عالمی نوبل انعام یافتہ اور سماجی کارکن ملالہ یوسفزئی شادی کے بندھن میں بندھ گئی ہیں۔ ملالہ نے ٹوئٹر پر اپنی شادی کی اطلاع دی اور اپنے زندگی کے اس اہم دن کی چند تصویریں شیئر کیں، جن میں سے ایک میں ان کے شوہر عصر ملک کو نکاح نامے پر دستخط کرتے ہوئے دیکھا جاسکتا ہے۔
تقریبِ نکاح میں ملالہ نے پنک کلر کا قمیض شلوار پہنا جبکہ دولہا نے تھری پیس سوٹ ،جس کی ٹائی دلہن کے جوڑے سے ہم رنگ یعنی پنک ہے۔
اپنی پوسٹ میں ملالہ یوسفزئی نے لکھا کہ آج میری زندگی کا ایک قیمتی دن ہے، عصر اور میں جیون ساتھی بن گئے ہیں۔ ملالہ نے یہ بھی لکھا کہ ہم آئندہ کے سفر کے لیے ایک ساتھ چلنے کے لیے پرُجوش ہیں۔
ملالہ نے ٹوئٹ کے ذریعے بتایا کہ نکاح کی تقریب برمنگھم میں ان کے گھر پر ہی ہوئی جس میں دونوں کے خاندان کے افراد نے شرکت کی۔ ملالہ کے والد ضیاء الدین یوسفزئی نے بھی اپنی بیٹی کی نکاح کی خبر ٹوئٹر پر شیئر کی۔
ملالہ یوسفزئی کی ٹوئٹ کے بعد ان کو مبارکباد دینے والوں کا تانتا بندھ گیا اور بڑی تعداد میں لوگوں نے انہیں اور ان کے شوہر عصر ملک کو ٹوئٹ کر کے دعائیہ کلمات سے نوازا۔
خیال رہے کہ ملالہ کے شوہر عصر ملک پاکستان کرکٹ بورڈ (پی سی بی) ہائی پرفارمنس سینٹر کے جنرل منیجر آپریشنز ہیں۔ انہوں نے دو سال پہلے پاکستان کرکٹ بورڈ جوائن کیا تھا اور اس سے قبل وہ پاکستان سپر لیگ (پی ایس ایل) کی فرنچائز ملتان سلطانز کے آپریشنل منیجر تھے۔ اس کے علاوہ وہ پلیئرز منیجمنٹ ایجنسی بھی چلاتے رہے ہیں۔ انہوں نے 2012 میں لاہور یونیورسٹی آف منیجمنٹ سائنسز (لمس) سے معاشیات اور سیاسیات میں بیچلرز کی ڈگری حاصل کی اور ان کا شمار پی سی بی کے قابل افسران میں ہوتا ہے۔
ہالی ووڈ لائف کی ایک رپورٹ میں بتایا گیا ہے کہ یہ واضح نہیں ہے کہ ملالہ اور عصر ملک کب سے ایک دوسرے کو جانتے ہیں تاہم، ایسا لگتا ہے کہ یہ دونوں جون 2019 سے ایک دوسرے کو جانتے ہیں کیونکہ عصر ملک نے اپنے انسٹاگرام پر ایک گروپ سیلفی شیئر کی تھی۔ چونکہ ملالہ کرکٹ کی بڑی مداح ہیں اور وہ اپنے متعدد انٹرویوز میں وہ اس کا اظہار بھی کرتی رہی ہیں اس لئے عصر ملک سے ان کی قربت کی ایک وجہ کرکٹ بھی ہے۔ یہ دونوں پاکستان اور پی ایس ایل کے میچز میں بھی ایک ساتھ نظر آتے رہے ہیں۔ اس کے علاوہ ملالہ یوسفزئی کی 24 ویں سالگرہ بھی دونوں نے ایک ساتھ منائی تھی۔
ملالہ چند مہینے قبل اس وقت تنازعے میں گھر گئی تھیں، جب انہوں نے ایک برطانوی جریدے ووگ کو انٹرویو میں کہا تھاکہ ’مجھے سمجھ نہیں آتا کہ لوگ شادی کیوں کرتے ہیں؟ اگر آپ کسی کو اپنی زندگی کا حصہ بنانا چاہتے ہیں تو آپ کو کاغذات پر دستخط کرنے کی کیا ضرورت ہے؟ آپ دو ساتھیوں (پارٹنرز) کے طور پر کیوں نہیں رہ سکتے؟‘ ملالہ یوسف زئی کے برطانوی فیشن میگزین ووگ کو دیے گئے ایک انٹرویو کے دوران شادی کے حوالے سے کیے گئے تبصرے نے سوشل میڈیا پر ایک بحث چھیڑ دی ہے۔ تاہم ان کے والد ضیاء الدین یوسف زئی کا کہنا تھا کہ ملالہ کی بات کو سیاق و سباق سے ہٹ کر پیش کیا گیا اور انہوں نے اس بیان کی تردید کردی تھی۔
واضح رہے کہ ملالہ یوسفزئی 12 جولائی 1997 کو سوات کے علاقے منگورہ میں پیدا ہوئیں۔ 9 اکتوبر 2012 کو اسکول سے واپسی کے دوران دہشت گردوں نے حملہ کیا تھا، جس میں وہ شدید زخمی ہوئیں،انہیں علاج کے لئے پہلے پشاور اور بعد ازاں برطانیہ منتقل کردیا گیا تھا۔ 12 جولائی 2013 کو اپنی سالگرہ کے دن ملالہ یوسف زئی نے اقوام متحدہ کے اجلاس سے خطاب بھی کیا تھا۔ انہیں 2014 میں صرف 17 سال کی عمر میں امن کا نوبل انعام ملا جبکہ ملالہ کو عالمی سطح پر 40 سے زائد ایوارڈز اور اعزازات سے نوازا جاچکا ہے۔ملالہ نے گزشتہ سال آکسفورڈ یونیورسٹی سے فلسفہ، سیاست اور معاشیات کی ڈگری حاصل کی تھی۔
0 Comments