فلائٹ کے دوران کھانے میں سانپ کا کٹا ہوا سر نکل آیا، ویڈیو وائرل

کیا آپ نے کبھی ایسا سوچا ہے کہ آپ ائیر لائن میں سفر کر رہے ہوں اور آپ کے سامنے کھانا سرو ہو مگر جوں ہی آپ کھانا کھانا شروع کریں تو اس کھانے میں سانپ کا کٹا ہوا سر نکل آئے تو ایسے میں آپ کیا کرینگے؟ ایسا سوچ کر ہی کراہیت محسوس ہونے لگتی ہے، لیکن آپ کو یہ جان کر تعجب ہوگا کہ ایسا حقیقت میں ایک مسافر کے ساتھ ہوا ہے۔یہ واقعہ ترکی سے جرمنی جانے والے ایک فلائٹ کے دوران پیش آیا جس پر  ایئرلائن نے تحقیقات شروع کردیں۔

غیر ملکی میڈیا کے مطابق ہوائی سفر کے دوران کھانے میں سانپ کا کٹا ہوا سر نکلنے کا واقعہ ترکی سے جرمنی جانے والی پرواز کے مسافر کیساتھ پیش آیا۔ ایئرلائن کی فراہم کردہ کھانے  کو مسافر نے کھانا شروع کیا تو پلیٹ میں سانپ کا کٹا ہوا سر دیکھ کر دنگ رہ گیا۔ مسافر نے ایئرلائن انتظامیہ کی غفلت کو آشکار کرنے کیلئے واقعے کی ویڈیو بنائی اور سوشل میڈیا پر شیئر کردی، جس میں سانپ کا سر آنکھیں اور چہرہ واضح طور پر دیکھا جاسکتا ہے۔

واقعے کی اطلاع ہوتے ہی ایئرلائن سن ایکسپریس نے نیوز ویب سائٹ کو بتایا کہ فضائی سفر کے دوران مسافروں کو بہترین سروس فراہم کرنا ایئرلائن کی پہلی ترجیح ہے۔ فضائی کمپنی کے ترجمان کا کہنا تھا کہ چاہے مسافر ہو یا طیارے کا عملہ، ہماری کوشش ہوتی ہے کہ دونوں کو آرام دہ سفر فراہم کریں۔ ترجمان نے کھانے میں سانپ کا سر نکلنے کے الزامات کی تردید کرتے ہوئے کہا کہ جہاز کے کھانے میں سانپ کا سر نکلنا ناقابل قبول ہے۔

دوسری جانب، پرواز میں کھانا فراہم کرنے والی کیٹرنگ کمپنی نے اس دعوے کو مسترد کردیا، کمپنی ترجمان کا کہنا ہے کہ اس بات میں کوئی صداقت نہیں۔ تاہم صورتحال کا سختی سے نوٹس لیتے ہوئے ایئرلائن نے فوڈ سپلائی کرنے والی کمپنی کے ساتھ معاہدہ معطل کردیا اور واقعے کی تحقیقات بھی شروع کر دی گئی ہیں۔ جبکہ سماجی رابطے کی ویب سائٹ ٹویٹر پر شیئر کی گئی اس واقعے کی ویڈیو میں سانپ کا سر کھانے کی ٹرے کے درمیان پڑا ہوا دکھایا گیا ہے۔ مذکورہ ویڈیو سوشل میڈیا پر وائرل ہوگئی اور صارفین نے اس پر اپنے خیالات کا کھل کر اظہار کیا۔

اس سے قبل بھی جنوبی امریکی کے ملک بولیویا میں ایک خاتون نے فاسٹ فوڈ ریسٹورنٹ سے برگر خریدا جس میں سے گلی سڑی انسانی انگلی برآمد ہوئی تھی۔ برطانوی میڈیا کے مطابق بولیویا کے شہر سانتا کروڈی لاسیئرا کی رہائشی خاتون اسٹیفنی بینتیز نے بتایا کہ انہوں نے ایک ریسٹورنٹ سے ہاٹ برگر خریدا اور جب ایک لقمہ لیا تو برگر میں بدبو محسوس ہوئی جب لقمے کو منہ سے نکال کر دیکھا تو اس میں گوشت کا ایک ایسا ٹکڑا موجود تھا جس سے بدبو آرہی تھی۔ خاتون نے جب باقی برگر کھول کر دیکھا تو اس میں گلی سڑی ایک انسانی انگلی موجود تھی اور لقمہ لینے سے اسی انگلی کا ایک حصہ کٹ کر ان کے منہ میں چلا گیا تھا۔

خاتون نے اس ہولناک واقعے کی اطلاع فوراً ریسٹورنٹ کے مینیجر کو دی اور فیس بک پر بھی اس واقعے کے بارے میں پوسٹ کی جس میں لکھا کہ ’برگر کھاتے ہوئے میں نے انسانی انگلی بھی چبالی’۔انہوں نے اپنی پوسٹ میں برگر سے نکلنے والی انگلی کی تصویر اور ویڈیو بھی شیئر کی۔اس ویڈیو میں انہیں برگر شاپ کے مینیجر سے گفتگو کرتے ہوئے دکھایا گیا ہے جو انہیں کہہ رہے ہیں کہ ’مجھے بتائیے آپ کو کیا چاہیے وہ ہم آپ کو دے دیںنگے’۔یہ ویڈیو سوشل میڈیا پر وائرل ہوگئی جسے 60 ہزار سے زائد افراد نے دیکھا۔تاہم، خاتون کی شکایت پر جب ریسٹورنٹ کی انتظامیہ نے کان نہیں دھرے تو انہوں نے پولیس کو اطلاع دی۔