شادی میں بن بلائے مہمانوں والا بیان شغل کے لئے دیا تھا، یاسر حسین

اداکار اور پروڈیوسر یاسر حسین اور اداکارہ نوشین شاہ کے مابین شادی کی تقریب کو لیکر طویل عرصے سے جاری تنازعہ شاید نئے سال کی خوشیوں میں حل ہوگیا ہے، کیونکہ یاسر حسین کا کہنا ہے کہ شادی میں بن بلائے لوگوں کی شرکت کا بیان محض شغل کے لئے تھا، جسے لوگوں نے بہت زیادہ معاملہ بنالیا تھا۔

تفصیلات کے مطابق اداکار یاسر حسین نے حال ہی میں اداکار نعمان اعجاز کے پروگرام “جی سرکار ” میں شرکت کی، جہاں اداکار نے پروگرام میں اپنی شادی، کیرئیر سمیت مختلف موضوعات پر بات چیت کی۔

اس دوران شو میں میزبان کی جانب سے یاسر حسین سے شادی کی تقریب میں بن بلائے مہمانوں سے متعلق تنازعات پر سوال کیا گیا تو اداکار نے اداکارہ نوشین شاہ کا نام لئے بغیر اعتراف کیا کہ انہوں نے اپنی شادی میں بن بلائے شرکت کرنے والے لوگوں کا بیان شغل کے لئے دیا تھا مگر لوگوں نے اسے بڑا معاملہ بنا دیا تھا۔

یاسر حسین کا مزید کہنا تھا کہ شاید وہ کبھی کبھار زیادہ ہی ’شغل‘ لگالیتے ہیں البتہ بیٹے کی پیدائش کے بعد اب وہ مذاق کم کرتے ہیں، تاکہ لوگ کسی بات کو غلط نہ سمجھیں۔ ساتھ ہی شکوہ کیا کہ لوگوں میں حس مزاح کی کمی ہے، جس وجہ سے ان کے بیان کو غلط سمجھا گیا اور اسے بڑا ایشو بنایا گیا۔

واضح رہے یہ تنازعہ اس وقت شروع ہوا جب اداکار یاسر حسین نے کچھ عرصہ قبل ایک نجی چینل کے شو “گھبرانہ منع ہے” میں شرکت کی تھی، اور وہاں شو کے میزبان واسع چوہدری نے اُن سے دلچسپ سوالات کیے، ان میں سے ایک سوال اُن کی شادی میں شرکت کرنے والے بن بلائے مہمانوں سے متعلق بھی تھا۔ یاسر حسین نے بتایا کہ مہمانوں کی فہرست 170 افراد پر مشتمل تھی لیکن 200 سے زائد مہمان آگئے، جس کی وجہ ان کی شادی کا دعوت نامہ تھا جو سوشل میڈیا پر وائرل ہوگیا تھا۔ کچھ مہمان ایسے بھی تھے جوکہ دعوت نامے کے بغیر زبردستی آئے تھے ،جن میں سے ایک “نوشین شاہ” تھیں، ان کی شادی میں ان سے بھی زیادہ نوشین شاہ کی تصویریں زیادہ بنی ہیں۔

جواب میں اداکارہ نوشین شاہ کا کہنا تھا کہ کیا کوئی کسی کے گھر بن بلائے جاسکتا ہے؟ میں کسی کے گھر بھی نہیں جاتی، اگر مجھے نہ بلایا جائے تو شادی میں کیسے جاتی؟ بے بغیر کو اپنی تقریر سے اور دانش مند کو اپنی خاموشی سے پہچانا جاتا ہے، یاسر نے مجھے خود فون کیا اور شادی پر مدعو کیا۔ نوشین شاہ نے کہا کہ وہ یاسر کی بات سے مایوس ہوئی ہیں اور توقع کرتی ہیں کہ وہ ان سے معافی مانگیں گے۔

بعدازاں دونوں فنکاروں کے مابین ایک دوسرے کے خلاف مختلف مواقع پر سخت بیانات دیئے گئے، یاسر حسین نے ایک موقع پر تو اداکارہ کو تنبیہ کی اگر اداکارہ نے دوبارہ شادی کے معاملے پر بات کی، تو وہ ان کے خلاف ثبوت سامنے لے آئیں گے۔

البتہ یاسر حسین نے نوشین شاہ کے حوالے موقف اپنایا تھا کہ وہ اپنی بات پر قائم ہیں ،ان کے پاس نوشین شاہ کے وائس میسیجز ہیں جس میں انہوں نے زبردستی یاسر حسین کو شادی میں بلانے کا کہا اور ایک بار نہیں کئی بار کہا جس پر تنگ آکر یاسر حسین کو انہیں بلانا ہی پڑا لیکن وہ شادی میں آکر بھی سب کو تنگ ہی کرتی رہیں۔

اس سلسلے میں حال ہی میں اداکارہ نوشین شاہ نے مشہور ویب شو ٹو بی ہانیسٹ میں شرکت کی، جہاں اس تنازعے سے متعلق سوال پر انہوں طنزیہ جواب میں کہا کہ وہ دعوت نامے کے بغیر مشہور شخصیات کی شادیوں میں جاتی ہیں ، وہ شادیاں کریش کرتی ہیں اور انہیں یہ پسند ہے۔” مزید کہا کہ انہیں لگتا ہے کہ ہمیں اسے چھوڑ دینا چاہیے اور ہمیں اس کو بہت زیادہ مائلیج نہیں دینا چاہیے۔ عوام نے پہلے ہی ان پر بہت تنقید کی ہے۔ “میں نہیں جانتی لیکن مجھے دکھ ہوتا ہے ، میں واقعی اس کے بارے میں دکھ محسوس کرتی ہوں اور ایسی چیزیں آپ کی فطرت کو ظاہر کرتی ہیں۔