خاتون نے مال میں نمبر مانگنے والے نوجوان کی درگت بنادی، ویڈیو وائرل

یہ ایک حقیقت ہے کہ جنسی ہراسانی کے خلاف قانون ہوتے ہوئے بھی دفاتر ،اسکول ، یونیورسٹی ،اسپتال، مارکیٹ غرض ہر جگہ خواتین کے ساتھ ہراسانی کی وارداتیں ہوتی رہتی ہیں۔ یوں کہنا غلط نہ ہوگا کہ چار دیواری سے باہر قدم رکھتے ہی حوا کی بیٹی پر مختلف خوف کی کیفیات طاری رہتی ہیں۔ جس کی حالیہ مثال لاہور کے مال میں دیکھی گئی، تاہم خاتون کی ہمت اور بہادری سب کے لئے مثال بن کر سامنے آئی ہے۔

تفصیلات کے مطابق لاہور کے علاقے جوہر ٹاؤن کے ایک شاپنگ مال پیش آیا، ہراسانی کا ایک اور افسوسناک واقعہ، جہاں ایک شخص کی جانب سے خاتون سے موبائل نمبر مانگنے کی کوشش کی گئی، جس پر خاتون نے بدتمیز شہری پر تھپڑوں کی بارش کر دی۔ واقعے کی ویڈیو کافی وائرل ہو رہی ہے۔

سوشل میڈیا پر وائرل ویڈیو میں دیکھا جا سکتا ہے کہ ایک خاتون لاہور کے علاقے جوہر ٹاؤن میں واقع شاپنگ مال میں ایک شخص کو گریبان سے پکڑی ہوئی ہیں اور اسے ہجوم کے سامنے تھپڑ ہی تھپڑ رسید کر رہی ہیں۔

مزید پڑھیں: ہولی فیملی اسپتال کی ڈاکٹر کو ٹیکنیشن کیجانب سے ہراسگی کا سامنا

واقعے کے حوالے سے بتایا جا رہا ہے کہ یہ واقعہ لاہور ے معروف شاپنگ مال کا ہے، جہاں ایک خاتون شاپنگ کی غرض سے آئیں تھیں، جہاں ایک شخص کی جانب سے چھیڑ چھاڑ کی کوشش کی جاتی ہے، اور خاتون سے موبائل نمبر کا تقاضا کرتا ہے، جس پر خاتون کا صبر کا پیمانہ لبریز ہو جاتا ہے اور خواتین متعلقہ شخص کی سب کے سامنے درگت بنا دیتی ہیں۔

متعلقہ شخص کی اس شرمناک حرکت پر خاتون کو سیخ پا دیکھا گیا، خاتون نوجوان کو پکڑ کر کہتی ہیں، میں تمہارا منہ توڑ دوں گی، جس کے بعد خاتون کچھ زور دار تھپڑ رسید کرتی ہیں، اور پوچھتی ہیں کہ اب نمبر مانگو گے؟ اس دوران نوجوان کی جانب سے اپنے آپ کو چھڑانے کی کافی کوشش بھی کی جاتی ہیں۔

ایک جانب جہاں اس واقعے کی ویڈیو سوشل میڈیا پر کافی وائرل پے، وہیں دوسری جانب پولیس اور شاپنگ مال انتظامیہ کی جانب سے مزکورہ واقعے سے لاعلمی کا اظہار کیا گیا ہے۔ دونوں کا یہی کہنا ہے کہ انہیں ایسے کسی معاملے کی شکایات موصول ہی نہیں ہوئی ہیں۔

واضح رہے کچھ روز قبل سوشل میڈیا پر ایک ویڈیو وائرل ہوئی تھی، جس میں ایک راہ چلتی خاتون کو پی ایس او پمپ کا ملازم سڑک پر جنسی طور پر ہراساں کرتا ہے، جس پر خاتون کو شدید غصہ آتا ہے اور وہ ملزم پکڑنے کی کوشش کرتی لیکن وہ بھاگ جاتا ہے بعدازاں کچھ لوگ مشتبہ شخص کو پکڑتے ہیں اور خاتون بغیر ڈر وخوف کے چپل سے مذکورہ شخص کی درگت بناتی ہیں۔

اس ہی عرصے میں کراچی کی مصروف ترین شاہراہ شارع فیصل پر ایک خاتون ٹیچر کو ہراسگی کا سامنا کرنا پڑا تھا۔ اس ٹیچر نے فیس بک پر ایک پوسٹ کی جس میں انہوں نے دو موٹر سائیکلوں پر سوار تین اوباش لڑکوں کی تصاویر اور ویڈیوز شیئر کیں، جنہوں نے انہیں راستے میں ہراساں کرنے کی ہر ممکن کوشش کی۔ یہ لڑکے دیدہ دلیری سے ان کے رکشے کا پیچھا کرتے رہے اور چھیڑ چھاڑ، آوازیں کسنے کے ساتھ انہیں اشارے بھی کرتے رہے۔ ٹیچر نے ان لڑکوں کی ویڈیو بنائی اور اپنی پوسٹ میں اس ویڈیو کو وائرل کرنے کی درخواست بھی کی، جس کے بعد پولیس حرکت میں آئی اور ان اوباش لڑکوں کو گرفتار کرکے مقدمہ کرلیا گیا تھا۔