خاتون نے سابقہ شوہر پر دوسری شادی کا سن کر تیزاب پھینک دیا

ملک میں تیزاب گردی کا ایک اور افسوسناک اور ہولناک واقعہ صوبہ پنجاب کے شہر لاہور میں پیش آیا، جہاں طلاق یافتہ خاتون نے سابقہ شوہر پر انتقاماً تیزاب پھینک دیا، جس سے سابقہ شوہر شدید زخمی ہوگیا۔ زخمی کو تشویشناک حالت میں اسپتال منتقل کردیا گیا ہے۔

ایکسپریس نیوز کے مطابق افسوسناک واقعہ لاہور کے علاقے اقبال ٹاؤن میں پیش آیا، جہاں صدف نامی ملزمہ نے اپنے سابقہ شوہر پر تیزاب پھینک کر شدید زخمی کر دیا۔ ملزمہ صدف کو تین سال قبل ساجد خان نامی شخص نے طلاق دے دی تھی، جبکہ ایک ہفتہ پہلے ہی اس نے دوسری شادی کی تھی۔

واقعے کی تفصیلات کے مطابق ملزمہ صدف کو جوں ہی سابقہ شوہر ساجد کی دوسری شادی کا معلوم پڑا تو اسے اس بات کا شدید غم وغصہ تھا، چنانچہ صدف نے ایک روز بھکارن کا بھیس بدل کر گلی میں سابقہ شوہر ساجد خان کا انتظار کیا اور جیسے ہی ساجد خان نظر آیا، اس پر تیزاب سے حملہ کر دیا۔ جس سے ساجد خان کی گردن، کان اور کمر کا حصہ شدید متاثر ہوا، متاثرہ شخص کو فوری طور پر اسپتال منتقل کر دیا گیا۔

بعدازاں واقعے کے اطلاع ملتے ہی نے ایس ایچ او شیرا کوٹ انور گہلن و پولیس ٹیم نے کاروائی کرکے ملزمہ کو گرفتار کرلیا۔ اس موقع پر ایس پی اقبال ٹاؤن ڈاکٹر رضا تنویر نے ایس ایچ او شیرا کوٹ انور گہلن و پولیس ٹیم کو مبارکباد پیش کی۔

دوسری جانب زیر حراست ملزمہ صدف کا بیان سامنے آیا ہے، جس میں اس کا کہنا تھا کہ تین سال پہلے ساجد سے شادی ہوئی ، پھر اس نے اسے طلاق دے دی، پھر ساجد خان نے اس کا حلالہ کروایا، جس کے بعد خود ہی دوسری شادی کر رہا ہے اور اس سے شادی نہیں کی، جس پر اسے شدید غصہ آیا اور اس نے یہ کام کیا، اس کی ڈھائی سال کی چھوٹی سی بچی بھی ہے۔

یاد رہے کچھ ماہ قبل تیزاب گردی کا ایسا ہی ایک ہولناک واقعہ کراچی کے علاقے ناگن چورنگی پر واقعے فلیٹ میں بھی پیش آیا تھا، جہاں طلاق یافتہ خاتون نے سابقہ شوہر پر تیزاب پھینک کر، اسے بری طرح زخمی کر دیا تھا۔

متاثرہ شخص محمد عثمان کے قریبی رشتہ دار کے مطابق تیزاب گردی کے اس واقعے میں محمد عثمان کے چہرے اور ہاتھوں سمیت جسم کے کئی حصے متاثر ہوئے ہیں۔ محمد عثمان کو نامعلوم نمبر سے فون آیا تھا اور اسے 3 بجے ناگن چورنگی پر واقع فلیٹ پر ملنے کے لئے بلایا گیا تھا، جہاں اس کی سابقہ بیوی شبانہ بھی موجود تھی۔ شبانہ اور اس کے درمیان 9 ماہ قبل طلاق ہوگئی تھی، البتہ شبانہ کا دوبارہ شادی پر اصرار تھا۔

اس دوران فلیٹ پہنچ کر جب محمد عثمان کی جانب سے دوبارہ شادی پر انکار کیا گیا، تو شبانہ کی جانب سے سابقہ شوہر پر تیزاب پھینک دیا گیا، جس سے وہ خود بھی معمولی متاثر ہوئی، تاہم عثمان زخمی حالت میں وہاں سے نکلنے میں کامیاب ہوا اور اپنی دادی کے گھر پہنچا، جس پر اس کے رشتہ داروں نے اسے فوری طور پر سول اسپتال منتقل کیا گیا۔

مزید پڑھیں: بورے والا میں سابقہ شوہر بیوی سے زیادتی اور تیزاب پھینک کر فرار ہوگیا

دوسری جانب شبانہ نیو کراچی پولیس اسٹیشن گئی، اور شوہر کے خلاف مقدمہ درج کرانے کی کوشش کی، کہ اس کے شوہر نے اس پر تیزاب پھینکنے کی کوشش کی۔

خیال رہے ہمارے ملک میں یہ خوفناک جرم ایک حقیقت رکھتا ہے، ہم آئے روز ایسے واقعات رپورٹ ہوتے ہوئے سنتے ہیں، اگرچے ملک میں اس جرم کے خلاف سخت قانون سازی ہوچکی ہے، لیکن ان واقعات میں کوئی واضح کمی نہیں آسکی ہے