مختلف پھلوں اور سبزیوں کے چھلکوں کو کام میں لائیں، زندگی آسان بنائیں

عام طور پر ہم پھلوں اور سبزیوں کے چھلکوں کو کچرے دان میں ڈال دیتے ہیں کیونکہ ہم ان کے ان کے فوائد سے نا واقف ہیں۔ آپ کو یہ جان کر حیرت ہوگی کہ ان کے چھلکوں کو سنبھالنے سے ناصرف آپ کا ماحول صاف ہوگا بلکہ اس سے آپ کی زندگی بھی کافی آسان ہوجائے گی، کیسے؟ آئیے آج ہم آپ کوبتاتے ہیں کہ ان پھلوں اور سبزیوں کے چھلکوں کو کہاں کہاں استعمال کرسکتے ہیں۔

لیموں کے چھلکے

لیمو کے چھلکے برتنوں کو چمکدار بنانے کے ساتھ ساتھ اس میں سے آنے والی بدبو ختم کرنے کے لیے بھی کارآمد سمجھے جاتے ہیں۔ اکثر چائے دانیاں صاف رکھنا مشکل ہوتا ہے، اس سلسلے میں  آپ لیموں کے چھلکے لے کر اس چائے دانی میں ڈالنے کے بعد اس میں تیز گرم پانی ڈال کر اسے تھوڑی دیر کے لئے چھوڑ دیں اور تھوڑی دیر بعد اسے دھولیں، ایسا کرنے سے چائے دانی صاف اور اس کی بدبو بھی ختم ہوجائے گی۔

آلو کے چھلکے

آلو کا شمار اس سبزی میں ہوتا ہے جو کہ سال کے بارہ مہینے استعمال ہوتی ہے اس کے چھلکے غذائیت سے بھرپور ہوتے ہیں ان چھلکوں کو ضائع کرنے کے بجائے اگر آنکھوں پر لگائے جائيں تو یہ نہ صرف آنکھوں کی تھکن کم کرتے ہیں بلکہ پپوٹوں کا بھاری ہونا، آنکھوں کے نیچے حلقوں کے پڑ جانے کو بھی ختم کرتے ہیں۔

ٹماٹر اور کھیرے کے چھلکے

ٹماٹر کا استعمال ہر گھر میں باقاعدگی سے ہوتا ہے۔اس کے ساتھ ساتھ کھیرا بھی ہر موسم میں گھر میں موجود ہوتا ہے۔ کھیرے اور ٹماٹر کے چھلکوں کو پھینکنے کے بجائے ایک ساتھ بلینڈر میں بلینڈ کرلیں اور اس سے بننے والے پیسٹ کو کسی جار میں ڈال کر تین دن کے لیے فریج میں رکھ دیں اس کے بعد دن میں ایک بار اس پیسٹ کو چہرے پر لگا لیں اور سوکھنے کے لیے چھوڑ دیں۔اس کے بعد تازہ پانی سے منہ دھو لیں اس سے نہ صرف چھائیوں کا خاتمہ ہو گا بلکہ جلد کی چمک دمک بھی بحال ہوگئے۔

کیلے کے چھلکے

عام طور پر کیلے کے چھلکے کھانے کے بعد سب ہی پھینک دیتے ہیں جب کہ یہ کیلے کے چھلکے اپنے اندر پوٹاشیم کا خزانہ رکھتے ہیں- ان چھلکوں کو دانتوں پر ملنے سے دانت سفید اور مضبوط ہو جاتے ہیں اور ان کو قدرتی تحفظ حاصل ہوتا ہے ۔ اس کے علاوہ کیلے کے چھلکے وٹامن سے بھی بھرپور ہوتے ہیں اور ان کو چہرے پر رگڑنے سے یہ قدرتی اسکرب کا کام کرتے ہیں اور اس سے جلد کے مردہ سیل صاف ہو جاتے ہیں کیل مہاسوں کا خاتمہ ہوتا ہے-

نارنگی کے چھلکے

نارنگی کے چھلکے وٹامن سی سے بھرپور ہوتے ہیں ان کو دھوپ میں سکھا کر ان کا پاؤڈر بنا کر سال کے بارہ مہینے استعمال کیا جاسکتا ہے۔ یہ قدرتی طور پر بہترین سن اسکرین کے طور پر کام کرتے ہیں۔اس کے علاوہ اس کا پانی کے ساتھ ملا کر پیسٹ بھی بنایا جاسکتا ہے جو کہ قدرتی ماسک کے طور پر کام کرتا ہے۔

انار کے چھلکے

انار کو اینٹی آکسیڈینٹ حاصل کرنے کا بہترین ذریعہ سمجھا جاتا ہے جب کہ یہ کھانسی اور گلے میں سوزش کیلے بی معاون ہوتا ہے۔انار کے چھلکوں کو پھینکنے کے بجائے اسے جمع کرکے دھوپ میں سکھانے کے بعد اس کا پاؤڈر بنا لیں، اگر آپ کو کھانسی یا گلے میں تکلیف ہو تو نیم گرم پانی میں اسے گھول کر غرارے کرنے سے کافی آرام آسکتا ہے۔

سیب کے چھلکے

سیب کے چھلکوں کو کچرے دان میں پھینکنے سے بہتر آپ ان چھلکوں کو جمع کرکے اسے سورج کی روشنی میں خشک کرلیں جب یہ سیب کے چھلکے خشک ہوجائیں تو آپ اسے ایک شیشے کی برنی میں رکھ لیں۔اب آپ ایک پتیلے میں پانی گرم کرکے اس میں خشک سیب کے چھلکے اچھی طرح ابال کر اس میں چند قطرے لیمو کے شامل کرکے اسے چھان لیں، یہ بہترین چائے ذائقے میں بہترین ہونے کے ساتھ ساتھ صحت کے لیے بھی بہت اچھی ثابت ہوتی ہے۔

آڑو کے چھلکے

آڑو کو غذائیت سے بھرپور پھل سمجھا جاتا ہے اور اس کے چھلکوں میں ایک ایسی خاصیت ہوتی ہے جس کا جلد پر استعمال کرنا اسے نرم و ملائم رکھتا ہے۔ آڑو کے چھلکوں پر تھوڑی سے چینی ڈال کر ہلکے ہاتھوں سے اسے چہرے پر ملنے سے نا صرف جلد کی گرد نکلے گی بلکہ جلد بھی چمکدار ہوجائے گی۔