حمائمہ ملک نے اپنی شادی کی خبروں پر برہمی کا اظہار کردیا

پاکستانی معروف اداکارہ و ماڈل حمائمہ ملک نے ہر ماہ اپنی سامنے آنے والی شادی کی خبروں پر برہمی کا اظہار کردیا۔ اداکارہ نے وضاحت کی ہے کہ انہوں نے شادی نہیں کی بلکہ کچھ بلاگرز اپنی ریٹنگ کے لئے مذہبی شخصیات کے ساتھ ان کا نام جوڑ رہے ہیں جو باعث شرم ہے۔ اداکارہ نے گزارش کی ہے کہ اس قسم کی تمام حرکتوں کو بند کیا جائے۔

اداکارہ حمائمہ ملک نے اپنے انسٹاگرام پوسٹ کے ذریعے چند سوشل میڈیا پلیٹ فارمز اور بلاگرز کو تنقید کا نشانہ بنایا ہے۔ اپنے پوسٹ میں اداکارہ کا کہنا ہے کہ سوشل میڈیا بلاگرز کو ہم جیسے ستاروں کی ضرورت ہے لیکن ہمیں ان کی کوئی ضرورت نہیں ہے۔ انہوں نے کہا ہے کہ ہر ماہ میری شادی کسی ایسی شخصیت سے کروادی جاتی ہے جو کہ میرے اور میرے خاندان کے لئے باعث شرمندگی ثابت ہوتا ہے۔

انہوں نے لکھا کہ بلاگرز اور سوشل میڈیا صارفین اپنے ایک پوسٹ کو وائرل کرنے کے لئے اس طرح کی حرکتیں کرتے ہیں جو کہ افسوس کا مقام ہے۔ حمائمہ مالک نے ان افراد کی رازداری کا احترام کرنے پر بھی زور دیا انہوں نے کہا کہ جن لوگوں کی تصاویر ہمارے ساتھ وائرل ہوتی ہیں ان کا تعلق معزز مذہبی گھرانوں سے ہے۔ یہ وہ لوگ ہیں جن کا میں بہت زیادہ احترام کرتی ہوں۔ خدا کے لیے، ایسے معزز روحانی افراد کو ‘محض گپ شپ ‘کے لئے خبروں میں مت گھسیٹیں، میں جب بھی شادی کرونگی اور اعلان کرنا چاہوں گی تو پریس کانفرنس بلالوں گی۔ اداکارہ نے گزارش کی ہے کہ اس قسم کی تمام حرکتوں کو بند کیا جائے۔

واضح رہے کہ اداکارہ حمائمہ ملک نے اداکار شمعون عباسی سے 2010 میں شادی کی تھی لیکن یہ شادی زیادہ عرصہ برقرار نہ رہ سکی تھی اور دونوں کے درمیان دو برس بعد طلاق ہوگئی تھی۔ حمائمہ ملک پاکستان فلم انڈسٹری کے علاوہ بھارت میں بھی اداکار عمران ہاشمی کے ہمراہ فلم راجہ نٹور لال میں کام کر چکی ہیں۔

علاوہ ازیں ، گزشتہ برس آئی پی پی اے (انٹرنیشنل پاکستان پرسٹیج ایوارڈز) کی تقریب 31 اکتوبر 2021 کو ترکی کے دارالحکومت استنبول میں منعقد ہوئے جس میں حمائمہ ملک نے بھی شرکت کی تھی۔ تاہم تقریب کے بعد انہیں اپینڈکس کی سرجری کے لئے استنبول کے اسپتال میں 22 گھنٹے گزارے پڑے تھے، اپنی کامیاب سرجری پر انہوں نے انسٹا گرام پوسٹ میں اللہ کا شکر ادا کیا تھا اور لکھا تھا کہ اس سارے واقعے میں، میں نے موت کو انتہائی قریب سے دیکھا۔

اس پوسٹ پر مداحوں کے کمنٹس کا تانتا بندھ گیا تھا جسمیں ان کی جلد صحت یابی کے لیے ڈھیروں دعائیں لکھی گئیں تھیں۔اس ایوارڈ تقریب سے پہلے سوشل میڈیا پر ڈانس ریہرسل کی ایک ویڈیو بھی سامنے آئی تھی جس میں حمائمہ ملک اور میرا کو ایک ساتھ خوشگوار موڈ میں رقص کرتے دیکھا گیا تھا۔