جتنا لنڈا میں نے پہنا ہوگا اتنا کسی نے نہیں پہنا ہوگا، فضا علی کا انکشاف

شوبز انڈسٹری کی خوبصورت اداکارہ فضا علی نے محض 15 سال کی عمر میں ماڈلنگ کا آغاز کیا اور پھر اداکاری کی دنیا میں قدم رکھا۔ فضا اپنی بہترین اداکاری کے ساتھ اپنی صاف گوئی اور بے باک انداز بیان کی وجہ سے بھی جانی جاتی ہیں، یہی وجہ ہے کہ مداح بھی سوشل میڈیا پر فضا علی کی باتوں اور سچائی کو سراہتے ہیں۔ اس بار بھی کچھ ایسا ہی ہوا ہے، ایک انٹرویو میں فضا علی نے اپنے کیرئیر کے آغاز پر ماضی کی تلخ یادوں اور خراب معاشی حالات کی وجہ سے پیش آنے والی مشکلات سے متعلق انکشاف کرکے سب کو حیران کردیا ہے۔

فضا علی نے نجی ٹی وی کے پروگرام میں گفتگو کرتے ہوئے بتایا کہ ‘شوبز میں جب کیرئیر کا آغاز کیا اس وقت اپنا گھر نہیں بلکہ کرائے کے گھر پر رہتے تھے اور  والدہ کینسر کی مریضہ تھیں’۔ اداکارہ نے اپنے انٹرویو میں بتایا کہ ‘کرائے کے مکان کی وجہ سے بہت اخراجات تھے، امی کا علاج بھی مہنگا تھا اور پھر میں تعلیم بھی حاصل کر رہی تھی اسی لیے کوشش کرتی تھی کہ زیادہ سے زیادہ پیسے بچاؤں’۔

اس دوران فضا علی نے کہا ‘میں شاپنگ زیادہ نہیں کرتی تھی اور لنڈے کے استعمال شدہ کپڑے پہنتی تھی، جتنا لنڈا میں نے پہنا ہوگا اتنا کسی نے نہیں پہنا ہوگا، میں کبھی عالیشان ہوٹلوں میں کھانا نہیں کھاتی تھی، کیرئیر کی شروعات میں سیٹ پر بھوکی رہتی تھی لیکن اپنے پیسوں سے کھانا کبھی نہیں منگوایا، اگر کوئی دیتا تو کھالیتی تھی ورنہ گھر جاکر امی کا پکا ہوا سالن کھاتی تھی’۔

انہوں نے یہ بھی کہا کہ ‘کافی مشکل سے پیسے جوڑ کر کراچی میں 18 لاکھ کا ایک فلیٹ خریدا تھا جو کہ ان کا ذاتی پہلا گھر تھا’۔ فضا علی نے کہا کہ ‘مشکل حالات میں گھبرانا نہیں چاہیے بلکہ ڈٹ کر مقابلہ کرنا چاہیے’۔عموماً شوبز انڈسٹری میں اداکار و اداکارائیں اپنے ماضی اور مالی حالات کو دوسروں سے چھپاتے ہیں لیکن فضا علی کے ان انکشافات پر سوشل صارفین ان کو کافی سراہا رہے ہیں بلکہ ان کی سچائی کی وجہ سے مذکورہ انٹرویو وائرل ہوگیا ہے۔

خیال رہے کہ فضا علی نے کئی مشہور ٹی وی سیریلز میں کام کیا، ان کے مشہور ڈراموں میں مہندی، لگن، اپنے ہوئے پرائے، پیاری شمو، احساس، شیشے کا محل اور یادیں وغیرہ شامل ہیں۔ اداکاری کے دوران فضا علی نے فواد فاروق سے شادی کرلی لیکن ذاتی اختلافات کی بنیاد پر یہ ان کی یہ شادی چل نہ سکی اور اس جوڑے نے اپنی راہیں جدا کرلیں اور طلاق ہوگئی، ان دونوں کی ایک بیٹی بھی ہے۔ہوسٹنگ ،ماڈلنگ اور اداکاری کے ساتھ ساتھ فضا علی سوشل میڈیا پر بھی کافی متحرک نظر آتی ہیں اور اپنی بیٹی فرال کے ساتھ تصاویر اور ویڈیوز شئیر کرتی رہتی ہیں جنہیں مداحوں بہت پسند کرتے ہیں۔

علاوہ ازیں ، کچھ عرصہ قبل سوشل میڈیا خصوصاً یوٹیوب چینلز پر فضا علی کی لیجنڈری گلوکار سجاد علی کے ساتھ دوسری شادی کی خبریں وائرل ہوئیں جس پر اداکارہ نے وضاحتی بیان جاری کیا تھا اور گزارش کی تھی کہ ہر کسی کے ساتھ ان کا نام نہ جوڑا جائے۔