اداکارہ اشنا شاہ ائیرپورٹ افیسر کے بغیر اجازت چھونے پر سخت برہم

معروف اداکارہ اشنا شاہ سوشل میڈیا پر شئیر کردہ پوسٹ میں کراچی کے جناح انٹرنیشنل ائیرپورٹ کی انتظامیہ پر رضامندی کے بغیر چھوئے جانے پر سخت برہم، پرسنل اسپیس میں مداخلت قرار دے دیا۔

تفصیلات کے مطابق اداکارہ اشنا شاہ اکثر وبیشتر آبسیسو کمپلسو ڈس آرڈر (او سی ڈی) سے متعلق اپنے خیالات کا اظہار کرتی رہتی ہیں کہ کس طرح یہ متاثرہ لوگوں کی روزمرہ زندگی کو متاثر کر دیتا ہے۔

اس ہی سلسلے میں سماجی رابطے کی ویب سائٹ ٹوئیٹر پر جاری بیان میں اداکارہ اشنا شاہ سخت غصے میں نظر آئیں، انہوں نے جناح ائیرپورٹ پر ہونے والے ناخوشگوار واقعے کی طرف روشنی ڈالی اور سیکیورٹی پر مامور اہلکاروں کے غیر صحتمندانہ رویے کی نشاندہی کی۔

اداکارہ اشنا شاہ کا کہنا تھا کہ کیا ہے لوگوں کے ساتھ چھونے کا معاملہ، دوسرے لوگوں کو بغیر اجازت۔ یہ کیسے ٹھیک ہے کہ کراچی ائیرپورٹ کے سیکیورٹی آفیسر کیلئے کہ وہ چھوئے اور بغیر کسی دستانوں اور ہاتھوں کو سینیٹائز کئے بغیر ان کے بالوں پر ہاتھ پھیرے، او سی ڈی ایک حقیقت ہے، اس عمل کے باعث وہ ہل رہی ہیں اور انہیں کراہت محسوس ہو رہی ہے۔

اس موقع پر جب اداکارہ کی جانب سے تمام ماجرے کا احوال بیان کیا تو کئی دیگر سوشل میڈیا صارفین کی جانب سے اشنا شاہ کی بات سے بالکل اتفاق کیا، صارفین کا ماننا تھا کہ انہیں بھی ائیرپورٹ پر سیکیورٹی چیک کے دوران اس اذیت کا سامنا کرنا پڑھتا ہے تاہم ایک صارف نے جہاں اسے ایک حقیقت قرار دیا وہیں انکشاف کیا امریکی ائیرپورٹ سیکیورٹی چیک اسے سے بھی کہیں زیادہ بدتر ہے۔

اس دوران ایک اور صارف نے انکشاف کیا کہ کس طرح انہیں خاص طور پر ڈیوٹی پر موجود سیکیورٹی آفیسر کو اپنے ہاتھوں کو صاف کرنے اور دستانے پہننے کی یاد دلانی پڑی، بصورت دیگر، وہ ناقص حفظان صحت کے ساتھ جاری رہتے ہیں۔

اگر آپ او سی ڈی سے ناواقف ہیں، تو یہ یاد رکھیں یہ دراصل ذہنی بیماری یا کیفیت ہے، جس میں مبتلا شخص کسی بھی ان چاہی چیز یا رویے سے ذہنی پریشانی کا شکار ہوسکتا ہے، یعنی اگر کوئی شخص کسی انجان شخص کے ہاتھ ملانے یا دوسروں کے قریب جانے سے دور رہنا چاہتا ہے تو ایسے شخص کے قریب جانے یا اسے کسی دوسرے کی جانب سے چھونے سے وہ ذہنی اذیت کا شکار بن سکتا ہے۔ او سی ڈی میں مبتلا بعض افراد بار بار وہی چیزیں بھی دہراتے ہیں یا بار بار کسی ایک شے کو چھوتے بھی رہتے ہیں۔

خیال رہے اس سے قبل اشنا شاہ ایک پیغام میں اپنے ساتھ شاپنگ مال میں پیش آئے واقعے کا ذکر کیا تھا۔ جس میں ایک اجنبی خاتون نے ان سے ملنے کے لیے ان کے بالوں کو چھُوا جس سے ان کا پورا دن خراب ہوگیا۔ اداکارہ کے مطابق اس بات کا اندازہ یقیناً ان خاتون کو نہیں ہے۔ اگر وہ آنٹی ان کے چہرے کو چھُوتیں تو یقینی طور پر ان کا پورا ہفتہ خراب ہوجاتا۔

یاد رہے اداکارہ اشنا شاہ سوشل میڈیا ٹرولنگ کو لیکر ہمیشہ سے کافی سنجیدہ رہی ہیں، انہوں حال ہی اس حوالے سے موقف اپنایا تھا کہ ادب و آداب اور اپنی اخلاقیات کا خیال رکھنے والا ہر پاکستانی جو اداکاری کے شعبے اور اداکاروں کو کم تر سمجھتا ہے، اور یہ سمجھتا ہے کہ اداکارائیں فحاشی پھیلاتی ہیں وہ ٹی وی دیکھنا چھوڑ دیں۔