سردیوں میں خشکی سے کیسے چھٹکارا پائیں؟

موسم سرما میں جہاں نزلہ، زکام، کھانسی، بخار سمیت دیگر بیماریوں کا حملہ ہوتا ہے تو وہیں ہماری چہرے اور سر کی جلد بھی خشکی اور مختلف مسائل کا شکار ہوجاتی کیونکہ اس موسم میں ہماری جلد کو مناسب نمی کی ضرورت ہوتی ہے اور اگر کسی وجہ سے نمی کی مناسب مقدار جلد کو میسر نہ ہو تو اس کی ساخت خشک ہوجاتی ہے۔اس سلسلے میں خصوصی احتیاط اور بروقت علاج کرنے کی ضرورت ہوتی ہے ورنہ جلد بے رونق اور روکھی جبکہ سر میں خشکی ہوجاتی ہے۔

لہٰذا اس مسئلے سے بچنے کے لئے ذیل میں ہم آپ کو جلد کی خشکی دور کرنے کے چند موئژ حل بتائیں گے جن پر عمل کرکے آپ کو فائدہ ہوگا۔

زیتون کا تیل

موسم سرما میں زیتون کے تیل کی مالش کرنا صدیوں پرانا ٹوٹکا ہے، زیتون کے تیل سے سر کی مالش کریں اور سر کو کسی کپڑے یا تولیے سے ڈھانپ کر سوجائیں یا پھر نہانے سے قبل اس تیل سے جلد پر مالش کریں۔ اس کے علاوہ نہانے کے فوراً بعد پورے جسم پر زیتون کا تیل لگا لینے سے بھی خشکی سے کافی حد تک نجات ملتی ہے۔

ناریل کا تیل

ناریل کا تیل جلد اور سر کی خشکی دور کرنے کا آزمودہ اور موثر علاج ہے ، سرد موسم میں جلد اور سر کو خشکی سے بچانے کے لیے نہانے سے کچھ دیر قبل چار سے پانچ چائے کے چمچ نیم گرم ناریل کے تیل سے بالوں اور جسم کی مالش کرلیں اور پھر اس کے بعد کسی اچھے شیمپو اور صابن سے نہالیں۔کوشش کریں کہ ایسا صابن اور شیمپو استعمال کیا جائے جس کے اجزا میں ناریل کے تیل کی خصوصیات پائی جاتی ہوں۔

ٹی ٹری آئلٹی ٹری آئل

یہ آئل ورم کش اور جراثیم کش ہوتا ہے جو کہ بالوں میں خشکی اور خارش کی شکایت پر قابو پانے میں مدد دیتا ہے۔ یہ وائرسز اور فنگل سے بھی لڑتا ہے جو کہ خشکی اور سر میں خارش کا باعث بنتے ہیں۔ ٹی ٹری آئل کے چند قطرے اپنے پسندیدہ شیمپو میں ملائیں اور اس عمل کو اس وقت تک دہراتے رہے جب تک خشکی اور خارش ختم نہیں ہوجاتی، گھر میں استعمال ہونے والا عام موسچرائزر میں ملا کر بھی اس کا استعمال جلد پر کیا جاسکتا ہے۔

شہد

شہد کھانے کے علاوہ جلد کی نمی کے لئے بھی استعمال کیا جاتا ہے کیونکہ یہ ایک بہترین قدرتی موئسچرائزر ہے۔ سردیوں میں جلد کی خشکی کودورکرنے کے لئے شہداوردودھ دو،دو کھانے کے چمچ ملاکراچھی طرح پیسٹ بنالیں ۔اسے اپنے چہرے پر دس سے پندرہ منٹ تک لگارہنے دیں اور پھر چہرہ دھولیں۔کچھ دن  تک یہ عمل جاری رکھیں۔اس عمل سے جلد  کی خشکی ختم ہوگی اور جلد نرم وملائم ہوجائے گی۔

ایلو ویرا جیل

بالوں کی جڑوں میں خارش ہونے کی ایک بڑی وجہ خشک جلد ہوتی ہے، ایلو ویرا قدرتی موئسچرائزر قرار دیا جاتا ہے، اس میں جراثیم کش اور خشکی کو بھگانے والی خصوصیات پائی جاتی ہیں، ایلوویرا جیل کو سر پر اور جلد پر براہ راست لگائیں اور 20 منٹ بعد نہالیں۔

پیٹرولیم جیلی

سردیوں میں جلد کی نمی برقرار رکھنے کے لئے پیٹرولیم جیلی بھی بہترین ثابت ہوتی ہے، جسم کو روکھے پن، خارش اور خشکی سے بچانے کے لئے نہانے کے بعد پیٹرولیم جیلی لگائیں اس سے جلد نرم و ملائم رہے گی۔

سیب کا سرکہ

سیب کا سرکہ سر کی خشکی کا بہترین حل ہے کیونکہ اس میں پائے جانے والے ایسڈک اجزا ءسر میں خشکی بننے کے عمل کو روک دیتے ہیں۔ایک چوتھائی کپ سیب کے سرکے کو پانی سے بھری اسپرے بوتل میں شامل کرلیں اور پھر اُس کا سر پر چھڑکاؤ کریں، چھڑکاؤ کے بعد سر پر تولیہ لپیٹ لیں اور پندرہ منٹ سےلے کر ایک گھنٹے تک سرکہ سر پر لگا رہنے دیں۔ اس کے بعد سر دھو لیں۔یہ عمل ہفتے میں دو بار دہرانے سے خشکی ہمیشہ کے لیےدور ہوجائے گی۔

مزید پڑھیں: سردیوں میں موسمی بیماریوں سے بچنے کے گھریلو ٹوٹکے

لیموں

سر کی خشکی سے نجات پانے کے لیے دو چائے کے چمچ لیموں کے عرق سے سر کی مالش کریں اور پانی سے دھولیں، اس کے بعددوبارہ ایک چائے کا چمچ لیموں کا عرق ایک کپ پانی میں ملائیں اور اپنے سر کو اس سے بھگولیں، اس طریقہ کار کو روزانہ اُس وقت تک کریں جب تک خشکی کا خاتمہ نہ ہوجائے۔جلد سے خشکی ختم کرنے کے لیے لیموں کے رس میں شہد، گلیسرین ملا کر رات کو بطور کریم ہاتھ پاؤں پر لگائیں۔