پاکستانی پی ایچ ڈی طالبہ کی شاندار کامیابی، دو غیر ملکی ایوارڈ جیت لیے

ہمارے طالبعلم صلاحیتوں کے اعتبار سے کسی سے کم نہیں، شعبہ کوئی بھی یہ اپنی محنت کے بل بوتے پر کامیابیوں کے جھنڈے گاڑنا بخوبی جانتے ہیں، ڈاکٹر پنجوانی سینٹر برائے مالیکیولر میڈیسن اور ڈرگ ریسرچ جامعہ کراچی کی پی ایچ ڈی اسکالر عائشہ اسحاق نے انٹرنیشنل سوسائٹی فار اسٹیم سیل ریسرچ امریکا کے دو بین الاقوامی ایوارڈ اپنے نام کرلیے ہیں۔

تفصیلات کے مطابق سان فرانسسکو میں منعقدہ بین الاقوامی سمپوزیم میں پاکستانی اسکالر عائشہ اسحاق نے نے یہ دو اعزازات اپنے نام کئے ،اول انہیں سفری فیلوشپ دی گئی اور دوم اسٹیم سیل پر اپنی غیرمعمولی تحقیقی تخلیص کا ایوارڈ بھی جیتا ہے۔

بین الاقوامی مرکز برائے کیمیائی و حیاتیاتی علوم جامعہ کراچی کے ترجمان کے مطابق عائشہ اسحاق نے یہ ایوارڈ آئی ایس ایس سی آر کے تحت سان فرانسسکو امریکا میں منقعدہ ایک بین الاقوامی ہائبرڈ کانفرنس کے پوسٹر سیشن میں آن لائن اپنی تحقیق پیش کرتے ہوئے حاصل کیا۔

واضح رہے کہ متعلقہ تحقیق دراصل چوہوں کے گودوں سے نکالے گئے بنیادی خلیات کے استعمال سے اسٹروک اور دیگر امراض کے علاج سے متعلق ہے، عائشہ اسحاق ڈاکٹر پنجوانی سینٹر میں پروفیسر ڈاکٹر عصمت سلیم کی نگرانی پی ایچ ڈی کررہی ہیں۔ جبکہ اس عالمی کانفرنس میں پوری دنیا سے بائیس سو افراد شریک تھے جبکہ ایک ہزار افراد آن لائن شریک ہوئے۔

شیخ الجامعہ کراچی پروفیسر ڈاکٹر ناصرہ خاتون اور سرپرست اعلیٰ بین الاقوامی مرکز اور سابق وفاقی وزیر برائے سائنس اور ٹیکنالوجی پروفیسر ڈاکٹر عطاء الرحمن نے بھی ہونہار طالبہ کو اس کی کامیابی پر مبارکباد دی ہے۔بین الاقوامی مرکز برائے کیمیائی و حیاتیاتی علوم جامعہ کراچی کے سربراہ ڈاکٹر اقبال چوہدری نے عائشہ اسحاق کو اُن کی کامیابی پر مبارکباد دیتے ہوئے کہا یہ کامیابی دراصل پاکستانی نوجوانوں کی صلاحیت کا اعتراف ہے۔

بلاشبہ پاکستانی نوجوان انتہائی باصلاحیت ہیں اگر انہیں موقع دیا جائے تو یہ عالمی سطح پر حیرت انگیز کامیابی حاصل کرسکتے ہیں۔ اس سے قبل غلام اسحاق خان انسٹی ٹیوٹ کے طلبہ نے اس بات کو سچ ثابت کر دیکھایا۔ ان طلبہ نے امریکا میں ہونے والے ایک مقابلے میں دوسری پوزیشن حاصل کر کے دنیا بھر میں پاکستان کا نام روشن کردیا۔غلام اسحاق خان انسٹی ٹیوٹ (جی آئی کےآئی)کے طلبہ نے امریکی انسٹی ٹیوٹ آف ایروناٹکس اینڈ ایسٹروناٹکس کے مقابلے میں ایم آئی ٹی اور اسٹین فورڈ جیسی عالمی شہرت یافتہ یونیورسٹیوں کو شکست دی۔ سوشل میڈیا سائٹ ٹوئٹر پر امریکی سفارتخانے نے پوزیشن لینے والے طلبہ کا گروپ فوٹو شیئر کرتے ہوئے پاکستان کو مبارکباد دی تھی۔

علاوہ ازیں ، حالیہ دنوں میں 10 پاکستانی نوجوانوں نے تعلیم، صحت، آگاہی اور سماجی خدمت میں ’’ڈیانا ایوارڈ‘‘ حاصل کرکے دنیا بھر میں ملک کا نام روشن کردیا۔جن پاکستانی نوجوانوں نے یہ ایوارڈ حاصل کیا، ان کی عمر 25 برس سے کم جبکہ ایوارڈ ہولڈر ایک لڑکی کی عمر 18 برس ہے جو ان سب میں کم عمر ہے۔ایوارڈ حاصل کرنے والوں میں پانچ پاکستانی، ایک کا تعلق آزاد و جموں کشمیر جبکہ 4 اوورسیز پاکستانی ہیں، ان میں سے اقراء بسمہ، رمنا سعید، فریال اشفاق، علیزے خان، محمد عامر کھوسو اور معظم شاہ بخاری سید کا تعلق پاکستان کے مختلف شہروں سے اور ارقم الہدی کا تعلق آزاد جموں کشمیر سے ہے جبکہ معیز لاکھانی، عائزہ عابد، اور سکندر (سونی) خان اوورسیز پاکستانی ہیں۔

مختلف شعبہ جات میں پاکستانی نوجوانوں کی یہ کامیایاں اس بات کی عکاسی کرتی ہیں کہ یہ مستقبل میں یہ باصلاحیت نوجوان ملک کو در پیش مشکلات اور چیلنجز سےکامیابی سے نکال سکتے ہیں۔