آئس واٹر فیشل کیا ہے ؟ کیا یہ واقعی ہماری جلد کیلئے اچھا ہے؟

فیشل یعنی چہرے کا مساج، حفظانِ صحت کے لیے بہت ضروری ہے، کیونکہ چہرے کی خوبصورتی برقرار رکھنے اور خوبصورتی کو بحال کرنے میں فیشل اہم کردار ادا کرتا ہے۔ یہ آپ کے چہرے کے اطراف جمع شدہ غیر ضروری مواد کا بھی خاتمہ کرتا ہے۔ اس لئے مرد وخواتین اپنی جلد کو چمکدار بنانے کے لیے مختلف اقسام کے فیشل کرواتے ہیں۔ مگر آج ہم آپ کو ایک ایسے فیشل کا طریقہ کار بتانے جارہے ہیں جس کی خاص بات یہ ہے کہ اس میں کسی بھی کریم کا استعمال نہیں کیا جاتا بلکہ یہ فیشل برف کے ٹھنڈے پانی سے کیا جاتا ہے، اس لئے اس کو ‘آئس واٹر فیشل’ یا ‘کولڈ تھراپی’ کہتے ہیں۔ اس فیشل کو کرنے سے جلد کو ٹھنڈک ملتی ہے اور جلد پر چمک بھی آتی ہے۔

آئیے جانتے ہیں کہ گھر پر آئس واٹر فیشل کیسے کرسکتے ہیں۔

فیشل کرنے کا طریقہ کار

آئس واٹر فیشل کرنے کے لیے پہلے ایک پیالے میں برف جمع کریں۔جب برف پگھل کر پانی پانی ہو جائے تو اس پیالے میں اپنا چہرہ ڈبو لیں۔ چہرے کو چند سیکنڈ تک ڈبوئے رکھیں اور پھر سانس باہر نکالیں اور جلد کو تھوڑا سا نارمل ہونے دیں۔ یہ عمل 3 سے 4 بار کر سکتے ہیں۔ اس کے بعد تولیہ یا روئی کی مدد سے چہرے کو صاف کریں۔

آئس فیشل کے فوائد کیا ہیں؟

چہرے کی سوجن کو کم کرتا ہے

کچھ لوگوں کے چہرے پر مختلف وجوہات کے سبب سوجن ہوتی ہے آئس فیشل ان کے چہرے کی سوجن کو کم کرتا ہے۔ یہ فیشل آپ صبح اٹھنے کے بعد آسانی سے کیا جاسکتا ہے۔ اس کے مستقل استعمال سے چہرے اور آنکھوں کے گرد سوجن کا مسئلہ دور ہوتا ہے۔

سیاہ حلقے کم کرتا ہے

یہ فیشل آنکھوں کے گرد پڑنے والے سیاہ حلقوں کو دور کرنے میں مدد کرتا ہے بلکہ یہ چہرے کے داغ دھبوں کو بھی دور کرتا ہے۔ آنکھوں کے سیاہ حلقوں کو کم کرنے کے لیے اسے ہفتے میں 2 سے 3 کیا جاسکتا ہے۔

ایکنی کا مسئلہ دور

آئس فیشل چہرے کے مہاسوں کو کم کرنے میں مددگار ہے۔اس کا باقاعدگی سے استعمال چہرے سے مہاسوں کیساتھ ساتھ چہرے سے ٹیننگ بھی دور کرتا ہے۔ باقاعدگی سے یہ فیشل کرنے سے نہ صرف چہرے کی صفائی ہوتی ہے بلکہ تازگی بھی ملتی ہے۔ اس سے چہرے پر ایک خاص چمک پیدا ہوتی ہے۔

جلد کو تروتازہ رکھتا ہے

یہ فیشل جِلد کو تروتازہ کرنے کے ساتھ چکنائی اور پسینہ پیدا کرنے والے گلینڈز کے عمل کو بہتر کرتا ہے۔ چہرے کو مناسب چکناہٹ کے ساتھ تازہ اور ٹھنڈا رکھتا ہے۔ جبکہ سخت وکھردری جلد کو نرم اور لچکدار بناتا ہے۔

آئس فیشل کے نقصانات کیا ہیں؟

اس فیشل کے فوائد کے ساتھ نقصانات بھی ہیں ،ماہرین جلد کے مطابق چہرے پر برف لگانا اچھا ہے لیکن اسے زیادہ دیر تک لگانے سے جلد کو نقصان پہنچ سکتا ہے۔ یہ جلد پر خارش اور اسے سرخ کرنے کا سبب بن سکتا ہے خاص طور پر ان کیلئے جن کی جلد حساس ہوتی ہے۔ ایسے مرد و خواتین کو یہ آفیشل نہیں کرنا چاہیے۔ اس کے علاوہ وہ لوگ جنہوں نے اپنے چہرے پر کاسمیٹک سرجری یا لیزرز ٹریٹمینٹ وغیرہ کروایا ہو وہ اپنے ڈاکٹر سے مشورہ کرنے کے بعد یہ آفیشل کرسکتے ہیں، ڈاکٹر کی اجازت کے بغیر اس فیشل کو ہرگز نہ کریں۔