بڑھاپا روکنا اب ممکن ہوسکے گا، سائنسدانوں کی اہم پیشرفت

بڑھاپا یا عمر میں اضافہ کس فرد کے ہاتھ میں نہیں ہوتا درحقیقت اس قدرتی عمل کو روکنا انسان کے بس کی بات نہیں اور ایسا ہوکر رہتا ہے۔ البتہ اب امریکی ماہرین نے ایک حیران کن تجربے کے کامیاب ہونے کا دعویٰ کیا ہے جس میں ماہرین نے بوڑھے چوہوں کو جوان جب کہ کم عمر چوہوں کو زائد العمر بنانے کا دعویٰ کیا ہے۔

ماہرین نے دعویٰ کیا کہ انسانی جینز (خلیات) میں موجود ایک خاص کیمیکل ’ایپی جینوم‘ کی خرابی انسان کو بوڑھا اور بیماریوں کا شکار بناتی ہے اور مذکورہ کیمیکل کو بہتر بنا کر بڑھتی عمر کو کم کیا جا سکتا ہے۔دراصل ایپی جینوم ہی مختلف خلیات کے لیے جینز کو متحرک کرنے میں اہم کردار ادا کرتا ہے۔سائنسی جریدے ’سیل‘ میں شائع تحقیق کے مطابق امریکی ایپی جینیٹک ماہرین نے بڑھاپے کو ختم کرنے کے لیے ابتدائی طور پر چوہوں پر تجربہ کیا جو کہ حیران کن طور پر کامیاب ہوا۔

ماہرین کےمطابق ایپی جینیٹک یعنی ڈی این اے اور جینز میں تبدیلی کے طریقوں سے بوڑھے چوہوں کو جوان بنانے کا تجربہ کامیاب ہوا جب کہ کم عمر چوہوں کو عمر رسیدہ بھی بنایا گیا۔ سائنسدانوں نے تجربے کے دوران نہ صرف جوان ہونے والے چوہوں کی جسامت بلکہ ان کے دماغ اور اندرونی اعضاء کا بھی جائزہ لیا جو کہ نو عمر چوہوں جیسے ہوگئے۔یعنی مذکورہ طریقہ علاج کے تحت ڈی این اور اور جینز کو تبدیل کرکے بوڑھے لوگوں کو جوان جب کہ بچوں کو بڑا اور بڑوں کو کم عمر بنایا جاسکتا ہے۔

امریکی ماہرین نے دعویٰ کیا کہ ایپی جنیٹک یعنی ڈی این اے اور خلیات کی تبدیلی اور طریقہ علاج سے انسانی زندگی کو روکا، موڑا اور بڑھایا جاسکتا ہے۔ مذکورہ ٹیم میں شامل سائنسدانوں کو متنازع تحقیقات کے حوالے سے جانا جاتا ہے اور مذکورہ سائنسدان کئی سال سے دعویٰ کرتے آ رہے ہیں کہ بڑھاپے کو جوانی میں تبدیل کیا جا سکتا ہے۔مذکورہ ماہرین کا دعویٰ ہے کہ انسانی ڈی این اے اور خلیات میں موجود خصوصی کیمیکلز کو تبدیل یا بہتر بناکر بچوں کو جوان اور جوانوں کو ضعیف جب کہ بزرگوں کو نوجوان بنایا جا سکتا ہے۔یہی نہیں بلکہ ماہرین نے دعویٰ کیا کہ ان کے طریقہ علاج اور تجربات سے اندھے چوہوں کی آنکھوں کی روشنی بھی واپس آگئی جب کہ بوڑھے ہونے والے چوہوں کے اندرونی اعضاءبھی متحرک اور جوان ہوگئے۔

دنیا بھر میں جوانی کو دیرپا رکھنے اور بڑھاپے کو روکنے کے لئے مختلف تحقیقات کی جارہی ہیں۔ قبل ازیں، جاپان میں ایجنگ یوایس نامی سائنسی جریدے میں ایک تحقیقی رپورٹ شائع ہوئی جس میں گرین ٹی (سبز چائے) کے متعلق ایک خاصیت سامنے آئی کہ اس نے چوہوں کی عمر میں اضافہ کیا اور ان میں عمررسیدگی کو روکنے میں بھی اہم کردار ادا کیا۔ مذکورہ تحقیقی رپورٹ میں بتایا گیا کہ سبزچائے میں قدرتی فینول اور اینٹی آکسیڈنٹ پایا جاتا ہے جس سے چوہوں کی پھرتی، چستی اور عمرمیں اضافہ دیکھا گیا۔اس کیمیکل کو کیٹچن کا نام دیا گیا۔

مزید پڑھیں: زیادہ پانی پینے کی عادت عمر کو بڑھا سکتی ہے، تحقیق میں انکشاف

بلاشبہ سائنس روز بہ روز ترقی کی منازل طے کر رہی ہے، اور نت نئے طریقہ علاج کی بدولت انسانی زندگی سہل ہوتی جارہی ہے۔گزشتہ دنوں بھی ماہرین صحت نے ذیابیطس جیسی بیماری سے نجات دلانے والا مؤثر طریقہ کار بھی دریافت کیا ہے جس کے تحت ذیابیطس کے مریض انٹرمٹنٹ فاسٹنگ کو اپنا کر اس بیماری سے نجات پاسکتے ہیں۔