ہمنوا کا ساتواں گانا ’’کوئی اچھی خبر‘‘ ریلیز، انتشار کے درمیان امید اور خود کلامی کی عکاسی

لاہور/ہنزہ (نمائندہ خصوصی) عالمی میوزک پلیٹ فارم ہمنوا نے اپنے پہلے سیزن کا ساتواں گیت ’’کوئی اچھی خبر‘‘ جاری کر دیا ہے، جو زندگی کی بے یقینی، داخلی کشمکش اور بہتر کل کی امید کو موسیقی اور شاعری کے ذریعے اجاگر کرتا ہے۔

ہنزہ کے پُرفضا اور دلکش مناظر میں واقع آفٹو ریزورٹ، کریم آباد میں ریکارڈ کیا گیا یہ گیت انسان کی ان داخلی کیفیات کی ترجمانی کرتا ہے جو اکثر خاموشی اور تنہائی کے لمحات میں جنم لیتی ہیں۔ ’’کوئی اچھی خبر‘‘ ایک ایسی شاعرانہ خود کلامی ہے جس میں سوال، اضطراب، حوصلہ اور امید ایک ساتھ جلوہ گر ہوتے ہیں۔

گیت کی کیوریشن معروف موسیقار ذوالفقار جبار خان (زلفی) اور شیری خطاک نے کی ہے، جبکہ مرکزی آواز فہیم الدین ہنزائی کی ہے۔ موسیقی میں شیری خطاک، میلوِن آرتھر، محمد ہنائد، ڈورین جوناس گوئٹسچ، ویرو شان اور عدنان کریم نے بھی اپنی صلاحیتوں کا مظاہرہ کیا ہے۔

اس گیت کے بول معروف شاعر عمران اللہ ہنزائی (رمز) نے تحریر کیے ہیں جبکہ دھن فہیم الدین ہنزائی نے ترتیب دی۔ موسیقی کی ترتیب زلفی اور شیری خطاک نے دی جبکہ پروڈکشن اور مکسنگ کے فرائض بھی زلفی نے انجام دیے۔

گیت کے اجراء کے موقع پر ہمنوا کے شریک بانی اور کری ایٹو ڈائریکٹر زلفی نے کہا کہ ’’کوئی اچھی خبر ان خیالات کی آواز ہے جو انسان اکثر دوسروں سے بیان نہیں کر پاتا۔ تنہائی کے لمحات میں انسان اپنے آپ اور اپنے رب سے وہ سوالات کرتا ہے جو روزمرہ زندگی میں زبان پر نہیں آتے۔ یہی کیفیت اس گیت کی روح ہے۔‘‘

انہوں نے مزید کہا کہ عمران ہنزائی کی شاعری نہایت اثر انگیز ہے جو سننے والے کے دل کی گہرائیوں تک رسائی حاصل کرتی ہے اور ان احساسات کو لفظ دیتی ہے جنہیں بیان کرنا اکثر مشکل ہوتا ہے۔

گیت کی ویڈیو معروف ہدایتکار عامر مغل نے ڈائریکٹ کی ہے جبکہ غوث حسین اور شہزیب قریشی نے بطور ایسوسی ایٹ ڈائریکٹر خدمات انجام دی ہیں۔ ویڈیو کی بصری تشکیل، آرٹ ڈائریکشن، اسٹائلنگ اور دیگر تخلیقی پہلوؤں میں بھی متعدد فنکاروں نے حصہ لیا ہے، جس کے نتیجے میں ایک ایسا بصری تجربہ سامنے آیا ہے جو گیت کے جذباتی اور فکری پس منظر کو مزید گہرائی بخشتا ہے۔

’’کوئی اچھی خبر‘‘ ہمنوا کے پہلے سیزن کی موسیقی اور جذباتی سفر میں ایک نئی کڑی ہے۔ اس سے قبل حیران امنم، نورِ نظر، قتغنی، ہولویور، سوے اور لاسٹ اِن لو ریلیز ہو چکے ہیں۔ ہمنوا کا مقصد پاکستان کی متنوع ثقافتوں، زبانوں اور خطوں کی کہانیوں کو موسیقی کے ذریعے دنیا تک پہنچانا ہے۔

’’کوئی اچھی خبر‘‘ اب یوٹیوب، اسپاٹیفائی اور دیگر نشریاتی پلیٹ فارمز پر دستیاب ہے۔