ڈیلیوری بوائے نے گھوڑے پر کھانا پہنچا کرسب کو حیران کردیا

عام طور پر دنیا بھر کے ریسٹورنٹس اپنے گاہکوں کی سہولت اور کاروبار میں اضافے کے لئے کھانے کی ہوم ڈیلیوری کررہے ہیں لیکن طوفانی بارشوں کے دوران ہوم ڈیلیوری کرنا تھوڑا مشکل ہوجاتا ہے۔ ایسے میں بھارت کے شہر ممبئی میں ہوم ڈیلیوری کے شعبے سے منسلک ایک ڈیلیوری بوائے نے تیز بارشوں کے دوران کھانا گھر تک پہنچانے کے لئے انوکھا طریقہ اپنایا اقر گھوڑے کا استعمال کرکے سب کو حیرت میں مبتلا کردیا ہے۔ سوشل میڈیا پر اس ڈیلیوری بوائے کی ویڈیو کافی وائرل ہورہی ہے جو بھارت کے شہر ممبئی کی ہے جہاں نجی کمپنی کے فوڈ ڈیلیوری بوائے کو بائیک کے بجائے گھوڑے پر کسٹمرز کے گھر کھانا لے جاتے دیکھا گیا۔

صارفین کی جانب سے اس ویڈیو خوب پسند کیا جارہا ہے اور ویڈیو پر دلچسپ تبصرے بھی کیے جارہے ہیں۔ لوگ اس ڈیلیوری بوائے کو اپنے کام سے مخلص اور محنتی قرار دے رہے ہیں جبکہ ایک صارف نے گھوڑے پر کھانا پہنچانے کو ’شاہی ڈیلیوری‘ کا نام دیا جب کہ ایک اور صارف نے کہا کہ ’میں امید کرتا ہوں کہ یہ پیزا ڈیلیور کرنے کا جارہا ہو‘۔ تاہم ، بھارتی میڈیا کے مطابق یہ ویڈیو جعلی یا ازراہ مذاق نہیں بنائی گئی بلکہ زیر غور ویڈیو  حقیقت میں گھوڑے پر کھانا  ڈیلیور کرنے کی ہے۔ دوسری جانب، اس ویڈیو پر سوشل میڈیا صارفین کی جانب سے دلچسپ تبصرے بھی کیے جارہے ہیں۔

واضح رہے کہ عالمی منڈی میں پیٹرول کی بڑھتی قیمتوں کے بعد سڑکوں پر بائیک اور گاڑیوں کے بجائے گھوڑوں کے استعمال کی ویڈیوز تو سامنے آئی تھیں لیکن اب تیز بارش کے باعث بھی بائیک کے بجائے گھوڑے کا انتخاب بطور سواری کرنے کا یہ واقعہ پہلی بار منظر عام پر آیا ہے۔

آج کل ان آن لائن سروسز سے فائدہ اٹھانے کے لئے صارفین کی تعداد بھی دن بہ دن بڑھتی جارہی ہے۔ یہی وجہ ہے کہ اب ہر ہوٹل، ریسٹورنٹ اور دکانوں کے باہر گھروں میں کھانے پینے کی اشیاء پہنچانے کے لئے فوڈ ڈیلیوری کمپنیوں کے ڈیلیوری بوائز نظر آتے ہیں اور اب وہ وقت دور نہیں کہ یہ کام ڈرون طیارے سر انجام دیں گے اور فوڈ ڈلیوری ان کے ذریعے ہوگی کیونکہ ملک کے صف اول کے ای کامرس پلیٹ فارم، فوڈ پانڈا نے خصوصی ڈرون طیارے سے کھانے پہنچانے کے آزمائشی مرحلے کا آغاز کردیا ہے۔

اس مقصد کے لئے فوڈ ڈلیوری کمپنی فوڈ پانڈا نے ڈرون فوڈ ڈیلیوری کا کامیاب تجربہ کیاہے۔ڈرون کی یہ آزمائشی پرواز ڈپٹی کمشنر اسلام آباد کے دفتر کے تعاون سے کی گئی جس کا نام پانڈا فلائے رکھا گیا ہے جو ایف- 9 پارک اسلام آباد میں ہوا۔ سماجی رابطے کی ویب سائٹ ٹوئٹر پر ڈپٹی کمشنر اسلام آباد محمد حمزہ شفقات نے فوڈ پانڈا کے اس پائلٹ لانچ کی تصویریں بھی پوسٹ کیں تھیں۔

بلاشبہ دور ِحاضر میں ٹیکنالوجی نے ہر کام میں جدت اور آسانی پیدا کردی ہے بلکہ یوں کہنا مناسب ہوگا کہ سائنسی ترقی نے دنیا میں انقلاب برپا کردیا ہے اب کوئی کام مشکل نہیں رہا ہر کام کے لیے چھوٹی بڑی مشینیں تخلیق کی گئی ہیں تاکہ مشکل کام آسانی کے ساتھ اور کم وقت میں مکمل کیا جاسکے۔ مختلف کمپنیوں کی جانب سے آن لائن سروس بھی اس تیز رفتار دور میں کسی سہولت سے کم نہیں اب چاہے کہیں جانے کے لئے گھر بیٹھے گاڑی منگوانی ہو، کھانا پھر سوداسلف بس موبائل اٹھائیں اور آرڈر کریں ہر چیز آپ کے گھر پر پہنچ جائے گی۔