مچھروں سے خود کو کیسے بچائیں؟ محققین نے راز بتادیا

موسم گرما اور برسات کا موسم مچھروں کا سیزن قرار دیا جاتا ہے۔ مچھر کا کاٹنا ناصرف پریشان کُن ہوتا ہے بلکہ یہ خطرناک اور جان لیوا بھی ثابت ہوسکتا ہے، مچھر کے کاٹنے سے ڈینگی، ملیریا اور چکنگونیا جیسے امراض پیدا ہوتے ہیں جو جان بھی لے سکتے ہیں۔ پاکستان سمیت دُنیا بھر میں آئے دِن مچھر کے کاٹنے سے ہونے والی اموات کے کیسز سامنے آرہے ہیں اور یہ وبا دِن بہ دِن پھیلتی جا رہی ہے۔

مچھر سے بچنے کے لیے لوگ مہنگے مہنگے کیمیکلز وغیرہ کا استعمال کرتے ہیں، گھر میں اسپرے کرتے ہیں لیکن اِس سے کوئی خاصہ اثر نہیں ہوتا ہے۔ غور طلب بات یہ ہے کہ یہ مچھر آخر ہماری جانب لپکتے کیوں ہیں ؟اور کیا ان سے بچنا ممکن ہے؟ جی ہاں ایسا ممکن ہے کیونکہ حال ہی میں محققین نے کچھ خوشبوئیں اور رنگ ایسے بتائے ہیں جن کی مدد سے مچھر کو آسانی سے خود سے دور رکھاجاسکتا ہے۔

مچھر بھگانے والی خوشبوئیں کونسی ہیں؟

لہسن

لہسن کی بو مچھروں کو ہمیشہ دور رکھنے میں مدد دیتی ہے، درحقیقت اس کے لیے لہسن ہاتھ یا جیب میں رکھنے کی بھی ضرورت نہیں، اس کے چند ٹکڑے کھالینے بھی خون چوسنے والے ان کیڑوں کو آپ سے دور رکھنے کے لیے کافی ہیں۔

تلسی

تلسی کا پودا اگانا بہت آسان ہوتا ہے اور یہ مچھروں کو گھر سے دور بھی رکھتا ہے۔ ماہرین کے مطابق اس پودے کو گھر میں لگانا مچھروں کو دور رکھنے میں مددگار ثابت ہوتا ہے جس کی وجہ اس کی تیز مہک ہے۔

پودینہ

پودینے کے پتوں کی مہک مچھروں کے لیے قابل برداشت نہیں ہوتی اور اس کے تیل کے چند قطرے استعمال کرکے آپ مچھروں کو خود سے ہمیشہ دور رکھ سکتے ہیں۔

لیمن گراس

جی ہاں لیمن گراس کی مہک بھی مچھروں کو دور رکھتی ہے اور اس کا تیل اس مقصد کے لیے دنیا بھر میں استعمال کیا جاتا ہے۔

سونف

سونف میں اینٹی بیکٹیریل اور اینٹی آکسیڈینٹ کی خصوصیات موجود ہوتی ہیں ، سونف کا تیل مچھروں کو مارنے میں معاون ثابت ہوتا ہے۔

نیم

نیم کا تیل مچھروں سے بچانے کا آسان ترین ذریعہ ہے، بس اس تیل کو لباس سے باہر حصے پر لگالیں اور بس، مچھر آپ سے دور رہیں گے۔

مچھر بھگانے والے رنگ کونسے ہیں؟

عموماً مچھروں کے ہم پر حملہ آور ہونے کی کئی وجوہات ہوسکتی ہیں مگر ہمارے لباس کا رنگ بھی ان کی توجہ حاصل کرنے کا ذریعہ بنتا ہے۔

مزید پڑھیں: آئس واٹر فیشل کیا ہے ؟ کیا یہ واقعی ہماری جلد کیلئے اچھا ہے؟

اس حوالے سے کچھ عرصے پہلے ایک تحقیق میں دریافت کیا گیا تھا کہ مچھر کچھ رنگوں کو ترجیح دیتے ہیں جبکہ کچھ سے دور رہتے ہیں۔محققین کے مطابق نتائج سے ثابت ہوا تھا کہ ملبوسات کے رنگ بھی مچھروں سے بچانے میں کافی حد تک مددگار ثابت ہوسکتے ہیں۔ مچھروں کی عام اقسام مخصوص رنگوں بشمول سرخ، نارنجی، سیاہ اور نیلگوں سبز رنگ کی جانب زیادہ کشش محسوس کرتی ہیں۔ جبکہ اس کے مقابلے میں وہ دیگر رنگ جیسے سبز، جامنی، نیلے اور سفید کو نظر انداز کردیتی ہیں۔