متحدہ عرب امارات میں اسرائیلی ماڈل کا جھنڈوں کے ساتھ فوٹو شوٹ

گزشتہ ماہ متحدہ عرب امارات اور اسرائیل کے مابین ہونے والے کامیاب مذاکرات کے بعد دنوں ممالک میں اب باقاعدہ طور پر تعلقات قائم ہوچکے ہیں۔ دونوں ممالک جہاں ایک دوسرے کے ساتھ معاشی سرگرمیوں کو مضبوط کرنے کے لئے معاہدے کررہے ہیں وہیں دونوں ممالک کے لوگ اب ایک دوسرے کے سیاحتی مقامات کا بھی رخ کرسکیں گے ۔ جس میں اسرائیلی لوگوں کی جانب سے یہ سرگرمیاں شروع کردی گئی ہیں۔

یہی وجہ ہے کہ متحدہ عرب امارات اور اسرائیل کے درمیان تعلقات بحال ہونے کے بعد اب اسرائیل کی ایک خاتون ماڈل مے ٹیگر نے متحدہ عرب امارات میں اپنا ایک فوٹو شوٹ بھی کروایا ہے۔ اس موقع پر متحدہ عرب امارات کی ماڈل انستاسیا بینڈریکا بھی ان کے ہمراہ موجود تھیں۔ خیال رہے انستاسیا بینڈریکا ایک روسی نژاد ماڈل ہیں جو کئی عرصے سے دبئی میں مقیم ہیں۔

تفصیلات کے مطابق گزشتہ ماہ متحدہ عرب امارات اور اسرائیل کے درمیان ایک تاریخی امن معاہدہ طے پایا گیا تھا جہاں متحدہ عرب امارات نے اسرائیل کو ناصرف بطور ریاست تسلیم کیا تھا بلکہ اس کے ساتھ ہر قسم کے سفارتی اور معاشی تعلقات قائم کرنے کا بھی اعلان کیا گیا تھا۔

اس ہی حوالے سے اسرائیلی ماڈل مے ٹیگر کا امارات کے ایک صحرائی مقام پر پاجامے کے برانڈ کے لئے ایک فوٹو شوٹ ہوا۔ جہاں اسرائیلی اور متحدہ عرب امارات سے تعلق رکھنے والی ماڈل نے فکس نامی اسرائیل برانڈ کے پاجامے پہن کر اپنا فوٹو شوٹ کروایا۔ فکس خواتین کے زیر پاجامہ مصنوعات بنانے والا ایک اسرائیلی برانڈ ہے۔

اس موقع پر دونوں ماڈلز کی جانب سے دونوں ملکوں پرچموں کو لہراتے ہوئے بھی تصویریں بھی بنوائیں گئیں۔

گلف نیوز کے مطابق اسرائیلی ماڈل مے ٹیگر نے شوٹ کے دوران بات کرتے ہوئے کہا، ان کے لئے یہ چیز بہت اہمیت کی حامل ہے کہ وہ فوٹو شوٹ کے لئے دبئی آئیں ہیں، ساتھ ہی انہوں نے یہ بھی کہا کہ ان کے لئے یہ بات قابل فخر بھی ہے کہ وہ پہلی اسرائیل ماڈل ہیں جن کا فوٹو شوٹ یہاں ہورہا ہے۔ آج وہ اس بات پر بھی فخر محسوس کررہیں کہ وہ اپنے ملک (اسرائیل) کی یہاں نمائندگی کررہی ہیں۔

واضح رہے دونوں ممالک کے مابین فلحال نہ تو براہ راست پروازوں کا سلسلہ شروع ہوا اور نہ ہی شہریوں کو ویزہ دینے سے متعلق باقاعدہ کوئی معاہدہ سامنے آیا ہے، یہ فوٹو شوٹ ٹیم غیر اسرائیلی پاسپورٹ کے ذریعے براستہ یورپ سے دبئی پہنچی ہے۔

یاد رہے متحدہ عرب امارات کے اسرائیل کو قبول کرنے کے فیصلے کو امت مسلمہ میں کافی تنقید کا نشانہ بنایا گیا تھا جبکہ اس طرح کے فوٹو شوٹ سے یقیناً دیگر مسلمان ممالک کی ناراضگی میں مزید اضافے کا خدشہ ہے۔