بھارتی فلم ‘رئیس’ پہلے کسے آفر ہوئی؟ ایمان علی نے مداحوں کو سچ بتادیا

پاکستانی شوبز انڈسٹری کی معروف سپر ماڈل و اداکارہ ایمان علی کا میزبان عفت عمر کو دئیے گئے انٹرویو سے ایک کلپ سوشل میڈیا پر خوب وائرل ہے، جس میں ایمان علی یہ انکشاف کررہی ہیں کہ بھارتی فلم ’رئیس‘ ماہرہ خان سے قبل اُنہیں آفر ہوئی تھی۔مذکورہ انٹرویو میں عفت عمر کی جانب سے پوچھے گئے ایک سوال کے جواب میں اداکارہ نے بتایا کہ مجھے بولی ووڈ سے کسی کی کال آئی اور کہا کہ وہ مجھے شاہ رخ خان کے ساتھ فلم ’رئیس‘ میں کردار آفر کر رہے ہیں، اس پر میں نے ان سے کہا کہ وہ مجھے اسکرپٹ بھیج دیں، لیکن شاید ان کو میرا اسکرپٹ مانگنا پسند نہیں آیا۔

اداکارہ نے مزید بتایا کہ جب انہوں نے اپنے دوستوں کو یہ بتایا کہ انہوں نے شاہ رخ خان کی فلم کے لیے اسکرپٹ مانگا تو سب حیران ہو گئے اور ان سے کہا کہ وہ پاگل ہیں جنہوں نے اتنا بڑا موقع اپنے ہاتھ سے گنوا دیا۔ ایمان علی کا انٹرویو کے دوران کہنا تھا کہ اسکرپٹ مانگنا اُن کا حق ہے۔

اس دوران انہوں نے مزید کہا کہ میں نے نوٹ کیا ہے کہ پاکستان میں بھی اگر آپ کسی پروجیکٹ کے آفر ہونے کے بعد اسکرپٹ مانگیں تو لوگ بُرا مان جاتے ہیں، پاکستان میں آج بھی 90 فیصد فلمیں سب سے پہلے انہیں آفر کی جاتی ہیں مگر وہ صرف ان پروجیکٹس میں کام کرتی ہیں جن کا اسکرپٹ اِنہیں پسند آ جائے۔ ایمان علی کا کہنا ہے کہ میں ان اسکرپٹس پر کام کرتی ہوں جو مجھے پسند آ جائیں، اگر مجھے کہانی پسند نہیں آتی تو وہ کردار ادا کرنا مجھے ملازمت کرنے جیسا لگتا ہے۔

اس پر عفت عمر نے کہا کہ شاہ رُخ خان کے ساتھ فلم کرنے کا موقع کون گنواتا ہے جس پر ایمان علی کا کہنا تھا کہ چاہے فلم شاہ رُخ خان کے ساتھ ہو یا کسی کے بھی ساتھ ہو اس سے فرق نہیں پڑتا، اسٹوری اچھی ہونی چاہیے فلم اچھی ہونی چاہیے تب ہی میں کام کروں گی۔ایمان علی نے مزید کہا کہ جو مجھے ملنا ہے اور جو میرے لئے ہے وہ مجھے اللہ ضرور دے گا۔

یاد رہے کہ گزشتہ دنوں ایمان علی نے مداحوں کو یہ بات بتاکر حیران کردیا تھا کہ وہ 8 برس تک بھارتی فلموں کے مشہور ہدایتکار امتیاز علی کے ساتھ قریبی تعلقات میں رہی ہیں۔ایمان علی کئی سال پہلے بھارتی فلم ‘جب وی میٹ’کے ہدایت کار امتیاز علی کے ساتھ سرخیوں میں آئی تھیں اگرچہ انہوں نے اپنے اس تعلق کو خفیہ رکھا، لیکن وہ اکثر امتیازعلی کے ساتھ نظرآئیں جس کی وجہ سے خبروں کی سُرخیوں کا حصہ بھی بنی رہیں۔

وہ مختصر عرصے کے لیے ممبئی شفٹ بھی ہوئی تھیں تاہم اس جوڑی نے معاملات ٹھیک نہ ہونے کے باعث راہیں جُدا کرلیں تھیں۔اداکارہ نے بتایا کہ پاکستان میں تو کسی کو تعلق کے بارے میں زیادہ معلومات نہیں تھی کیونکہ میں نے کبھی کسی کو بتایا نہیں مگر بھارت میں مجھ سے اکثر اس حوالے سے سوالات کیے تھے جس کا جواب دینا میں نے ضروری نہیں سمجھا کیونکہ وہ میرا نجی معاملہ تھا۔

مزید پڑھیں: خود کو دیکھتی ہوں تو لگتا ہے کوئی خواجہ سرا کھڑا ہے، ایمان علی

علاوہ ازیں، شعیب منصور کی سپرہٹ فلم ’خدا کے لیے‘ اور ’بول‘ میں لاجواب اداکاری کا مظاہرہ کرنے والی ایمان علی کی پاکستانی فلموں میں 7 سال بعد واپسی پروڈیوسر عروہ حسین کی ریلیز ہونیوالی نئی فلم’ٹچ بٹن‘ سے ہوئی ہے۔ وہ آخری مرتبہ فہد مصطفیٰ کی فلم ‘ماہ میر’ میں سلور اسکرین پر نظر آئیں تھیں۔