‘کملی’کے پریمیئر پر صبا قمر اشکبار ،سرمد کھوسٹ کیجانب سے گلے لگانے پر صارفین برہم

کورونا وباء کے باعث پچھلے دو سالوں سے سنیما گھروں کی طویل بندش کے بعد اس سال عیدالفطر پر رونقیں بحال ہوئیں اور شائقین پاکستانی فلموں سے محظوظ ہوئے۔ تاہم ، اب مشہور اداکارہ صبا قمر کی فلم ’کملی‘ کو تین جون کو سینماؤں میں پیش کیا جائے گا، اس فلم کی کاسٹ میں صبا قمر، ثانیہ سعید، عمیر رانا، عدیل افضل اور نمرہ بُچہ سمیت دیگر اداکار شامل ہیں۔

حال ہی میں اس فلم کا پریمیئر کراچی میں منعقد ہوا جس کے دوران صبا قمر کی جانب سے رونے کی ویڈیو سوشل میڈیا پر اپلوڈ ہوئی تو دیکھتے ہی دیکھتے وائرل ہوگئی اور اس قدر وائرل ہوئی کہ ٹوئٹر پر بھی اداکارہ کا نام ٹرینڈ کرنے لگا۔

فلم ‘کملی’ کا پریمیئر 29 مئی کو کراچی میں منعقد کیا گیا، جس میں فلم ساز اور کاسٹ سمیت دیگر شوبز شخصیات نے شرکت کی۔ فلم کے پریمیئر میں مہوش حیات فلم ساز رؤف وجاہت اور ان کی اہلیہ شازیہ وجاہت سمیت دیگر شوبز شخصیات نے شرکت کی۔

پریمیئر کے دوران فلم کے اختتام پر شوبز شخصیات سمیت وہاں موجود دیگر شخصیات نے صبا قمر کی اداکاری کی تعریفیں کیں اور کھڑے ہوکر ان کے لیے تالیاں بھی بجائیں۔ شوبز شخصیات اور وہاں موجود دیگر افراد کی جانب سے اداکاری کو سراہے جانے کے بعد صبا قمر جذبات پر قابو نہ پاسکیں اور وہ اشکبار ہوگئیں۔ جبکہ پریمیئر کے اختتام پر صبا قمر کے رونے پر فلم ساز سرمد کھوسٹ کی جانب سے انہیں سہارا دینے اور گلے لگانے کی ویڈیو بھی وائرل ہوئی جس پر شوبز شخصیات نے تو ان دونوں کی تعریفیں کیں، لیکن سوشل میڈیا صارفین نے ان کے عمل پر شدید تنقید کی۔

سوشل میڈیا صارفین نے اپنی رائے کا اظہار کرتے ہوئے صبا قمر کے رونے کو ‘ڈراما’ قرار دیا جب کہ ان کے اور سرمد کھوسٹ کے گلے ملنے کو ’بیہودگی‘ قرار دیا۔ اداکارہ اور فلم ساز کے گلے ملنے پر لوگوں نے زیادہ برہمی کا اظہار کرتے ہوئے دونوں کے عمل کو غلط قرار دیا اور ساتھ ہی صبا قمر کے لباس پر بھی لوگوں نے تنقید کی۔

شوبز انڈسٹری میں صبا قمر کا شمار اُن چند اداکاراؤں میں ہوتا ہے جنہوں نے اپنی صلاحیتوں کی بنیاد پر سرحد پار بھی بے پناہ شہرت حاصل کی۔ صبا قمر کو اپنی پہلی ہی بھارتی فلم ’ہندی میڈیم‘ میں بہترین اداکاری کی بدولت فلم فیئر ایوارڈز میں بہترین ایکٹریس کے لیے نامزد کیا گیا اور وہ یہ اعزاز پانے والی پہلی پاکستانی اداکارہ بنیں۔ اس فلم میں انہوں نے اپنی جاندار اداکاری سے ناصرف بھارتی مداحوں بلکہ وہاں کی نامور اداکاروں کو بھی متاثر کیا۔

مزید برآں ، حالیہ دنوں میں صبا قمر کیجانب سےاس بات کا انکشاف کیا گیا ہے کہ وہ اس سال کے اختتام تک شادی کرلیں گی، ان کی زندگی میں ایک شخص ہے اور جلد ہی ان کے مداح اور میڈیا اس کے متعلق جان جائیں گے۔ اداکارہ کے مطابق یہ وہی شخص ہے جس کے دئیے ہوئے پھولوں کی ویڈیوز وہ اکثر اپنے انسٹاگرام اکاؤنٹ پر شیئر کرتی رہتی ہیں۔