ماڈل عبیر رضوی نے ماڈلنگ چھوڑنے کا اعلان کردیا

پاکستان فیشن انڈسٹری کی معروف ماڈل عبیر رضوی نے ماڈلنگ کو خیر باد کہہ دیا ہے اور وہ آئندہ ریمپ پر نظر نہیں آئیں گی۔ اس بات کا اعلان انہوں نے اپنے سوشل میڈیا اکاؤنٹ پر کیا۔

عبیر رضوی نے 2012 میں ریئلٹی ٹی وی شو اور مس ویٹ  کا مقابلہ جیتنے کےبعد ماڈلنگ کیرئیر کا آغاز کیا اور شہرت کی بلندیوں پر پہنچ گئیں۔ انہوں نے متعدد معروف مقامی و عالمی برانڈز کے ساتھ کام کیا۔ ان کو ماڈلنگ میں دراز قد کی وجہ سے بھی اہمیت حاصل رہی اور اسی وجہ سے انہیں متعدد ملٹی نیشنل برانڈز نے بھی اپنی تشہیری مہم کا حصہ بنایا۔

اس کے علاوہ 2020 میں عبیر رضوی کو ہم اسٹائل ایوارڈز میں بہترین فیمیل ماڈل کے لیے نامزد کیا گیا نیز وہ ساحر لودھی کی فلم ‘راستہ’ میں بھی کردار ادا کرچکی ہیں۔

تیتیس سالہ عبیر رضوی نے انسٹا گرام پر مداحوں کو اپنے فیصلے سے آگاہ کرتے ہوئے کہا کہ میں اب فیشن انڈسٹری کو چھوڑ رہی ہوں ، میرا ماڈلنگ کا سفر ایک رولر کوسٹر رائیڈ کی طرح تھا، جس کے لئے میں ان تمام لوگوں کا شکریہ ادا کرنا چاہتی ہوں جو اس سفر میں میرے ساتھ رہے۔ ماڈل کے مطابق انہوں نے ہمیشہ خوشی کو ترجیح دی ہے اور اسی وجہ سے ہی وہ زندگی کی نئی خوشیاں دریافت کرنے اور نیا کچھ کرنے کےلیے ماڈلنگ سے دور ہو رہی ہیں۔

عبیر رضوی کی جانب سے ماڈلنگ کو خیرباد کہنے کی پوسٹ پر متعدد ماڈلز و اداکاراؤں نے کمنٹس کرتے ہوئے ان کے لیے نیک خواہشات کا اظہار کیا۔ ماڈل و اداکارہ نادیہ حسین نے ان کی پوسٹ پر کمنٹ کرتے ہوئے عبیر کو ماڈلنگ نا چھوڑنے کا کہا۔

اداکارہ سعدیہ غفار نے عبیر رضوی کی پوسٹ پر کمنٹ کرتے ہوئے ان کے لیے نیک خواہشات کا اظہار کیا اور انہیں ہر دور کی پسندیدہ ماڈل بھی قرار دیا جب کہ اداکارہ غنی علی، اشنا شاہ ، ماڈل واداکارہ صدف کنول، ایمن خان اور مصباح ممتاز سمیت دیگر شخصیات نے بھی ان کے لیے نیک خواہشات کا اظہار کیا۔

ڈان امیجز کو اپنے دیئے گئے ایک انٹرویو میں عبیر رضوی نے اس فیصلے پر بات کرتے ہوئے اسے بہت اہم قرار دیا تھا۔ان کے مطابق یہ فیصلہ ان کو لینا ہی ہے تو کیوں نا وہ اس فیصلے کو اپنے ماڈلنگ کیرئیر کے عروج پر لے لیں۔ان کا یہ بھی کہنا تھا کہ انہوں نے ماڈلنگ سے کافی پیسہ کمایا لیا ہے اور وہ اپنی زندگی آرام سے گزار سکتی ہیں۔ اس لئےاب وہ کچھ نیا کرنے کا ارادہ رکھتی ہیں۔

ماڈل نے انڈسٹری میں نئے آنے والوں کے لیے کچھ مشورے بھی دئیے ، جن میں سب سے پہلے یہ کہ وہ اپنے رویہ پر توجہ مرکوز رکھیں، مثبت رہیں اور وقت کی پابندی کریں۔ جبکہ فیشن کونسل کو مشورہ دیا کہ وہ اس بات کو یقینی بنائیں کہ ریمپ پر چلنے والی ماڈلز کی عمر 5’8 سے زیادہ ہو۔

اس سے قبل معروف ماڈل انعم ملک بھی اپنے عروج پر ماڈلنگ کیرئیر اور فیشن کی گلیمرس دنیا کو الوداع کہہ چکی ہیں۔ تاہم، انعم کے ماڈلنگ چھوڑنے کی وجہ اسلام سے قریب ہونا تھا۔ اس فیصلے کے بعد ماڈل نے اپنے انسٹاگرام اکاؤنٹ سے اپنی تمام پرانی ماڈلنگ کی تصویروں کو ڈیلیٹ کر دیا تھا اور اب انسٹاگرام پر ان کی نئی آنے والی تصاویر حجاب میں ہیں۔ ساتھ ہی ساتھ ماڈل انعم ملک نے سماجی رابطے کی ویب سائٹ انسٹاگرام کے اپنے بائیو کو بھی اپ ڈیٹ کیا جس میں انہوں نے لکھا کہ اللہ تعالیٰ جسے چاہتا ہے، ہدایت دیتا ہے۔