ہمایوں سعید کا رومانوی کردار، نور بخاری کی تنقید پر شینرا اکرم کا جواب

شوبز انڈسٹری کی سابقہ اداکارہ ، ماڈل اور میزبان نور بخاری کی ہمایوں سعید کی ’لندن نہیں جاؤں گا‘ کے رومانوی رول کرنے پر پوسٹ سوشل میڈیا پر وائرل ہوگئی۔

سابقہ اداکارہ نور بخاری نے اپنی انسٹاگرام اسٹوری پر ایک پوسٹ شئیر کی ہے جس میں وہ فلم لندن نہیں جاؤں گا دیکھ رہی تھیں۔ انہوں نے ہدایت کاری کی تعریف کرتے ہوئے کہا کہ “ندیم بیگ نے بہت اچھی شوٹنگ کی ہے، سینماٹوگرافی بہترین ہے، لیکن افسوس محبت کی کہانی”؟

اس موقع پر نور بخاری نے پوسٹ میں کمزور کہانی کی طرف اشارہ کرتے ہوئے کہا کہ “ہمایوں سعید کو زمانے کے ساتھ نہیں چلنا کیونکہ اس دور میں محبت نہیں ہوتی، کہانی بہت کمزور ہے، اب میچور کردار ادا کریں، بس ہضم کرنا مشکل ہے”۔

ایک اور اسٹوری میں انہوں نے ہمایوں سعید کے لیے محبت اور عزت کا پیغام لکھتے ہوئے لکھا کہ “وہ باصلاحیت اداکار ہیں اور وہ رومانوی کرداروں کے علاوہ بھی بہت سارے کردار ادا کرسکتے ہیں۔ ساتھ ہی انہوں نے آخر میں ’لندن نہیں جاؤں گا‘ کی تعریف بھی کی اور لکھا کہ انہیں فلم پسند آئی”۔

سابقہ اداکارہ کی پوسٹ دیکھنے کے بعد جہاں بہت سارے مداحوں نے ان کی تعریف کی اور ان کا ساتھ دیا وہیں پاکستان کے مایہ ناز سابق کرکٹر وسیم اکرم کی اہلیہ شینرا اکرم نے اس پوسٹ پر اپنے خیالات کا اظہار کرتے ہوئے لکھا کہ “بہت سے لوگوں کو ان کی سچی محبت نہیں ملتی یا پھر وہ اس کی تلاش میں ہیں۔ دنیا میں بہت سے غیر شادی شدہ، طلاق یافتہ یا بیوہ ہیں، ان کو مسترد نہ کریں، ان کی محبت پانے کی سچی کہانی ہے”۔

فلم ‘لندن نہیں جاؤں گا‘ کو عید الاضحٰی پر ریلیز کیا گیا تھا، جس میں انہیں رومانوی ہیرو کے طور پر دکھایا گیا ہے۔ یہ فلم ہمایوں سعید، مہوش حیات اور کبریٰ خان کے ٹرائی اینگل پیار کی کہانی کے گرد گھومتی ہے۔ فلم کو خلیل الرحمن قمر نے لکھا ہے جبکہ ندیم بیگ اس فلم کے ہدایت کار ہیں۔ یہ فلم ہمایوں سعید اور مہوش حیات کی رومانوی فلم ’پنجاب نہیں جاوٗں گی‘ کا سیکوئل نہیں بلکہ یہ ایک مختلف فلم ہے تاہم دونوں کے موضوع ملتے جلتے ہیں۔

مزید پڑھیں: احسن اور منال نوجوانوں کو گمراہ کر رہے ہیں، سابقہ اداکارہ نور بخاری

فلم کی دیگر کاسٹ میں سہیل احمد اور صبا حمید بھی شامل ہیں اور فلم میں متعدد پنجابی رومانوی گانے بھی شامل کیے گئے ہیں۔اس فلم کی شوٹنگ لندن اور ترکی کے علاوہ پنجاب کے مختلف شہروں میں کی گئی تھی اور ہمایوں سعید کو پنجابی نسل کے شخص کے طور پر دکھایا گیا ہے۔ فلم نے پاکستان سمیت دنیا بھر میں اچھی کمائی کی اور اس نے بزنس میں فہد مصطفیٰ اور ماہرہ خان کی فلم ’قائد اعظم زندہ باد‘ کو بھی پیچھے چھوڑ دیا تھا۔

مزید پڑھیں: سابقہ اداکارہ نور بخاری اور زویا ناصر سوشل میڈیا پر آمنے سامنے

خیال رہے کہ ماضی میں نور بخاری نہ صرف ٹی وی ڈراموں بلکہ فلموں میں کام کرتی رہی ہیں اور ساتھ ہی انہوں نے ٹی وی کے کئی شوز میں میزبانی کے فرائض بھی سرانجام دئیے۔ سابقہ اداکارہ کو ان کی چار شادیوں اور ناکام ازدواجی زندگی کی وجہ سے کئی بار تنقید کا نشانہ بنایا گیاہے۔ 2018 میں انہوں نےاپنے سابق شوہر عون چوہدری سے پانچویں بار شادی کی ہے ۔عون چوہدری تحریک انصاف کے رہنما ہیں اور عمران خان سے ان کی شیرینی قربت اور وفاداری رہی تھی۔ عون چوہدری سے دوسری شادی کے بعد 2019 میں نور کی بیٹی بھی ہوئی ہے۔