوڈل سے انہیں شاندار انداز میں خراج تحسین پیش کرتے ہوئے اپنے ویب سائٹ ڈوڈل پر ان کی تصاویر سجائیں ہیں جن میں لیجنڈ اداکار کے مختلف کردار کی تصویریں شامل ہیں۔

واضح رہے کہ ان کی سالگرہ کے دن ایک خط بھی سامنے آیا جس میں انہوں نے 44 برس قبل اپنے قریبی دوست اقبال وحید کو لکھا اور اس میں انہوں نے اپنی موت کا ذکر بھی کیا۔

اٹھارہ اگست 1977 کو لکھے گئے اس خط میں معین اختر نے اپنے دوست کو خط کے ساتھ بھیجی گئی تصویر بھی سنبھال کر رکھنے کا کہا اور لکھا: اپنے عزیز دوست اقبال وحید کے لیے، موت کا وقت؟ شاید کسی کو نہیں معلوم کہ سب کو ایک نہ ایک دن جانا ہوگا، شاید پہل ہم ہی کر بیٹھیں، اس صورت میں اس تحریر اور اس تصویر دونوں کی حفاظت کرنا جو تمہیں ہمیشہ اس مخلص کی یاد دلاتی رہے گی۔

فن کی دنیا میں معین اختر وہ نام ہے جس کے بغیر پاکستان ٹیلی ویژن اور اردو مزاح کی تاریخ نامکمل ہے۔لاجواب ڈائیلاگ ڈلیوری اور ہر کردار میں حقیقت کا رنگ بھر دینے کا فن رکھنے والے معین اختر کو اگر پاکستانی تاریخ کا سب سے ورسٹائل فنکار کہا جائے تو شاید غلط نہ ہوگا۔ انہوں نے زندگی کی پہلی پرفارمنس شیکسپیئر کے ناول سے ماخوذ اسٹیج ڈرامے ’دی مرچنٹ آف وینس‘ میں محض 13 برس کی عمر میں دی جب کہ فنی کیرئیر کی باقاعدہ شروعات پاکستان کے پہلے یوم دفاع پر 1966 میں کی۔

معین اختر نے اپنی لازوال اداکاری سے ان مٹ نقوش چھوڑے ہیں ، ڈرامہ سیریل ‘روزی’، میں وہ اپنے فن کی بلندیوں پر نظر آئے جبکہ ‘آنگن ٹیڑھا، انتظار فرمائیے، بندر روڈ سے کیماڑی ،ہاف پلیٹ اور عید ٹرین’ جیسے بے مثال ڈرامے آج بھی ان کے مداحوں کے ذہنوں میں تازہ ہیں۔

اسٹیج شوز کی بات کریں تو معین اختر کی شہرت کے چرچے نا صرف پاکستان بلکہ بھارت سمیت دنیا کے دیگر ممالک میں بھی ہوئے، ‘بڈھا گھر پر ہے، یس سر عید نو سر عید ، بے بیا معین اختر ، بکرا قسطوں پر’ معین اختر کے یادگار اسٹیج شوز ہیں۔

مزید پڑھیں: ریٹنگ نے میڈیا کی آزادی کی بربادی کردی ہے، انور مقصود

معین اختر نے 44 سال تک کامیڈی، اداکاری، گلوکاری اور پروڈکشن سمیت شوبز کے تقریباً تمام شعبوں میں ہی کام کیا معین اختر  کی خدمات کے اعتراف میں ان کو  صدارتی تمغہ برائے حسن کارکردگی سے بھی نوازا گیا۔ یہ عظیم فنکار 22 اپریل 2011ء کو اپنے کروڑوں مداحوں کو سوگوار چھوڑ کر جہان فانی سے کوچ کر گیا مگر پھر بھی اپنے مداحوں کے دلوں میں زندہ ہے۔