انڈسٹری میں زیادہ ترلوگ دھوکے باز ہیں، اُشنا شاہ کا انکشاف

ڈرامہ سیریل ‘میرے خوابوں کا دیا‘ سے شوبز کی دنیا میں قدم رکھنے والی خوبصورت اور باکمال اداکارہ اُشنا شاہ اپنی اداکاری کے ساتھ ساتھ ببیاک تبصروں کے حوالے سے بھی شہرت رکھتی ہیں۔اب انہوں نے اپنی ٹوئٹس میں شوبز انڈسٹری کی پول پٹیاں کھولتے ہوئے اکثریت کو ‘دھوکے باز’ قرار دیدیا ہے۔

اُشنا شاہ نے سماجی رابطوں کی ویب سائٹ ٹوئٹر پر ٹوئٹ کی، جس میں لکھا کہ کیا میں آپ لوگوں کو انڈسٹری کا کوئی راز بتاسکتی ہوں؟ اس میں زیادہ تر لوگ دھوکے باز ہیں، زیادہ تر چیزیں نظر کا دھوکا ہیں۔

اس موقع پر انہوں نے مزید لکھا کہ ایسا ہمیشہ تو نہیں لیکن بیشتر اوقات جب کسی چیز کو خوب بڑھا چڑھا کر پیش کیا جاتا ہے تو یے کم صلاحیت والےمفاد پرست اسے سراہتے ہیں۔ یہ دھویں اور آئینے کی طرح ہے۔ یہ پی آر (تعلقات عامہ) ہے۔اس طرح جامع حکمت عملی کے ساتھ ایک بیانیہ ترتیب دیکر  ہجوم کو اسکی پیروی پر لگایا جاتا ہے۔

اداکارہ نے مزید لکھا کہ یہ بتانے کا مقصد یہ تھا کہ صرف ایک چیز ہی دھوکا نہیں تقریباً سب کچھ ہی دھوکا ہے اور یہ شو بزنس  کی دنیا میں ہر جگہ پھیل چکا ہے۔ چاہے وہ فلمیں ہوں، ٹی وی، فلاحی کام ہوں یا کھیل۔ دھوکہ دہی کے مقابلے میں صداقت کا تناسب افسوسناک اور قدرے مایوس کن ہے۔

پاکستانی ڈرامہ سیریل ‘بشر مومن‘ ، ‘بَلا’ ، ‘بندھے اک ڈورسی‘ کی خوبرو اداکارہ اُشنا شاہ عام زندگی میں بھی اپنی بے ساختہ گفتگو اور بغیر لگے لپٹی بات کہہ دینے کے لیے مشہور ہیں۔ سوشل میڈیا پر بھی شوبز کی رنگینوں کے پیچھے چھپے کڑوے کسیلے سچ کہتی رہتی ہیں جس پر انھیں تنقید کا سامنا بھی کرنا پڑتا ہے۔وہ یہ بات بخوبی جانتی ہیں کہ اپنے لیے کیسے بولنا ہے اور اپنی رائے پر کیسے ڈٹے رہنا ہے۔جب معروف ٹی وی اینکر، مقرر اور ایم این اے عامر لیاقت حسین کی اچانک موت کے بعد سوشل میڈیا پر اداکاروں کی جانب سے پوسٹیں شیئر کی گئیں تھیں تو انہوں نے بھی ٹوئٹ کی تھی جو کافی وائرل ہوئی۔اس ٹوئٹ میں انہوں نے عامر لیاقت کی اچانک موت پر سوشل میڈیا صارفین پر شدیدغم وغصے کا اظہار کیا تھا اور کہا تھا کہ مجھے امید ہے وہ اب سکون میں ہوں گے۔

یہاں یہ بتاتے چلیں کہ اُشنا شاہ نے اپنے لئے جیون ساتھی کا انتخاب کرلیا جو کہ پروفیشنل گولفر حمزہ امین ہیں۔ گزشتہ دنوں اداکارہ نے حمزہ امین کیساتھ تصاویر شیئر کیں اور کیپشن دیا کہ کیا آپ میرے محافظ بن سکتے ہیں؟ خیال رہے کہ حمزہ امین نے کئی انٹرنیشنل ٹورز میں پاکستان کی نمائندگی کی ہے اور ان کے والد تیمور حسن امین ایشیا پیسفک گلف فیڈریشن کے چیئرمین ہیں حمزہ ایک کھلاڑی ہونے کے علاوہ سماجی کارکن کی حیثیت سے اپنی خدمات انجام دیتے رہے ہیں۔ جبکہ اُشنا شاہ سوشل میڈیا پر اپنی پوسٹوں کے ذریعے ملکی ، مذہبی و معاشرتی مسائل کو ناصرف اجاگر کرتی ہیں بلکہ ان پر اپنے ردعمل کا اظہار بھی کرتی دیکھائی دیتی ہیں۔وہ جانوروں کے تحفظ فراہم کرنے کے لئے آواز اٹھاتیں ہیں اور وہ ڈبلیو ڈبلیو ایف پاکستان کی سفیر کے بھی ہیں۔