جو سمجھتے ہیں اداکارائیں فحاشی پھیلاتی ہیں وہ ٹی وی دیکھنا چھوڑ دیں، اشنا شاہ

پاکستانی اداکارہ اشنا شاہ ڈراموں میں اپنی پرفارمنس کے علاوہ سوشل میڈیا پر اپنے انداز، بولڈ اور متنازع تصاویر و ویڈیوز کی وجہ سے اکثر تنقید کی زد میں رہتی ہیں۔ لیکن اشنا شاہ عمدہ اداکاری کے ساتھ اپنے ناقدین کو کرارا جواب دینا بھی خوب جانتی ہیں، یہی وجہ ہے کہ ان کی پوسٹ پر صارفین کی جانب سے کی گئی تنقید پر ان کے چبھتے ہوئے جوابات پوسٹ کو وائرل کر دیتے ہیں۔

لیکن اس بار معاملہ کچھ اور ہے کیونکہ اپنی حالیہ پوسٹ میں اشنا شاہ نے اداکاراؤں پر تنقید کرنے والوں کے لیے اہم پیغام جاری کیا ہے جس میں کافی سخت الفاظ کا چناؤ کیا گیا ہے مگر انہوں نے اپنے اس پیغام کی کوئی واضح وجہ نہیں بتائی ہے۔

اشنا شاہ نے سماجی رابطے کی ویب سائٹ ٹوئٹر پر ناقدین کو بلاوجہ کی تنقید سے باز رہنے کا مشورہ دیتے ہوئے کہا کہ ادب و آداب اور اپنی اخلاقیات کا خیال رکھنے والا ہر پاکستانی جو اداکاری کے شعبے اور اداکاروں کو کم تر سمجھتا ہے، اور یہ سمجھتا ہے کہ اداکارائیں فحاشی پھیلاتی ہیں وہ ٹی وی دیکھنا چھوڑ دیں۔

اشنا شاہ نے اپنی پوسٹ میں مزید لکھا کہ ایسے افراد وہ چینل بھی نہ دیکھیں جو اسلام کی تبلیغ نہیں کرتے۔انہوں نے اپنی پوسٹ میں یہ بھی کہا کہ اپنی غیرت دکھائیں اور ایسی ذہنیت والے افراد سوشل میڈیا کا استعمال بھی ترک کردیں۔

سوشل میڈیا پر اشنا شاہ کافی ایکیٹو رہتی ہیں اور ایسی وجہ سے ان کا شمار اُن اداکاراؤں میں ہوتا ہے جو مختلف موضوعات پر اپنی رائے دینا بے حد ضروری سمجھتی ہیں۔ ایسا ہی کچھ چند روز پہلے ہوا جب کینیڈین ولاگر روزی گیبریل نے پاکستان کے سیاحتی مقامات کو کچرے سے آلودہ کرنے کے خلاف ایک طویل پوسٹ کی تھی اور اسے صاف رکھنے کا کہا تھا۔روزی گیبریل کے مطابق کچھ مقامی افراد نے وہاں موجود کچرے اور آلودگی سے متعلق اپنے خدشات ان سے بیان کیے اور اُمید کا اظہار کیا تھا کہ وہ ان کی مدد کے لیے اپنے پلیٹ فارم کا استعمال کریں گی۔

اس حوالے سے انہوں نے انسٹاگرام پر کچھ تصاویر اور اسکرین شاٹس پر مشتمل ایک طویل پوسٹ شیئر کی تھی اور اسے ‘نارتھ کو صاف رکھیں’ کا نام دیا تھا ۔تاہم اشنا شاہ روزی گیبریل کی اس پوسٹ پر آگ بگولا ہوگئیں اور انہیں پاکستانیوں پر تنقید ایک آنکھ نا بھائی چنانچہ اداکارہ نے اس حوالے سے ایک اسٹوری میں یوٹیوبر پر تنقید بھی کی۔

علاوہ ازیں ، حال ہی میں ہونے والے برائیڈل فیشن ویک میں علیزے شاہ واک کرتے ہوئے ریمپ پر گر پڑیں تھیں جنہیں شازیہ منظور نے سنبھالا تھا۔ اس فیشن شو میں اشنا شاہ بھی ریمپ پر گرتے گرتے بچیں تھیں ،انہوں نے دائیں دیکھا، بائیں دیکھا اور حاضرین کو خاموش رہنے کا اشارہ کیا، عروسی لباس سنبھالا اور ریمپ پر  دوبار واک شروع کردی تھی۔