بھارت میں فحش ویڈیو موت کا سبب بن گئی،ماں بیٹی نے خودکشی کرلی

بھارت میں سابقہ محبوب نے سوشل میڈیا پر لڑکی کی فحش ویڈیو شیئر کردی ، شادی شدہ زندگی متاثر ہونے اور بدنامی کے خوف سے لڑکی اور اس کی ماں نے گلے میں پھندا ڈال کر خودکشی کرلی۔

یہ افسوسناک واقعہ بھارتی ریاست اترپردیش میں پیش آیا جس میں فحش ویڈیو سوشل میڈیا پر منظر عام پر آنے کی وجہ سے ایک ماں بیٹی نے انتہائی قدم اٹھاتے ہوئے گلے میں پھندا لگا کر اپنی زندگیوں کا خاتمہ کرلیا۔

تفصیلات کے مطابق ، مقامی پولیس تھانہ سے متصل ایک گاؤں میں گھر کے باہر درخت سے لٹکی ہوئی 40 سالہ والدہ اور اس کی 22 سالہ بیٹی کی لاشیں ملیں۔ اس واقعے کے بارے میں پولیس نے رپورٹ میں بتایا ہے کہ خودکشی کرنے والی لڑکی کی دسمبر میں شادی ہوئی تھی۔ تاہم ، اس لڑکی کا سابقہ دوست ، جس کا نام ستیام ہے وہ اس کو شادی کے بعد بھی ہراساں کرتا تھا۔ 22 مارچ کی رات میں ستیام نے لڑکی کو اپنی اور اس کی ایک فحش ویڈیو بھیجی ، پھر اس نے یہ ویڈیو کلپ سوشل میڈیا پر شیئر کرنے سے پہلے لڑکی کے شوہر کو بھی بھیج دی۔

اس حوالے سے پولیس کا کہنا ہے کہ ملزم لڑکی کو مستقل بلیک میل کررہا تھا اور کہتا تھا کہ وہ اس کے شوہر کو ان کے سابقہ تعلقات کے بارے میں سب کچھ بتادے گا۔ ملزم نے لڑکی کے ساتھ بدتمیزی بھی کی اور اسے فحش ویڈیو بنانے پر مجبور کیا۔ اس کے بعد ملزم نے ویڈیو کے ذریعے لڑکی کو بلیک میل کرنا شروع کردیا اور لڑکی کو زبردستی اپنے ساتھ رہنے پر بھی مجبور کررہا تھا۔ جب لڑکی نے اس کے ساتھ رہنے سے انکار کردیا تو اس نے ویڈیو کلپ اس کے شوہر کو بھیج دی۔

پولیس نے مزید بتایا کہ اس ویڈیو کلپ کی وجہ سے اس لڑکی کے اپنے شوہر سے تعلقات متاثر ہوئے اور دو دن تک لڑکی اور اس کی والدہ گھر سے باہر نہیں نکلیں اور دو دن کے بعد ان کی لاشیں ملیں۔ ملزم ستیام پر جرم ثابت ہوگیا ہے اور وہ اس وقت پولیس کی تحویل میں ہے۔

سوشل میڈیا کے اس دور میں نجی ویڈیوز لیک کرنا، ان ویڈیوز کے ذریعے بلیک میل اور ہراساں کرنے کے واقعات بڑھتے ہی جارہے ہیں اور یہ واقعات صرف ہندوستان اور پاکستان تک محدود نہیں بلکہ پوری دنیا میں اس طرح کے واقعات رپورٹ ہورہے ہیں۔ نجی وذاتی لمحات کی تصاویر کے ساتھ بلیک میل کرنا جنسی تشدد کی ہی ایک قسم ہے جو متاثرہ خواتین کو عزت کی پامالی اور معاشرتی رویوں کے خوف کے باعث خودکشی جیسے انتہائی اقدام کی جانب راغب کرتی ہے۔

حال ہی میں بھارت میں ایک شوہر نے بیوی کو ذبح کر کے سر اُس کے مبینہ عاشق کے دروازے پر رکھ دیا۔ بھارتی میڈیا کے مطابق ریاست تلنگانہ میں ایک بیوی دوسرے گاؤں کے رہائشی شخص کے عشق میں مبتلا تھی اور اس کے غیر ازدواجی تعلقات قائم تھے جس کی وجہ سے شوہر اور بیوی کے درمیان روز تلخ کلامی ہوتی تھی۔ ایک دن شوہر نے کلہاڑی سے اپنی بیوی کا سر تن سے جدا کردیا اور موٹر سائیکل پر سر کو 5 کلومیٹر کی دوری پر لے جاکر دوسرے گاؤں میں بیوی کے مبینہ عاشق کے دروازے پر رکھ دیا۔

پولیس نے کارروائی کی تو بیوی کی سربریدہ لاش گھر کے قریبی جھاڑیوں سے مل گئی جب کہ سر دوسرے گاؤں سے برآمد ہوا ۔قاتل شوہر نے بھی بعد میں پولیس اسٹیشن پہنچ کر گرفتاری دے دی۔

اس کے علاوہ گزشتہ دنوں بھارتی خاتون عائشہ کی موت نے ہر آنکھ اشکبار کردی ۔بھارتی ریاست احمد آباد سے تعلق رکھنے والی عائشہ جو کہ 23 سال کی شادی شدہ خاتون تھی ، شوہر کی لاتعلقی اور آئے دن سسرالیوں کے جہیز کے مطالبہ سے دلبرداشتہ ہوکر اس نے نہر میں کود کر اپنی جان دے دی ۔لیکن موت سے قبل بنائے جانے والی عائشہ کی ویڈیو سوشل میڈیا پر وائرل ہوگئی اور اس ویڈیو نے طوفان برپا کردیا۔ صارفین نے عائشہ کی موت پر شدید غم وغصے کا اظہار کیا جس پر بھارتی پولیس نے فوری ایکشن لیتے ہوئے عائشہ کے شوہر کو گرفتار کرلیا۔